VANDREDI 26

Koulè Blan

PREMYE MOSO LABIB

“Bondye reyalize pwomès la, antan l’ fè Jezi resisite”.

 NAN TRAVAY APOT YO 13, 26-33

Jou sa yo : Lè Pyè rive Antyòch Pisidi, li di nan sinagòg la : “Mesye frè m’ yo, pitit ras Abraam, epi nou menm ki krenn Bondye, se pou nou pawòl delivrans sa a yo voye l’. Sa yo ki te abite Jerizalèm yo, ni chèf li yo, yo pa rekonèt li, ni pawòl pwofèt yo yo konn li chak saba a, yo reyalize pawòl sa yo antan yo jije l’.Yo pa jwenn okenn koz lanmò nan li, yo mande Pilat pou yo touye l’. Lè yo fin reyalize tout sa k’ te ekri sou li, yo desann li sot sou bwa a, yo depoze l’ nan yon kavo. Men Bondye leve l’ sot nan pami mò yo sou twazyèm jou a; li parèt pandan anpil jou devan sa yo ki te monte avèk li sot Galile a rive Jerizalèm nan, yo menm ki sèvi l’ temwen jous koulye a devan foul la. Nou menm nou anonse nou reyalizasyon pwomès la yo te fè bay papa nou yo ; Bondye reyalize l’ pou pitit nou yo antan l’ fè Jezi resiste, jan sa ekri nan sòm dezyèm nan : “Ou se Pitit mwen ; jodi a mwen anfante ou”.

Pawòl Granmèt la.

R/Mèsi Bondye, mèsi.

SÒM REPONS 2. 6-7. 8-9. 10-11

R/ Se Pitit mwen ou ye: jodi a mwen anfante ou.

Oubyen: Alelouya.

“Mwen enstale wa m’ nan sou Siyon, mòn mwen an ki sen an” ! M’ap anonse desizyon l’ nan. Granmèt la di m’: “Se Pitit mwen ou ye, se mwen menm jodi a ki anfante ou.R.

Mande m’, m’ap ba ou nasyon yo kòm eritaj ou, posesyon ou, se limit tè a. W’ap kòmande yo ak yon bagèt an fè, tankou vèso ki fèt ak tè, w’ap kraze yo”.R.

Koulye a, wa yo, konprann, pran leson, nou menm k’ap jije tè a. Sèvi Granmèt la ak krent, fete devan l’ avèk sezisman.R.

LEVANJIL                                                                         

“Mwen se chemen an, verite a, ak lavi a”.               

MEN BÒN NOUVÈL JEZIKRI A DAPRÈ JAN KI SEN 14, 1-6

Lè sa a: Jezi di disip li yo:

“Pa kite kè nou twouble. Se pou nou kwè nan Bondye, epi kwè nan mwen menm tou. Nan kay Papa m’ nan gen anpil kote pou rete. Otreman mwen ta di nou, paske m’a prale pare yon plas pou nou. Lè m’a fin al prepare plas la pou nou an, m’a tounen vin pran nou avèk mwen, konsa, kote m’ap ye a, se la n’a ye tou. Epi kote m’a prale a, n’a konnen l’, n’a konnen chemen an”. Toma di l’: “Granmèt, nou pa konnen kote w’a prale; kòman nou kapab fè konnen chemen an”? Jezi di l’: “Mwen se chemen an, verite a, ak lavi a. Pèsòn pa vin kot Papa a, sof si l’ pase pa lantremiz mwen”.

An nou fè Lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: Bondye gen yon pwojè pou nou chak; mwen sonje yon pwovèb ki di “pwomès se dèt”. Kidonk lè w’ pwomèt yon moun yon bagay, se yon angajman ou deja pran, fòk ou fidèl; moun sa a gen espwa nan ou, li konte sou ou, li fè w’ konfyans, l’ap tann ou ba li kichòy. Nou menm tou, fòk nou sonje pwomès nou yo, nou dwe sonje pwomès nou te fè Bondye nan batèm nou, pwomès pou nou pa mele nan sèvis dyab, nan sòlòkòtò. Nou wè nan premye lekti a, Apot yo di yo vin pote Bòn Nouvèl la ba nou ki se pwomès Bondye te fè zansèt nou yo; pwomès sa yo, Bondye reyalize yo tout bon vre pou nou ki se pitit li, nan leve li leve Jezi byen vivan, tankou Sòm 2 a di l’: Bondye di Jezi li se pitit li chwazi a. Jezi se wa nou e nou pa gen 2 reyèlman vre, se wa ki fè tèt li pase pou sèvitè (esklav) pou li kapab sèvi nou, epi nan fason sa a  li montre nou kijan nou menm tou, nou youn dwe sèvi lòt. Se Jezi ki vin reyalize pwomès Papa a: si se li menm ki Wa nou, poukisa pou n’ap bay tèt nou pwoblèm? Poukisa nasyon yo ap toumante kò yo konsa? Poukisa pèp yo ap fè plan pa yo pou anyen? Kilès ki kapab kont Wa sila a ki kòrèk la? Li menm ki se Chemen, Laverite ak Lavi. Jodi a Jezi kontinye ap fè mèvèy pou nou tout kote li pase; paske se li menm ki vrè chemen an ki mennen kay Papa a, se poutèt sa se pou nou toujou chèche Jezi nan lavi nou, pou n’ fè sa l’ mande nou fè, epi pou nou swiv li. Nan Levanjil Jan, nan chapit 14, vèsè 1-6, Jezi di nou pa bezwen boulvèse nou pou anyen: yon sèl bagay, se pou nou kwè nan Papa a epi kwè nan li. Jezi di :“kay Papa m’ gen anpil plas pou nou rete”, men fòk nou fè atansyon! Se pa tout moun k’ap kapab chita nan plas sa a, fòk nou travay pou sa paske syèl la pa piyay, se pa tankou yon jaden w’ plante, epi w’al ladan l’ lè w’ vle; nan syèl la nan pwen vòlè, nan pwen achte; pou w’ chita nan plas sa a Jezi prepare a, ou pa bezwen ni parenn ni marenn, ou p’ap bezwen peye raketè anba, ni ou pa bezwen fè kou mal taye; yon sèl bagay se redi nan travay epi fè volonte Bondye nan tout bagay. Nan meditasyon nou pou jodi a. Ann mande Jezi ouvri je n’ pou n’ kab dekouvri epi suiv vrè Chemen an ki mennen kay Papa a, ki se li menm menm.

LAPRIYÈ: Jezi Granmèt, tanpri louvri je m’ pou m’ wè chemen ki mennen kay Papa a. Ede mwen sispann bay tèt mwen pwoblèm antan m’ap rekonèt ou se Chemen an, Laverite a ak Lavi a. Jezi mwen bezwen fòs ou pou m’ kab kwè nan Papa a avèk w’, konsa, peche a p’ap jwen plas nan mwen; lè sa a m’a ba ou premye plas nan lavi m’. Amèn.

PWOPOZISYON: Puiske syèl la pa piyay, m’ap trayvay pou m’ fè volonte Bondye, pou m’ kab eritye plas Jezi al pare pou mwen an.