DIMANCH 23

Koulè Vèt                         

12 ZYÈM DIMANCH ÒDINÈ ANE C

PREMYE MOSO LABIB

“Y’ap gade sila a yo pike a”.

NAN LIV PWOFÈT ZAKARI 12, 10-11

Men pawòl Granmèt la:

“M’ap vide yon lespri favè ak lapriyè sou kay David la ak sou moun ki abite Jerizalèm yo: y’ap gade m’, mwen menm yo te pèse a, y’ap kriye sou li, yon rèl tankou pou yon sèl pitit gason, y’ap plenn sou li, tankou yo konn plenn pou lanmò premye pitit gason.

Jou sa a, rèl la ap gran nan Jerizalèm, tankou rèl Adadremon nan plenn Megido a”.

Pawòl Granmèt la.

R/Mèsi Bondye, mèsi.

SÒM REPONS 62, 2. 3-4. 5-6. 8-9

R/ Nanm mwen swaf ou, Granmèt, Bondye mwen.

Bondye, se Bondye m’ ou ye. se kote ou m’ap veye depi granmaten. Nanm mwen swaf ou, chè mwen anvi ou.R.

Nan tè savann nan, ki sèk la, ki san dlo a, se konsa mwen parèt devan ou nan kay sakre a, pou m’ wè fòs ou ak bèlte ou. Sèke kè sansib ou pi bon pase lavi yo, bouch mwen ap fè lwanj ou.R.

Konsa m’ap fè konpliman pou ou nan lavi m’, o non ou m’ap leve men m’. Tankou ak vyann ak bon manje gra nanm mwen plen, ak pawòl fèt bouch mwen ap fè lwanj ou.R.

Paske ou pote m’ sekou, anba vwal zèl ou m’ap fete. Nanm mwen kole apre ou, men dwat ou soutni m’.R.

DEZYÈM MOSO LABIB

“Nou tout ki batize, nou abiye ak Jezikri”.

NAN LÈT APOT PÒL KI SEN, POU GALAT YO            3, 26 29

Frè m’ yo:

Nou tout nou se pitit Bondye gras a lafwa a, ki nan Jezikri a. Reyèlman vre nou tout ki batize nan Jezikri, nou abiye ak Jezikri. Pa gen kesyon Juif ni Grèk, nan pwen ni esklav ni moun lib, pa gen gason ni fi: sèke nou tout se yon sèl nou fè nan Jezikri.

Si nou pou Jezikri, konsa nou se ras Abraam, eritye daprè pwomès la.

Pawòl Granmèt la.

R/Mèsi Bondye, mèsi.

LEVANJIL

“Ou se Kris Bondye a.Pitit moun nan gen pou l’ soufri anpil”.

MEN BÒN NOUVÈL JEZIKRI A DAPRÈ LIK KI SEN 9, 18-24

Lè sa a:

Jezi t’ap lapriyè pou kont li, disip yo te avèk li. Li poze yo kesyon, li di: “Kilès foul yo di mwen ye?”

Yo reponn, yo di: “Jan Batis; dòt menm Eli; dòt ankò se youn nan pwofèt lontan yo ki leve”.

Jezi di yo: “Nou menm menm kilès nou di mwen ye?”

Simon Pyè pran lapawòl, li di: “Kris Bondye a”.

Jezi menm menase yo li pase yo lòd sevè pou yo pa di pèsònn sa, li di Pitit moun nan gen pou l’ soufri anpil, pou ansyen yo rejte l’, ni chèf prèt yo, ni pwofesè yo, l’ap mouri, men sou twazyèm jou a, l’ap tounen vin vivan.

Li t’ap di tout moun: “Si yon moun vle vin apre mwen, se pou l’ renonse pwòp tèt li, pou l’ pran kwa l’, chak jou, pou l’ suiv mwen. Reyèlman vre, moun ki vle sove lavi l’, l’ap pèdi l’: moun ki pèdi lavi l’ poutèt mwen, l’ap sove li”.

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON:Nanm mwen swaf ou Bondye tankou yon tè ki sèk! Se ak refren sa a frè m’/ sè m’ litiji jodi a, nan repons premye lekti a envite n’ medite. Veritab chemen konvèsyon ak sentete a se lè moun nan prè pou l’ antre anndan kè l’ pou l’ fè lapè ak Bondye, avèk pwòp tèt li epi avèk pwochen li! Pwofèt Zakari deja pale de etap sa a pèp Bondye a dwe rive ladan l’, pou l’ kapab benefisye tout favè Bondye li menm sèl bay sila yo ki konnen kòman pou yo rabese tèt yo, pou yo rekonèt peche yo epi pou yo vire fas yo nan direksyon Bondye lavi a. Nan lavi chak jou nou, nou gen anpil fason nou ye, fason n’ panse, fason n’ aji ki merite chanje. Vrè chanjman sa ap rive posib lè n’ kite Pawòl Bondye a oryante lavi nou, lè n’ deside mete lafwa n’ nan pwojè lavi li gen pou nou cha k’ epi pou tout moun.

Dezyèm moso labib la raple n’ nouvo idantite n’ genyen gras a lafwa n’ nan Pitit Bondye a. Nan batèm nan nou te mouri ak pwòp tèt pa nou pou n’ kapab viv pou Jezikri, nou te aksepte vin tounen manb Jezikri pou frè n’ ak se n’ yo, pou limanite; nou te aksepte rantre nan bèl reyalite lafwa sa a ki pouse n’ travay ansanm tankou frè ak sè pou n’ kapab temwaye prezans Jezikri nan mond sa a. Jan nouvo tèm plan pastoral ane 2013 la di n’ nan, se vrèman “nan lafwa epi nan fratènite n’ap ka bati kominote nou an”, n’ap ka chanje fas tè sa a. An nou, ansanm, kwape tout vye fòs lanmò ak divizyon ki vle mete n’ dozado epi fè n’ bliye sa nou ye. Ann mete tout bon jan eneji n’ yo ansanm pou n’ sèvi Bondye Vivan an nan lòt yo. Anfas yon sosyete ki divize, anfas anpil menas nou kontre nan diferant kominote legliz ki pouse n’ nan atitid endividyalis, nan aksyon egoyis, nan endiferans nan relasyon n’ youn ak lòt, ann aksepte kite Lespri lavi a soufle sou nou yon souf nouvo pou nou rive viv lafwa n’ epi temwanye fratènite nou an yon fason ki tou nèf. San volonte pèsonèl pou chanjman an epi san konkou Lespri Bondye nou p’ap ka rive nan vrè temwanyaj lavi a daprè Lespri Sen an. Se pou fòs Lespri Bondye a kase tout miray divizyon ak endiferans ki egziste nan lavi nou kòm kretyen epi pou renmen Bondye a n’ te resevwa nan lagras batèm nan fè n’ rive avanse pi fon nan bon jan aksyon ki kore reyalite lafwa n’ap preche a.

Levanjil lik la ede n’ rive viv yon reyalite ki kapital pou nou menm kretyen sou kesyon lafwa a. Reyalite a, se rive nan konesans Jezikri a, Pitit Bondye a, Kris la, Sila a ki bay lavi l’ pou limanite a. Jezi, pi devan pral devwale disip li yo kote li gen pou l’ bay lavi li, men sou twa jou l’ap sòti nan pami mò yo. Se yon reyalite ki envite n’ reflechi anpil pwop sans lavi nou, sou konvèsyon nou, sou fason n’ dwe mouri nou menm tou pou n’ ka viv pou li, Jezikri, menm jan li menm li te mouri epi li t’ap viv pou Bondye epi avèk li. Sa fè n’ antre nan kokenn chenn reyalite lavi nou kòm kretyen. Nou gen pou n’ bay pwòp lavi nou pou lòt yo, san n’ pa chache enterè patikilye n’ men pou n’ chache volonte Bondye a. Moun ki renmen lavi l’, l’ap pèdi l’; men sila k’ pèdi lavi l’ pou pote temwayaj renmen Bondye a pou limanite l’ap genyen l’ pou tout tan. Legliz, nou se pèp Bondye a, nou se tanp Lespri Sen an, nou se Kò Jezikri ki vivan nan mond sa a. Se pou Granmèt la ba nou fòs pou n’ vin tounen vrè temwen leve byen vivan l’ lan. Men pou n’ rive la a nou dwe pote kwa n’ chak jou dèyè li!

LAPRIYÈ: Granmèt, ou menm ki se Papa bon kè a, ou menm ki renmen nou chak epi ki devwale kè sansib ou an favè nou, tanpri, ede n’ kite Lespri w’ la anvayi nou depi kounye epi pandan tout rès tan n’ap pase sou tè a pou n’ ka tounen yon temwen lafwa a, yon temwen renmen an, yon temwen leve byen vivan w’ lan. Amèn

PWOPOZISYON: Pandan ane sa a ki konsakre ak lafwa epi ak fratènite a, bay tèt ou objektif pou w’ medite epi pou w’ kesyone chak aksyon w’ yo dekwa pou w’ rive viv pwòp idantite w’ nan fidelite a Kris la.