Limyè Lavi

SAMDI 23

ANONSYASYON GRANMÈT LA

(Gran Fèt).

PREMYE MOSO LABIB

“Men Vyèj la ap vin ansent”.

NAN LIV PWOFÈT IZAYI 7, 10-14; 8, 10

Jou sa yo:

Granmèt la pale avèk Akaz, li di: “Mande Granmèt Bondye ou la yon siy ba ou, nan fon anba a oubyen anwo nèt la”.

Akaz di: “Mwen p’ap mande, mwen p’ap tante Granmèt la”.

Izayi di: “Koute, kay David: èske sa twò piti pou nou, pou n’ap fatige lèzòm, pou nou rive fatige Bondye m’ nan? Se poutèt sa Granmèt la li menm ap ba nou yon siy. Men Vyèj la ap ansent, l’ap anfante yon ti gason, y’ap rele non l’ Emanyèl, paske Bondye avèk nou”.

Pawòl Granmèt la.

R/Mèsi Bondye, mèsi.

SÒM 39, 7-8a. 8b-9. 10.11

R/ Men m’ap vini, Granmèt, pou m’ fè volonte ou.

Sakrifis ak kado ou pa t’ vle sa, men se zòrèy ou fouye pou mwen. Sakrifis antye ak sakrifis pou peche, ou pa t’ mande sa, lè sa a mwen di: “Men m’ap vini.R.

Nan woulo liv la yo ekri sou mwen pou m’ fè volonte ou. Bondye m’, mwen vle, lalwa w’ la nan fon kè m”.R.

Mwen anonse jistis ou nan gran asanble a; men po bouch mwen, mwen pa anpeche yo, Granmèt, ou konnen.R.

Jistis ou a, mwen pa kache l’ nan kè m’, verite w’ la ak delivrans ou a, mwen deklare yo. Mwen pa kache kè sansib ou a ak verite w’ la nan gran asanble a.R.

DEZYÈM MOSO LABIB

“Nan tèt liv la, yo ekri sou mwen, pou m’ fè volonte ou, Bondye”

NAN LÈT EBRE YO 10, 4-10

Li pa posib pou san towo ak bouk wete peche. Se pousa lè Jezikri ap antre sou tè a, li di: “Sakrifis ak kado, ou pa t’ vle sa, se yon kò ou fòme pou mwen; sakrifis pou peche pa t’ fè w’ plezi; lè sa a atò mwen di: “Men m’ap vini; nan tèt liv la yo ekri osijè m’, pou m’ fè volonte ou, Bondye”.

Pi wo a, li te di: “sakrifis ak kado ak sakrifis pou peche, ou pa t’ vle sa, ni sa pa t’ fè ou plezi, sa yo konn ofri daprè lalwa a, lè sa a mwen di: “Men m’ap vini pou m’ fè volonte ou, Bondye”; li wete premye a, pou l’ enstale sa k’ vin aprè a. Se nan volonte sa a nou vin sen, gras a sakrifis kò Jezikri yon fwa pou tout.

Pawòl Granmèt la.

R/Mèsi Bondye, mèsi.

LEVANJIL

“Men w’ap ansent, w’ap anfante yon ti gason”

MEN BÒN NOUVÈL JEZIKRI A DAPRÈ LIK KI SEN 1, 26-38

Lè sa a:

Bondye voye zanj Gabriyèl nan yon vil Galile yo rele Nazarèt, kot yon vyèj, ki te fiyanse avèk yon mesye yo te rele Jozèf, nan kay David, non vyèj la se te Mari.

zanj la antre kote l’, li di: “Se pou kè ou kontan, ou menm ki plen gras, Granmèt la avèk ou, ou beni pami tout fi”. Lè l’ tande sa, li twouble poutèt pawòl li a, li t’ap kalkile ki kalite mòd salye sa a.

Zanj la di l: “Pa pè, Mari; ou jwenn gras kot Bondye; men w’ap ansent, w’ap anfante yon ti pitit gason, w’ap rele non l’ Jezi. L’ap gran, y’ap rele l’ Pitit Sa a ki anwo nèt la, Granmèt Bondye ap ba li twòn David papa l’ la, l’ap kòmande kòm wa nan kay Jakòb la pou tout tan, rè li p’ap janm fini”.

Mari di zanj la: “Kijan pou sa fèt, paske lèzòm mwen pa konnen”.

Zanj la reponn, li di l’: “Lespri Sen an ap vini nan ou, fòs Sa a ki anwo nèt la ap kouvri ou ak lonbraj li. Se pousa sa a k’ap fèt nan ou a, l’ap sen, y’ap rele l’ Pitit Bondye. Men Elizabèt, kouzin ou an, li menm tou li ansent yon ti gason nan vyeyès li a, mwa sa a se sizyèm nan pou sa a yo te rele pa kapab fè pitit la; paske anyen pa enposib kot Bondye”.

Mari di: “Men sèvant Granmèt la; se pou sa fèt pou mwen daprè pawòl ou a”. Zanj la pati kite l’.

An nou fè Lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON : Jodi Legliz ap fete anonsyasyon Granmèt la. Granmèt la pa sèlman anonse nesans li, men tou li anonse misyon li. Se yon anons ki pote nouvote, paske pitt Bondye a pral fèt nan vant yon ti fi ki vyèj ; Mari ki vyèj. Se nouvo paske se pa ni nan tanp lan ni pa yon prèt, ni Jerizalèm ke Bondye manifeste grandè li kòm sovè nou sinon pa yon tifi ki t’ap viv nan yon vilaj ke anpil moun pa t’ menm konnen nan Galile. Se sa menm yon nouvo kontra, se sa menm yon nouvèl alyans. Ak rezon pou Mari k’ap fè kè l’ kontan, paske zanj lan pote pou li yon bòn nouvèl : li di li l’ap vin Manman Bondye (Jezi= Bondye sovè).   L’ap gran, y’ap rele l’ Pitit Sa a ki anwo nèt la, Granmèt Bondye ap ba li twòn David papa l’ la. Lik vle montre nou siperyote Jezi sou Jan Batis, prekisè li a, sila ki t’ap prepare chemen an. Men se pa yon grandè ki chita sou logèy, sou pouvwa politik al ekonomik, se yon grandè ki reflete nan sèvis, nan misyon pòt an pòt, nan pataj, nan gerizon, nan lanmou, nan imilite ak nan solidarite. Se pou sa menm Bondye chwazi tounen moun nan vant yon tifi ki soti nan yon lokalite trè rekile, san enpòtans jewografik e politik ak ekonomik, yon tifi ki pa gen gwo ran sosyal.  Nou menm nou gade moun sou aparans, men Bondye li menm li gade kè moun, li gade sou pa moun sou pa anndan. E se la ‘vijinite’ Mari a li menm li kache, li gen yon sans nou ka konprann li ; anpil fwa nou pran pou nou entèprete tèks biblik yo yon fason literal sou baz ipotèz biyolojik ou syantifik. Men pou Lik vijinite Mari an gen yon sans espirityèl ki pèmet nou dekouvri grandè Bondye nan lavi moun ki sèvi li ak tout kè, moun k’ap mennen yon lavi selon pawòl li, selon prensip li yo.

LAPRIYÈ : Granmèt tanpri, menm jan ak Mari, fè m’ gen kouraj pou mwen mete ti pwojè pa mwen yo sou kote pou mwen antre nan gran pwojè liberasyon ou gen pou tè a.

PWOPOZISYON : Pandan tout semèn nan repete menm fraz ki eksprime lafwa Mari a : «Men sèvant Granmèt la ; se pou sa fèt pou mwen daprè pawòl ou a », paske yon nan bagay ki pi difisil nan lavi nou, se anbandone pwòp volonte nou pou nou fè volonte Granmèt la.