MADI 2

Koulè Vèt

PREMYE MOSO LABIB

“Granmèt la fè lapli souf ak dife tonbe sou Sodòm ak Gomò”.

NAN LIV LAJENÈZ 19, 15-29

Jou sa yo:

Mesaje yo fòse Lòt, yo di: “Leve, pran madanm ou ak de pitit fi ou genyen yo, pou ou pa peri, ou menm tou menm jan, nan krim Sodòm nan”. Kòm l’ap eseye kache, yo sezi men l’, ni men madanm li ak men de pitit fi l’ yo, paske Granmèt la te menaje l’.

Yo kondui l’ fè l’ sòti, yo mete l’ deyò lavil la; lè yo rive la, yo pale avèk li, yo di: “Sove lavi ou; pa gade dèyè ou, pa kanpe nan okenn rejyon alantou yo; men chape kò ou nan mòn nan, pou ou pa peri ou menm tou”.

Lòt di yo: “Tanpri, Granmèt mwen, kòm sèvitè ou jwenn favè devan ou, ou fè kè ou sansib anpil pou mwen, pou ou sove lavi m’; men, mwen pa kapab sove nan mòn nan, mwen pè pou malè pa sezi m’, pou m’ mouri. Gen lavil sa a tou pre, kote mwen kapab sove, li tou piti, m’ap sove ladan l’; èske li pa tou piti? Se konsa m’a viv!”

Li di l’: “Men, menm sou pwen sa a, mwen aksepte lapriyè ou yo, mwen p’ap detwi lavil la, sa ou plede pou li a. Fè vit, sove kò ou laba a, paske mwen p’ap kapab fè anyen joustan ou antre ladan li”. Se pou sa yo rele non vil sa a Segò. Solèy t’ap leve sou tè a, Lòt menm t’ap antre Segò.

Konsa Granmèt la fè lapli souf ak dife tonbe sou Sodòm ak Gomò sot nan syèl la, li detwi vil sa yo, ak tout rejyon alantou a, tout moun ki te abite vil yo ak tout plant tè a. Madanm Lòt gade dèyè l’, li vin tounen yon blòk sèl.

Abraam menm leve granmaten, kote l’ te ye anvan avèk Granmèt la, li gade Sodòm ak Gomò, ak tout tè rejyon sa a; li wè flanm k’ap monte sot nan tè a tankou lafimen k’ap sot nan founèz. Lè Bondye t’ap detwi vil rejyon sa a, li te sonje Abraam, li delivre Lòt sot nan kraze l’ap kraze vil yo kote li te abite a.

Pawòl Granmèt la.

R/Mèsi Bondye, mèsi.

SÒM REPONS 25, 2-3. 9-10. 11-12

R/ Kè sansib ou, Granmèt, li devan je m’.

Eseye m’, Granmèt, sonde m’; boule ren m’ ak kè m’. Paske kè sansib ou a li devan je m’, mwen mache nan verite w’ la.R.

Pa ranmase mwen ansanm avèk mechan yo, lavi m’ avèk moun san yo. Nan men yo se mechanste, men dwat yo plen kado.R.

Mwen menm menm se nan inosans mwen m’ap mache, delivre m’, pran pitye pou mwen. Pye m’ kanpe nan chemen dwat, nan reyinyon yo m’ap fè lwanj Granmèt la.R.

LEVANJIL

“Li leve, li kòmande van ak lanmè, vin gen yon gran kalmi”.

MEN BÒN NOUVÈL JEZIKRI A DAPRÈ MATYE KI SEN 8, 23-27

Lè sa a:

Jezi monte nan yon batiman, disip li yo suiv li. Yon gran tanpèt leve nan lanmè a, si tèlman, batiman an te kouvri ak lanm yo; li menm menm li t’ap dòmi. Disip li yo pwoche kote l’; yo reveye l’, yo di: “Granmèt, sove nou, n’ap peri”.

Jezi menm di yo: “Pouki sa nou pè a, lafwa nou piti?” Lè sa a atò, li leve, li kòmande van an ak lanmè a, vin gen yon gran kalmi.

Mesye yo sezi, yo di: “Kilès sila a, paske van ak lanmè obeyi li?”

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: Kretyen, annou fè yon ti reflechi sou bèl pawòl sa yo nou sot tande a. Se yon gwo chans nou genyen jounen jodi a paske n’ap tande Ganmèt la k’ap pale avèk nou, paske n’ap tande pawòl li a. Pawòl Bondye a se limiyè k’ap klere chemen nou lè fènwa vle anvayi lavi nou. Se pawòl ki ka ede lafwa nou vin pi fèm pou lespri nou pa twouble lè gwo tanpèt pwoblèm vle chavire bato lavi nou.

Nan Levanjil jounen jodi a nou wè apot yo ak Jezi ki te nan yon bato, epi gwo van te vle koule bato a. Nou wè tou koman apot yo te pè; nou wè jan yo te manke lafwa. Yo te pran kriye; yo te rele Jezi, epi Jezi te kalme tanpèt la, li te sove yo. Zanmi mwen, anpil fwa nan lavi nou, nou aji tankou apot yo. Anpil fwa nou manke lafwa. Se chak jou menm bagay sa ki te pase apot yo a ap pase nou. Anpil fwa lè moman fènwa yo rive nan lavi nou, nou kite laperèz anviyi nou. Anpil fwa lè gwo van tanpèt yo vle chavire bato lavi nou, lafwa nou febli epi nou bliye si Jezi la ansanm avèk nou. Nou bliye si se li ki kapitèn bato lavi nou. Jodi a frè m’ak sè m’ yo Granmèt la ap di nou menm sa li te di apot yo a : « poukisa nou pè, lafwa nou piti ». Apot yo tou ap pale avèk nou nan Levanjil la jodi a. Y’ap di nou pou nou pa fè lòt wout lè nou nan moman difil yo; se kot Granmèt la pou nou ale, se li menm pou nou rele paske se bò kote l’ sekou nou ye. Nan premye lekti a nou wè kijan Granmèt la te epanye moun ki te gen lafwa nan li yo nan vil Sodòm. Li te epanye Lòt ak fanmi li. Nou wè tou kisa ki te rive madanm Lòt paske li pa t’ swiv lòd Granmèt la te pase yo a.

Lafwa nou kòm kretyen ap fè nou antre chak jou pi plis nan Wayòm Granmèt la. Se gras ak lafwa a n’ap ka ret kole sou Granmèt la.

LAPRIYÈ : Bondye Granmèt, ou menm ki se Papa, men pitit ou yo k’ap lapriyè nan pye ou. Tanpri souple Papa, ba nou sa n’ap mande ou a, konsa n’a gen espwa antre nan peyi kote ou wa. Nou mande ou sa pa pouvwa Jezikri Granmèt nou an.

PWOPOZISYON : Kretyen, an nou priye Granmèt la avèk lafwa.