MADI 1

Koulè Blan

TERÈZ DE LANFAN JEZI KI SEN, Vyèj e savan sakre Legliz la

(Memwa)

PREMYE MOSO LABIB

“Men m’ap vide yon rivyè lapè sou li”.

NAN LIV PWOFÈT IZAYI 66, 10-14c

Fè kè nou kontan ansanm ak Jerizalèm, danse nan li, nou tout ki renmen l’ ; fè kè nou kontan avèk li anpil, nou tout ki t’ap kriye sou li. Se pou nou souse, pou nou plen ak richès konsolasyon l’, pou nou tire lèt, pou nou pran nan tout kalite glwa li avèk kè kontan.

Sèke men sa Granmèt la di : “Men m’ap vide tankou yon gran larivyè lapè sou li, m’ap vide glwa nasyon yo tankou yon ravin dlo k’ap anvayi l’ ; glwa sa yo, n’ap souse yo ; y’ap pote nou pou nou tete, y’ap karese nou sou jenou. Tankou yon manman k’ap karese pitit li, se konsa m’ap konsole nou, epi nan Jerizalèm n’ap konsole”.

N’ap wè, kè nou ap kontan, zo nou ap boujonnen tankou ti plant, sèvitè Granmèt yo ap rekonèt men l’.

Pawòl Granmèt la.

R/Mèsi Bondye, mèsi.            

SÒM REPONS 130, 1.2.3.

R/ Konsève nanm mwen nan lapè kote ou, Granmèt.

Granmèt, kè m’ pa gonfle,  je m’ pa leve; mwen pa mache nan gran aksyon, ni nan mèvèy ki depase m’.R.

Se tou kalm, se tou trankil mwen mete nanm mwen ; tankou yon ti bebe sou bra manman l’, tankou yon ti bebe, se konsa nanm mwen ye anndan mwen.R.

Se pou Izrayèl espere sou Granmèt la, depi koulye a epi jous pou tout tan.R.

“Si nou pa vin tankou ti moun piti, nou p’ap antre nan peyi wa syèl la’’.

MEN BÒN NOUVÈL JEZIKRI A DAPRÈ MATYE KI SEN 18, 1-4

Lè sa a, disip yo pwoche kot Jezi, yo di: “Kilès, ou kwè, ki pi gran nan peyi wa syèl la?”

Jezi rele yon ti moun piti, li mete l’ kanpe nan mitan yo, li di: “Amèn, mwen di nou: si nou pa konvèti pou nou vin tankou ti moun piti yo, nou p’ap antre nan peyi wa syèl la’’. 

Konsa tout moun k’ap rantre nan ti kondisyon moun li a tankou ti moun piti sa a, se li menm ki pi gran nan peyi wa syèl la”. 

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: Si nou pa vin tankou timoun piti, nou p’ap antre nan wayòm syèl la. Jodi a Legliz ap fè memwa Terèz Maten, sila yo rele Terèz de Lanfan Jezi, ki sen epi ki vyèj. Anpil fwa yo anplwaye tèm: Ti Terèz de lanfan Jezi; an fransè yo di :“Petite Thérèse de l´enfant Jésus”. Terèz n’ap sonje jodi a, se te yon mè Kamelit ki te viv yon vyep ti tan lavi relijyez nan yon monastè. Sante Terèz pa t’ pèmèt li bay anpil; epoutan li te bay tout sal te genyen pou sèvi lòt yo. Kòm yon mè kontanplativ, li te konn pase anpil tan ak Jezi nan  Sen Sakreman, nan fè adorasyon chak jou.

Sa se vrèman yon mistè; yon mè kontanplativ, Legliz deklare l’ patròn misyonè yo. Legliz pa twonpe fasil paske se fòs Lespri Sen an k’ap dirije. Terèz te pase anpil tan ap soufri, li pa t’ kapab ni mache ni travay; poutan chak jou diran plis pase yon ane li te monte ak desann macheskalye kouvan an pandan l’ t’ap trennen sou dèyè l’ depi nan maten rive jis nan aswè. Lè l’ fin desan mach la, anvan l’ monte l’ li te konn di: Granmèt, se pa paske m’ kapab, men mwen fè l’ pou misyonè ki pi lwen yo, sitou pou sa k’ap viv yon vi difisil nan misyon kote yo ye a.

Gen yon gwo relasyon ant memwa jodi a ak levanjil la; Terèz de lanfan Jezi te chwazi fè yon konfyans total a Granmèt la epi tounen pi piti chak jou pandan l’ te abandone l’ nan men Granmèt la. Terèz te viv yon bèl vi depi nan bagay ki pi piti rive jis nan gwo, antan li te montre ke Se Bondye li mete pi wo pase tout bagay. Nan yon liv kote Terèz eksplike lavi l’, (tit la se: Histoire d’une âme), ki tradui nan plis pase 60 lang, li envite nou konprann ke nenpòt ti chemen ki trase a pati de levanjil la, se yon wout ki ka mennen nenpòt moun nan sentete.Levanjil jodi a di nou si nou pa vin tankou yon timoun piti nou p’ap antre nan wayòm Bondye a. Annou wè ansanm kèk karakteristik yon timoun piti. Li gen konfyans nan manman l’ ak papa l’, li obeyi paran l’ epil respekte yo, li pale verite, li toujou swaf lanmou paran l’, li fè volonte paran l’, gen anpil lòt karakteristik toujou men an nou rete sou sa yo, konprann ke nou se yon timoun epi paran nou se Bondye, Jezi ak mari. Nou met konfyans nou nan yo, nou respekte yo, nou fè sa Bondye mande nou fè, nou abandone nou nan lanmou yo; mwen asire w’ si ou menm ak mwen menm gen atitid sa, nou deja eritye wayòm syèl la.

LAPRIYÈ: Bondye, ou menm ki prepare peyi wa w’ la pou pòv yo ak piti yo, fè nou suiv tras Terèz ki sen avèk konfyans, pou, gras a priyè l’, ou devwale glwa tout tan ou nan nan nou. Pa pouvwa Jezikri.

PWOPOZISYON: Mande Bondye gras pou w’ ka obeyi pawòl li a epi fè volonte l’.