VANDREDI 22 MAS 2013

PREMYE MOSO LABIB

“Granmèt la avèk mwen, tankou yon sòlda ki gen fòs”.

NAN LIV PWOFÈT JEREMI 20, 10-l3

Mwen tande afwon anpil moun ap fè m’, ak bwi toutalantou: «An nou pèsekite l’, an nou pèsekite l’; tout moun ki t’ap viv lapè avèk mwen, ki te konn ret tou kole m’: si l’ te kapab pran nan pyèj, pou nou ranpòte laviktwa kont li, pou nou tire vanjans sou li».

Men Granmèt la avèk mwen, tankou yon sòlda ki gen fòs; se pousa moun k’ap pèsekite m’ yo se yo menm k’ap tonbe, se yo menm k’ap febli, y’ap wont anpil, paske yo pa t’ konprann lawont tout tan an, ki p’ap janm efase a. Kanta ou menm, Granmèt lame yo, ou menm ki eseye sila a ki kòrèk la, ki wè ren ak kè, se pou m’ wè vanjans w’ap tire sou yo, tanpri; paske se ou menm mwen devwale kòz mwen.

Chante pou Granmèt la, fè lwanj Granmèt la, paske li delivre nanm pòv la sot nan men mechan.

Pawòl Granmèt la.

R/Mèsi Bondye, mèsi.

SÒM 17, 2-3a. 3be-4. 5-6. 7

R/Nan tray mwen an, mwen rele Granmèt la, li koute m’.

Mwen renmen ou, Granmèt, fòs mwen.

Granmèt, kay defans mwen, kachèt mwen, ak sila a k’ap deliver m’ nan.R.

Bondye mwen, sekou m’, mwen espere nan li.

Sila a k’ap pwoteje m’, kòn delivrans mwen, li menm k’ap soutni m’.

M’ap rele Granmèt la ki merite lwanj la, l’ap sove m’ sot nan men lènmi m’ yo.R.

Lanm dlo lanmò yo vlope m’, ravi n’ Belyal yo twouble m’;

kòd lanfè yo antoure m’, filè lanmò yo sènen m’.R.

Nan tray mwen an, mwen rele Granmèt la, mwen rele kot Bondye m’ nan; li koute vwa m’, antan l’ nan kay sakre l’ la, rèl mwen rive devan fas li, nan zòrèy li. R.

LEVANJIL

“Yo t’ap chèche sezi l’, li chape sot nan men yo”.

MEN BÒN NOUVÈL JEZIKRI A DAPRÈ JAN KI SEN 10, 31-42

Lè sa a:

Jwif yo pran wòch, pou yo kalonnen Jezi. Jezi pran lapawòl, li di yo: “Mwen montre nou anpil bon aksyon ki sot nan Papa m’; pou kilès nan aksyon sa yo n’ap kalonnen m’ nan”?

Jwif yo reponn li: “Se pa pou yon bon aksyon n’ap kalonnen ou, men se poutèt ou blasfème, se moun ou ye, epi ou pran pòz Bondye ou”.

Jezi reponn yo: “Èske nan lalwa nou an yo pa ekri: “Mwen di: Se Dye nou ye”? Si yo di yo se dye, yo menm pawòl Bondye a fèt pou yo a (epi yo pa kapab defèt sa k’ ekri a), sila a menm Papa a fè sen an, li voye sou tè a, nou di: “Ou blasfème, paske ou di: mwen se Pitit Bondye”. Si m’ pa fè aksyon Papa m’ yo, nou pa bezwen kwè m’. Men si m’ fè yo, menm si nou pa vle kwè m’, se pou nou kwè aksyon yo, pou nou konnen, pou nou kwè Papa a nan mwen, mwen nan Papa a”.

Konsa yo t’ap ehèche sezi l’, men li chape sot nan men yo. Li pati lòt bò Jouden an ankò, kote Jan te konn batize anvan an, li ret la.

Anpil moun vin kote l’, yo t’ap di: “Jan pa t’ fè okenn siy; men tout sa Jan te di sou li yo se te vre”. Anpil moun kwè nan li.

An nou fè Lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON : Y’ap chèche kalonnen Jezi anba kout wòch, yo te vle arete l’ paske li di li se pitit Bondye. Gen yon pwovèb ki di : satan fouye twou li, se li k’ tonbe ladan li. Pou pwofèt Jeremi, moun ki pa t’ vle tande laverite yo t’ap veye l’ pou wè kilè pou l’ di yon bagay mal pou yo te kapab kondane l’, yo t’ap di, ann denonse l’ bay otorite yo, menm sa ki te zanmi l, yo t’ap tann kilè pou l’ fè yon fo pa pou yo kapab antrave l’; men kòm se travay Granmèt la li t’ap fè, Bondye pa t’ janm lage l’ bay mechan yo, li te toujou kanpe avèk li pou l’ defann li. Bondye, se non l’ sa Bon-Dye ; li gen pouvwa sou tout bagay, se sa k’ fè tout sa ki t’ap pèsekite Jeremi yo gen pou yo bite epi pou yo wont; ala chans pou moun ki fè travay Granmèt la konfye l’ la byen ; moun sa a nan pwen jou pou l’ pa byen kore, paske Granmèt la pa nan patipri, se sa ki rive pou Jwif yo avèk Jezi, yo t’ap chèche yon okazyon pou kraze l’ ak kout wòch, pou bon zèv li yo; yo t’ap tann yon Mesi daprè Ebre yo. Pou Grèk yo se Kris la, se menm kesyon sa a yo te poze Jan, chèf yo te yon ti jan pè Mesi a, paske Jwif yo ak pèp la te panse l’ap vin pran pouvwa yo. Jezi te kòmanse santi lè pou l’ te bay lavil te prèske rive ; li te pale klè pou tout moun te ka konprann. Li di se Pitit Bondye li ye, aprè sa yo te montre vrèman se Mesi a, se travay delivrans lan li te vin fè nan mitan pèp la ; menm jan Papa a te delivre pèp li a nan anba jouk esklavay la ; Jwif yo t’ap chèche l’ men lè l’ po t’ ko rive, li chape poul li san yo pa t’ fè l’ anyen.Tankou Sòm 17 la di, lè w’ kondwi bak ou byen, lè w’ lapriyè, pa gen jou pou w’ pa byen kore,  paske se Granmèt la ki chwazi nou depi jou nou batize ; li konfye nou yon misyon, nou pa kapab jwe avèk li, se vre lavi misyonè pa fasil, men avèk fòs Bondye n’a rive.

LAPRIYÈ : Granmèt, se ou menm ki rele m’, ou chwazi m’ pou asosye w’. Ou konnen kijan mwen fèb, mwen vle swiv Jezi, pitit ou a, men ou konnen avèk ti kwa pa m’ yo, m’ap rankontre chak jou, mwen bezwen fòs pa w’ lè m’ tonbe pou m’ kab leve, konsa m’a gade Jezi e m’a pran kouraj pou m’ leve kanpe. Amèn.

PWOPOZISYON : Obeyi Jezi, pitit Bondye a ki te vin fè travay papa.