VANDREDI 27

Koulè Blan

VENSAN DE PÒL KI SEN, Prèt

(Memwa)

PREMYE MOSO LABIB

“Se sa k’ fèb sou tè a Bondye chwazi”.

NAN PREMYE LÈT APOT PÒL KI SEN, POU KORENTYEN YO 1, 26-31

Nou menm yo rele a, gade kondisyon nou: nan pwen anpil ki gen sa moun yo rele sajès, nan pwen anpil ki gen pouvwa, pa gen anpil ki nan gran ras.

Men sè sa k’ fou sou tè a Bondye chwazi, pou l’ fè moun sajès yo wont; se sa k’ fèb sou tè a Bondye chwazi, pou l’ fè sa k’ fò yo wont; se sa k’ san konsiderasyon ak sa yo meprize sou tè a Bondye chwazi, ak sa k’ pa anyen, pou l’ detwi sa k’ kichòy yo, pou okenn chè pa fè grandizè devan fas li.

Se li menm ki fè nou kichòy nan Jezikri, Jezikri sa a ki vin tounen pou nou sajès ki sòti nan Bondye ak jistis ak sa k’ap fè nou vin sen an, ak delivrans; konsa, daprè sa k’ ekri a: “moun k’ap leve tèt li, se nan Granmèt la pou l’ leve tèt li”.

Pawòl Granmèt la.

R/Mèsi Bondye, mèsi.            

SÒM REPONS 111, 1-2. 3-4. 5-7a. 7b-8.9

R/ Ala kontantman pou moun ki krenn Granmèt la.

Ala kontantman pou moun ki krenn Granmèt la, ki met plezi l’ nèt nan lòd li yo. Desandans li ap gen pouvwa sou tè a, ras moun kòrèk yo ap beni.R.

Glwa ak richès nan kay li, jistis li ap rete pou tout tan gen tan, Limyè l’ ap leve nan fènwa, pou moun kòrèk yo, li sansib, li pran pitye, li kòrèk.R.

Ala kontantman pou moun sa a ki pran pitye, ki prete, ki regle zafè l’ yo kòrèk, paske se pou tout tan li p’ap souke.

Moun ki kòrèk la, y’ap sonje l’ tout tan, li p’ap pè, lè l’ tande move nouvèl.R.

Kè l’ pare, li espere nan Granmèt la, kè l’ asire, li pap pè, joustan li meprize ènmi l’ yo.R.

Li separe, li bay pòv yo; jistis li rete pou tout tan gen tan, kòn li ap leve nan glwa a.R.

LEVANJIL:

MEN BÒN NOUVÈL JEZIKRI A DAPRÈ MATYE KI SEN 9, 35-38

Jezi t'ap mache nan tout lavil yo ak tout ti bouk yo. Li t'ap montre moun yo anpil bagay nan sinagòg yo. Li t'ap fè konnen Bòn Nouvèl peyi kote Bondye Wa a. Li t'ap geri tout kalite maladi ak tout kalite enfimite. Lè Jezi wè tout bann moun sa yo, kè l' fè l' mal pou yo paske li wè yo te bouke, yo te dekouraje, tankou yon bann mouton san gadò. Lè sa a, li di disip li yo: Rekòt la anpil, men manke travayè pou ranmase l'. Mande mèt jaden an pou li voye travayè nan jaden l' lan.

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: N’ap sonje jodi a youn nan zanmi Bondye yo ki nan syèl la, sila a yo rele Sen Vensan de Pòl, yon prèt ki te bay Bondye kè li e ki te mete tout li menm, tout enèji li nan travay Granmèt la. Se yon moun ki te pran konsyans Bondye te renmen li, li te kite Bondye gade li, li te koute ti pawòl Granmèt la tedi li an sekrè.  Se konsa li te kite lanmou Bondye transfòme li pou li te kapab yon siy wayòm li an nan mond n’ap viv la. Se tout moun Bondye rele pou antre nan bèlte li a, men li pa ba tout moun yon sèl misyon, li bay chak moun travay p[a yo. Si tout moun te gen yon sèl misyon bagay la pa t’ap enteresan. Imajine yon sosyete kote tout moun ta gen menm pwofesyon! Pa ekzanp, yon sosyete kote tout moun se agwonòm, oubyen tout moun se enjenyè oubyen tout moun se mason, oubyen tout moun se ebenis…Vrèman sa pa t’ap enteresan. Se poutèt sa Bondye bay plizyè kalite don, Lespri Sen bay plizyè kalite kado. Sa ka rive yon moun resevwa plizyè talan men li pa devlope tout menm jan. Pa ekzanp yon moun kapab medsen men li gen kapasite tou pou li travay latè, menm si li pa fè sa trè byen. Apot Pòl ap di nou tout bagay nou resevwa yo, se yon gras, se yon favè Bondye fè nou, paske lè Bondye bay yon moun kichòy, se pa merit moun nan ki motive Bondye ba li li, men se fòs renmen Bondye a k’ap aji; se yon renmen san patipri, yon renmen san ,mezi, yon renmen san kondisyon.

Apot la ap di nou sa ki foli pou mond lan, li kapab sajès pou Bondye. E sa ki sajès mond lan, se kapab “foli” pou Bondye. Poukisa? Ebyen, se paske Bondye pa wè bagay yo menm jan ak nou, epi li pa nan menm kategori ak nou. Nou menm moun, nou gade e nou jije tout bagay daprè aparans, men Bondye li menm li jije moun daprè dimansyon kè yo. Nou menm moun nan sitiye nan tan ak nan yon espas, nou kapab di nou gen tèl laj (pa ekzanp 20 lane), n’ap viv tèl kote (pa ekzanp Sen Domeng); okontrè, Bondye li menm, yon jou ak  1000 lane se menm bagay pou li.  Paske li se mèt tan al espas la. Sa fè nou pa kapab di men Bondye isit la oubyen men li laba a!  Kidon Bondye etènèl; se pou sa gen moun ki rele li Letènèl, sa vle di sila ki te la, ki la e k’ap toujou la. Li ta bon si nou ta kapab kore nou sou Bondye sa, paske, tankou sòm 111 la di: se kontantman pou moun ki krenn Granmèt la. Levanjil la di nou kè Jezi fè l’ mal, paske li wè moun yo dekouraje, yo dezole, yo tankou mouton san gadò. Kidonk Jezi revele li kòm Bon Gadyen an, nou menm nou se mouton an.Puiske nou se mouton, ann fè nou dosil nan men li, pou li kapab kondui nou nan bon patiraj la, kote dlo a koule pi fre a. Nou sèten li p’ap abandone nou pou vòlè a (Satan) pa pase pran nou.

LAPRIYÈ: Bondye, ou menm ki te plen prèt Vensan ki sen avèk fòs apot yo pou sove pòv yo avèk fòmasyon prèt yo, tanpri, fè nou cho ak menm lespri sa a, pou nou renmen sa l’ te renmen, pou nou reyalize sa l’ te anseye. Pa pouvwa Jezikri.

PWOPOZISYON: Si ou tande Bondye ap rele ou jodi a pou travay nan rekòt li a, pa fèmen pòt kè ou, paske manke travayè. Ankouraje tout jèn ou konnen ki vle fè pè oubyen mè, oubyen yon pwofesyon kèlkonk.