JEDI 30

Koulè Blan

Gran Fèt: KÒ AK SAN JEZIKRI KI SEN ANPIL LA

PREMYE MOSO LABIB

“Li ofri pen ak diven”.

NAN LIV LAJENÈZ 14, 18-20

Jou sa yo :

Mèlkisedèk, wa Salèm, pote pen ak diven (li te prèt Bondye ki anwo nèt la), li beni Abram, li di : “Konpliman pou Abram onon Bondye ki anwo nèt la, li menm ki kreye syèl la ak tè a, konpliman pou Bondye ki anwo nèt la, gras a pwoteksyon l’, lènmi yo nan men ou”. Li bay Abram dizyèm pòsyon nan tout bagay.

Pawòl Granmèt la.

R/Mèsi Bondye, mèsi.

SÒM REPONS 109, 1. 2. 3. 4

R/ Ou se prèt pou tout tan daprè ran Mèlkisedèk.

Granmèt la di Granmèt mwen:“Chita adwat mwen, joustan mwen poze lènmi w’ yo kòm eskalye pye ou”.R.

Baton pouvwa ou, Granmèt la voye l’ sot nan Siyon: kòmande nan mitan lènmi w’ yo.R.

Pouvwa a avèk ou jou fòs ou a, nan bèlte ki sen yo, nan vant granmaten tankou lawouze mwen anfante ou.R.

Granmèt la fè sèman, li p’ap regrèt li: “Ou se prèt pou tout tan daprè ran Mèlkisedèk”.R.

DEZYÈM MOSO LABIB

“Chak fwa n’ap manje, n’ap bwè, n’ap anonse lanmò Granmèt la”.

NAN PREMYÈ LÈT APOT PÒL KI SEN, POU KORENTYEN YO 11, 23-26

Frè m’ yo:

Mwen resevwa nan men Granmèt la sa m’ transmèt nou an, sèke Granmèt Jezi, nannuit yo te renmèt li a, li pran pen, li di Bondye mèsi, li kasé l’, li di: “Pran, manje: sa a se kò m’, sa yo renmèt pou nou an; fè sa pou fè sonje m”. Menm jan, aprè li fin manje, li pran kalis la tou, li di: “Kalis sa a se kalis nouvo kontra a nan san mwen; fè sa, chak fwa n’ap bwè, pou nou fè sonje mwen”.

Reyèlman vre, chak fwa n’ap manje pen sa a, n’ap bwè kalis sa a, se lanmò Granmèt la n’ap anonse, joustan Granmèt la va vini.

Pawòl Granmèt la.

R/Mèsi Bondye, mèsi.

LEVANJIL

“Yo tout manje vant plen”.

MEN BÒN NOUVÈL JEZIKRI A DAPRÈ LIK KI SEN 9, llb-17

Lè sa a:

Jezi t’ap pale ak foul yo sou rèy Bondye a; moun ki te bezwen swen, li geri yo. Jou a te kòmanse bese, douz yo pwoche kote l’, yo di l’: “Voye foul yo ale, pou y’al nan vil yo ak bouk yo, ki alantou yo, pou yo jwenn kote pou yo dòmi, epi pou yo jwenn manje; paske kote sa a se nan yon dezè nou ye”. Li menm li di yo: “Nou menm, ba yo manje”. Yo di l’: “Nou pa gen plis pase senk pen ak de pwason; sof si n’al achte manje pou tout foul sa a”.

Yo te prèske senk mil gason. Li di disip yo: “Fè yo kouche senkant pa senkant nan dispozisyon pou yo manje”. Yo fè sa, yo fè tout moun kouche.

Li pran senk pen yo ak de pwason yo, li leve je nan syèl la, li beni yo, li kase yo, li separe bay disip li yo, pou yo met devan foul yo. Tout moun manje vant plen. Yo ranmase sa k’te an twòp pou yo, douz panye moso pen.

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: Frè m’ ak sè m’ yo, jodi a litiji Legliz la envite n’ fete Fèt Kò ak San Jezikri, Granmèt nou an. Se yon fèt ki envite n’ reflechi sou renmen k’ap debòde kè Jezi Pitit Bondye a ki te vin montre n’ renmen Bondye pou lèzòm. Renmen sa a ki pouse l’ bay lavi l’ pou nou sou yon kwa, renmen sa a ki pouse l’ kite yon siy san parèy kote l’ vle rete prezan nan mitan nou, kote l’ vle pataje pwòp lavi n’, kote l’ vle vin tounen vrè manje k’ap fè nou viv la, lavi pou tout tan an. Siy sa a se Kò ak San li, tankou li menm li te di l’ nan soupe ak disip li yo Jedi Sen an. Sen Ogisten, youn nan gran tewolojyen Legliz la te di yon lè ak moun ki pral resevwa losti a nan lamès: “ Tounen sa w’ap resevwa a”. Sa vle di, n’ap kominye nan Kò ak San Jezikri pou n’ tounen Jezikri pou lòt yo. Relasyon nou ak Jezi dwe pwoche n’ pi plis bò kote lòt yo, li dwe fè n’ angaje n’ pi plis nan travay levanjelizasyon an.  Jan Tèm Pastoral ane a di nou an: “ Nan lafwa ak nan fratènite n’ap bati kominote nou an”. Se ansanm nou dwe fè travay sa a, ale rankontre moun yo kote yo ye, pote Bòn Nouvèl la ba yo, fè yo vin tounen disip Jezikri, manm Legliz la ki se yon sèl kò k’ap viv gras a sakreman Lekaristi a, lavi Legliz la, paske Lekaristi a se aktyalizasyon mèvèy pasyon ak rezireksyon Jezikri a.  Daprè Liv Katechis Legliz Katolik la nan nimewo  1328-1332, Sakreman Kò ak San Jezi a gen plizyè non. Non sa yo mache ak sa l’ genyen nan li menm: Yo rele l’ Ekaristi, (Di Bondye mèsi), Gran fèt Granmèt la( Jezi manje ak disip li yo jedi nan lasware avan arestasyon l’epi sa montre gran repa l’al prepare pou disip li yo nan syèl la) , Pen ki pataje a (jès li te fè pou l’ separe pen sa ak disip li yo), Asanble Ekaristik (paske se pèp la ki sanble pou manje l’), Kominyon (sakreman sa ini kretyen yo youn ak lòt). Lekaristi a, jan Sen Pòl fè moun Korent yo konnen, se anons mèvèy delivrans la: soufrans, lanmò ak leve byen vivan Jezikri. Se bèl mevèy sa a tout pèp batize yo ap viv nan chak selebrasyon lamès. N’ap selebre Lekaristi a ki se memwa gran sakrifis Jezi te fè pou l’ te sove nou. An menm tan Lekaristi a se sakrifis Jezi k’ap fèt sou lotèl la nan chak lamès, yon sakrifis ki pa gen san ki koule men ki reyèl. Se mèvey lafwa pèp Bondye a ki fè l’ kwè nan prezans reyèl Jezi ki parèt sou fòm Pen ak Diven an. Lafwa pèp Bondye a fè l’ kwè, Jezi prezan sou lotèl la aprè chak konsekrasyon epi ki kwè ke Jezi kontinye ap pataje kò l’ ak san l’ pou lavi l’ la kapab kontinye nan nou menm. Pèp ki manje kò ak san Jezikri a vin tounen temwen vivan Jezikri nan mond lan. Moun ki manje kò Jezi vin tounen pwofèt Granmèt la ki anwo nèt la, men ki nan lavi chak kretyen batize, konfime, kominye epi ki konsyan de relasyon l’ ak Trinite a, ki konnen li se enstriman kote Granmèt la pase pou l’ kontinye misyon delivrans li an. Se pou sa pèp Bondye a dwe mete l’ deyò menm jan ak Jezi, Pitit Bondye a, pou l’al preche lamisyon, pou l’al pote Bòn Nouvèl la nan tout kwen, bay tout moun, pou tout sila a ki tande epi ki kwè nan pawòl la kapab gen lavi nèt ale a.

Nan Levanjil la nou wè Jezi, Pen Bondye Vivan an k’ap kontinye misyon delivrans li resevwa nan men Papa l’ la: Preche Bòn Nouvèl wayòm nan pataje mesaj renmen an ak nan pote tout kalite gerizon moun nan bezwen. Anpil moun toujou antoure l’ pou yo jwenn delivrans pou pwoblèm yo, sitou moun ki gen pwoblèm fizik, espirityèl, moun ki swaf yon demen miyò, moun k’ap chache yon sans ak ekzistans yo. Jezi se solisyon pou tout pwoblèm k’ap ravaje moun yo sou latè, se sa l’ te ye nan tan l’ t’ap viv la, se sa l’ toujou ye jounen jodi a. Tout sila yo k’ap vanse kote l’ nan senplisite kè yo, nan konfyans nan li, nan dezi yo genyen pou yo chanje lavi yo, Granmèt la toujou fè eklate bèlte l’ nan yo menm. Li vle kontinye travay liberasyon pèp la nan Legliz la ki gen misyon kontinye  travay sa a, jan li menm te vle la. Nou wè nan lekti jodi a, Levanjil miltiplikasyon pen an, kote Jezi bay pen espirityèl la, Pawòl Bondye, epi li bay pen materyèl la. Mirak sa a fè n’ sonje  Lekaristi a ki se pen espirityèl la, men li fè n’ sonje tou misyon Legliz la genyen pou l’ solidarize ak moun yo nan soufrans kòporèl yo tou. Se sa nou jwenn nan estrikti mouvman sosyal Legliz la mete pou l’ marye reyalite espirityèl la ak reyalite materyèl la dekwa pou se moun nan an antye, kò l’, nanm’ li ak lespri l’ ki rive jwenn vrè liberasyon Granmèt Jezi te pote a. Kòm pèp Bondye a, patizan Jezikri, ann fòme chenn solidarite sa a pou n’ kontinye kenbe relasyon n’ ak Pitit Bondye a nan viv selebrasyon Lekaristi a pi dyanm chak jou, epi pou n’ vin tounen lekaristi pou lòt yo, dekwa pou lavi Bondye a kapab transfòme n’ nèt ale.

M’ap swete n’ Bòn Fèt Kò ak San Jezikri pandan m’ap envite n’ tounen chak jou Lekaristi pou lòt yo, nan sèvis nou, nan angajman n’, nan temwanyaj n’ap bay!

LAPRIYÈ: Granmèt, tanpri, ede n’ konprann chak jou enpòtans sa genyen nan resevwa w’ nan Sakreman Lekaristi a. Ede n’ konsyan chak jou nou se manm kò w’ epi nou pa dwe pè bay tèt nou nan sèvis lòt yo menm jan ak ou, pou delivrans ou an kapab gaye toupatou sou fas tèt a. Amèn...

PWOPOZISYON:Nou kapab reyini ak gwoup n’ap travay yo nan Pawas nou pou n’ fè lekti diferan jan Liv Katechis Legliz Katolik la rele sakreman Kò ak San Jezi a epi pou n’ eseye ansanm fè yon pataj sou chak aspè nou jwenn ladan yo.