MÈKREDI 2

Koulè Blan

ANJ GADYEN YO KI SEN

(Memwa)

PREMYE MOSO LABIB

“Anj mwen an ap mache devan ou”.

NAN LIV EKZÒD 23, 20-23a

Men pawòl Granmèt la :

“Men m’ap voye anj mwen an, k’p mache devan ou, l’ap pwoteje ou sou wout la, l’ap fè ou antre nan kote m’ te pare a. Fè atansyon li, koute vwa l’, pa konprann pou ou meprize l’, paske li p’ap padonnen ou si ou fè peche, epi li gen non mwen nan li. Si ou koute vwa l’, epi ou fè tout sa m’ di, m’ap ènmi ènmi ou yo, m’ap kontrarye moun k’ap kontrarye ou yo. Anj mwen an ap mache devan ou”.

Pawòl Granmèt la.

R/Mèsi Bondye, mèsi.            

SÒM REPONS 90, 1-2. 3-4. 5-6. 10-11

R/ Li pase zanj li yo lòd sou ou, pou yo pwoteje ou nan tout wout ou yo.

Moun ki abite nan pwoteksyon Sa a ki anwo nèt la,  li rete anba lonbraj Sa a ki gen tout pouvwa a. Li di Granmèt la: “Kachèt mwen  ak fòs mwen, Bondye mwen, mwen espere nan ou”.R.

Sèke li menm l’ap delivre ou sot nan pyèj chasè yo ak nan pawòl mechan. Ak zèl li yo l’ap kouvri ou, anba plim zèl li w’ap kache.R.

Zam ak pwoteksyon, se verite l’ la ; ou p’ap pè bagay k’ap fè moun pè nannuit, devan flèch k’ap vole lajounen, devan epidemi k’ap mache nan fènwa, devan sa a k’ap fè ravaj gwo midi.R.

Malè a p’ap pwoche kote ou, chatiman p’ap pwoche tant ou a. Paske l’ap pase zanj li yo lòd sou ou, pou yo pwoteje ou nan tout wout ou yo.R.

LEVANJIL

“Zanj yo tout tan ap gade fas Papa m ki nan syèl la”.

MEN BÒN NOUVÈL JEZIKRI A DAPRÈ MATYE KI SEN 18, 1-5. 10

Lè sa a disip yo pwoche kot Jezi, yo di:

“Kilès, ou kwè, ki pi gran nan peyi wa syèl la?”

Jezi rele yon ti moun piti, li mete l’ kanpe nan mitan yo, li di: “Amèn mwen di nou: si nou pa konvèti pou nou vin tankou ti moun piti yo, nou p’ap antre nan peyi wa syèl la.  Konsa tout moun k’ap rantre nan ti kondisyon moun li a tankou ti moun piti sa a, se li menm ki pi gran nan peyi wa syèl la. Moun k’ap resevwa youn nan ti piti sa yo o non mwen, se mwen menm l’ap resevwa.

Atansyon pou nou pa meprize youn nan ti piti sa yo; mwen di nou reyèlman, zanj pa yo nan syèl la, se tout tan y’ap gade fas Papa m’ ki nan syèl la”.

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: Bèf san ke, Bondye pouse mouch pou li. Timoun ak moun ki pi piti, ki pi vilnerab yo, Bondye voye zanj li yo pou yo mache ansanm avèk yo, pou yo pwoteje yo. Men si yon moun konnen se li menm ki konnen, si yon moun ogèye, si l’ meprize sa k’ pi piti yo, si l’ konn ap pete fyèl moun, moun sa a li menm, li gen lè panse li pa bezwen Bondye.  Li konnen li fò, epoutan li fèb, paske li pa aksepte kite yon lòt moun ede l’.  Moun sa a p’ap janm kontan, li p’ap janm alèz.

Se nan sans sa Jezi di konsa, sa k’ pi piti, se li k’ pi gran. Paske se pi piti a menm ki toujou konte sou Granmèt la, epi Granmèt la p’ap janm lage l’.  Pwoblèm li mèt pa piti, men li pa janm bliye si gras Letènèl la pi gwo pase tout pwoblèm.  Yo mèt ap plede pèsekite l’, kè l’ p’ap sote, paske li konnen li pa pou kò li, li gen zanj Papa Bondye toupwisan an k’ap mache avè l’, k’ap pwoteje li.

Se nan sans sa Jezi ap envite nou tounen timoun. Li mande nou chanje mantalite nou, sispann fè jalouzi, sispann sèvi ak vyolans, sispann imilye moun. Li mande nou louvri kè nou, mete tout lespwa nou nan Granmèt la, ki konnen tout bagay. Si nou fè sa, n’ap jwenn kè poze.

Pou n’ chanje kè nou, fò n’aprann nan men sa k’ pi piti pase nou yo. Se ti moun ki poko konn anyen, ki ka fè n’ konprann anpil bagay.  Se sa k’ pi malere yo ki ka fè n’ jwenn richès levanjil la. Se moun sosyete a mete a kote, moun yo pi meprize yo, ki kapab montre nou kijan Jezi akeyi nou. 

Fò n’ al jwenn moun sa yo, paske se yo menm ki ka aprann nou mete konfyans nou nan Granmèt la.  Se yo menm k’ap aprann nou kite zanj Bondye a kondwi nou. Se lè n’ mache ansanm avèk yo, n’ap rive nan kè poze ak kè kontan.

LAPRIYÈ: Bondye, depi davans, yon jan ki depase mezi espri nou, ou te voye zanj ou yo ki sen yo pou pwoteje nou, tanpri, nou menm k’ap priye ou, fè nou favè pou nou toujou jwenn defans nou nan pwoteksyon yo, epi pou nou jwi ansanm avèk yo pou tout tan. Pa pouvwa Jezikri.

PWOPOZISYON: Ki sa m’ krent, ki sa m’ pè, nan lavi mwen ?  Èske m’ mete konfyans mwen nan Bondye ?