LENDI 2

Koulè Vyolèt

PREMYE MOSO LABIB

“Ap gen fèt pou sila yo k’ap sove a”

NAN LIV PWOFÈT IZAYI 4, 2-6

Jou sa a jèm Granmèt la ap nan grandè ak bèlte, epi fwi tè a ap leve byen wo, ap gen fèt pou sila yo k’ap sove nan Izrayèl la. Men sa k’ap rive: tout sila yo k’ap rete nan Siyon, ti rès k’ap nan Jerizalèm nan, y’ap rele l’ sen, tout moun ki gen non l’ ekri nan lavi nan Jerizalèm.

Si Granmèt la ap pwòpte fòt pitit fi Siyon yo, l’ap lave san Jerizalèm nan sot nan mitan l’ nan lespri jijman ak lespri dife. Sou tout plas mòn Siyon an ak tout kote y’ap lapriyè l’, Granmèt la ap kreye nyaj lajounen ak lafimen epi klète dife k’ap flanbe nan nuit: sèke sou tout moun bèlte l’ ap sèvi pwoteksyon, l’ap tankou yon joupa pou fè lonbraj lajounen kont chalè, pou sèvi kachèt ak twou wòch kont loraj ak lapli.

Pawòl Granmèt la.

R/Mèsi Bondye, mèsi.          

SÒM REPONS 121, 1-2, 34a (4b-5. 6-7) 8-9

R/ Nan lakay Granmèt la n’aprale ak kè kontan.

Mwen kontan, lè yo di m’ : «N’apral nan lakay Granmèt la».

Pye nou deja kanpe nan pòt ou yo, Jerizalèm.R.

Se la reyèlman vre ras yo ap monte, ras Granmèt la, temwayaj Izrayèl, pou fè lwanj pou non Granmèt la.

Paske se la fotèy yo ap poze pou jijman an, fotèy kay David la.R.

Mande sa k’ap bay Jerizalèm lapè. Se pou yo gen asirans, sila yo ki renmen w’ nan.R.

Se pou gen lapè nan miray ou yo, avèk asirans nan kay defans ou yo.R.

Poutèt frè m’ yo ak pwochen m’ yo m’ap di : «Lapè nan ou !»

Poutèt kay Granmèt Bondye nou an m’ap mande byen pou ou.R.

LEVANJIL

“Anpil moun ap sòti nan direksyon solèy leve ak nan direksyon solèy kouche, y’ap vin nan rèy syèl yo”

MEN BÒN NOUVÈL JEZIKRI A DAPRÈ MATYE KI SEN

8, 5 -11

Lè sa a :

Pandan Jezi t’ap antre Kafanawòm, yon kapitèn pwoche kote l’, li di : « Granmèt, sèvitè m’ nan kouche lakay la, yon bò mouri, l’ap soufri anpil».

Jezi di l’: “M’aprale, m’ap geri li”.

Kapitèn nan reponn, li di: “Granmèt, mwen pa merite pou ou antre anba fetay lakay mwen; men di yon pawòl, epi sèvitè m’ nan ap geri. Sèke mwen menm mwen se yon moun ki anba lòd lòt moun, mwen gen sòlda anba lòd mwen, mwen di sa a: “Alé”, epi 1’ale; epi lòt la: “Vini”, epi li vini; epi sèvitè m’ nan: “Fè sa”, epi li fè li”.

Lè Jezi tande sa, li sezi, li di sila yo ki t’ap suiv li a: “An verite, mwen di nou, mwen pa jwenn kalite lafwa sa a nan Izrayèl. Ebyen mwen di nou: anpil moun ap vin sòti nan direksyon solèy leve ak nan direksyon solèy kouche, y’ap manje avèk Abraam, Izaak ak Jakòb nan rèy syèl yo”.

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON

Nan premye moso labib la nou wè  kòman pwofèt Izayi anonse nou bèlte ak Grandè  Granmèt la, lè li di nou: nan Izrayèl Granmèt la pral ratabli dwa ak Jistis. Bondye vle lavi pout tout pitit li yo san distenksyon koulè, ras, lang ak nasyonalite, li vle lavi an abondans pou tout pitit fi ak tout pitit gason li yo. Pandan l’ap denonse sa ki mal, an menm tan l’ap anonse nou libète. Paske li gen pou soufle yon van jistis ak lavi nan tout Jerizalèm. Nan Levanjil la Sen Matye fè alizyon ak lafwa. Lafwa yon kapitèn women, yon Jwif. Kisa sa vle di nou, Jezi ki se Jwif ak yon payen? Nan vèsè 8 la, kapitèn nan trè reyalist lè l’ di: “Granmèt, mwen pa merite pou ou antre anba fetay lakay mwen; men di yon pawòl, epi sèvitè m’ nan ap geri”. Sa vle di, kapitèn nan te konsyan ke yon Jwif riske kouri nan yon salte kiltirèl si li ale lakay yon payen. Men li rekonèt pouvwa Jezi sou maladi; alò yon mo sifi pou geri sèvitè a a distans.  Jezi eksprime admirasyon li yon fason   polemik, sa ki vle di lafwa kapitèn nan  raple li mank lafwa Jwif yo. Sa ki vle di,  pòt wayòm Bondye a,  ki se renmen, kè poze, jistis ak  lavi pral ouvri a tout moun ki gen yon lafwa ki sanble ak lafwa kapitèn nan. Se pou sa, ann mande Granmèt plis lafwa nan Tan Lavan sa, pou n’  ka akeyi nan lavi nou,  nan yon epòk kote moun bay byen materyèl plis enpòtans pase Bondye,kote gen gwo konpetisyon nan nivo konsomasyon, kote yo bay rezo sosyal yo plis enpòtans ke koze relijyon an.

LAPRIYÈ: Granmèt, ou menm ki Bondye, ou chwazi desann pou ou ka ba nou lavi, tanpri fè nou kraze tout tandans egoyist nou yo, ki anpeche nou fè kè nou piti ak rabese nou  tankou Mari manman Bondye. Nan non Jezi Pitit ou a. Amèn!

PWOPOZISYON: Nan plen Tan Lavan an, ann revize lafwa nou pou n’ wè si nou gen lafwan nan Bondye oubyen nan bagay k’ap pase yo.