VANDREDI 15

Koulè Vèt

PREMYE MOSO LABIB

“Si yo kapab sonde bagay tan sa a, kijan fè yo pa kapab jwenn Granmèt tan sa a?”

NAN LIV SAJÈS LA 13, 1-9

Tout moun ki pa gen syans Bondye a nan yo, se vid yo vid; apati sa yo wè ki bon, yo pa t’ kapab konnen sa a ki toujou la a; antan yo konsidere travay li, yo pa rekonèt sa a ki fè yo a. Men se swa dife, swa van, swa van leje, swa mouvman zetwal yo, swa fòs dlo, swa solèy ak lalin, se sa yo konsidere kòm dye k’ap dirije fas tè yo.

Si yo pran plezi ap gade glwa sa yo wè a, e poutèt sa yo konsidere yo kòm dye, se pou yo konnen kijan mèt bagay sa yo pi bèl toujou; sèke sa a ki fè glwa a, se li menm ki fè tout bagay sa yo. Oubyen, si yo sezi poutèt fòs avèk aktivite bagay sa yo, se pou yo konnen, apati bagay sa yo, kijan sila a ki fè bagay sa yo, li gen plis fòs pase yo. Reyèlman apati grandè ak glwa kreyati a, yo kapab wè avèk konesans yo sila a ki kreye yo a.

Sèlman moun sa yo, se yon ti kras koreksyon yo merite, paske petèt yo twonpe chemen antan y’ap chèche Bondye epi antan yo anvi jwenn li. Sèke, pandan yo vlope nan travay li yo, y’ap chèche, epi yo gen konviksyon yo rive jwenn, paske sa yo wè a yo bon.

Sèlman nou repete l’, menm yo menm yo pa inosan. Paske si yo te kapab konnen tèlman bagay pou yo sonde syèk tan an, kijan fè yo pa t’ jwenn Granmèt tan sa a pi fasil?

Pawòl Granmèt la.

R/Mèsi Bondye, mèsi.            

SÒM REPONS: 18, 2-3. 4-5

R/ Syèl yo ap rakonte glwa Bondye.

Syèl yo ap rakonte glwa Bondye, travay men l’, platfòm syèl la ap anonse l’. Jou ap deklare pawòl bay jou, nannuit ap montre syans bay nuit.R.

Pa gen langaj ni pawòl pou yo pa konprann vwa yo. Sou tout tè a bwi vwa yo sòti, jous nan limit tè a pawòl yo rive.R.

LEVANJIL

“Jou Pitit moun nan ap devwale sa l’ ye a”

MEN BÒN NOUVÈL JEZIKRI A DAPRÈ LIK KI SEN 17, 26-37

Lè sa a: Jezi di disip li yo:

“Jan sa te rive nan jou Noe yo, se konsa tou sa ap fèt nan jou Pitit moun nan; yo t’ap manje, yo t’ap bwè, yo t’ap marye, ni gason ni fi, jous jou Noe antre nan Ach la; delij la rive, li detwi yo tout.

Se menm jan tou, jan sa te rive nan tan Lòt la: yo t’ap manje, yo t’ap bwè, yo t’ap achte, yo t’ap vann, yo t’ap plante, yo t’ap bati; jou Lòt kite Sodòm nan, yon lapli dife ak souf sot nan syèl la, li detwi yo tout. Se konsa sa ap fèt jou Pitit moun nan ap devwale sa l’ ye a.

Jou sa a, moun k’ap sou tèt kay, si l’ gen afè l’ nan kay la, li pa bezwen tounen dèyè. Sonje madanm Lòt la. Moun k’ap chèche sove lavi l’, l’ap pèdi l’; se moun k’ap pèdi l’, k’ap jwenn li nèt ale.

Mwen di nou: nan nuit sa a, ap gen de moun nan yon sèl kabann: y’ap pran youn, y’ap kite lòt la; ap gen de moun k’ap moulen ansanm: y’ap pran youn, y’ap kite lòt la; ap gen de moun nan jaden: y’ap pran youn, y’ap kite lòt la”.

Yo pran lapawòl, yo di l’: “Ki kote, Granmèt?”

Li di yo: “Kote kò a ap ye a, se la èg yo ap rasanble”.

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: Nan kòmansman liv sen Ogisten ki rele Konfesyon Yo, li di: “Ou fè nou pou ou Granmèt, e kè nou ap toujou rete enkyè toutotan li poko repoze nan ou”. Nou menm kòm moun nou toujou enkyè, nou toujou a la rechèch, nou anvi rantre an relasyon ak yon fòs ki pi wo pase nou, nou gen yon swaf espirityèl nan nou. Nan tan lontan, anpil nan moun yo te konn adore solèy, lalin, zetwal, pye bwa, sous dlo, etc… yo te pran bagay sa yo ki Bondye. Menm jan an tou jounen jodi a jenerasyon sa a gen yon gran swaf ki abite li, sa moun yo bay plis enpòtans se ekonomi, plezi, gwo teknoloji, bri, etc… Se vre gen kèk ti satisfaksyon nan bagay sa yo, men malerezman se bagay pasajè, toujou gen yon gran vid ki rete nan moun nan ki pa janm konble paske tout bagay sa yo se tankou mwayen ki ta dwe itilize pou apwoche nou de Otè ki kreye yo a oubyen ki bay entelijans pou envante yo a. Se pou sa liv La Sajès la ak Levanjil la envite nou aprann gade tout sa ki nan kreyasyon an ak yon lòt rega; nan langaj konsil Vatikan II nou ka di se pou nou aprann li siy tan yo, kite Lespri Bondye a dirije nou pou nou kapab viv eksperyans espirityèl la ak Vrè Bondye a. Nan sans sa a li enpòtan pou nou fè yon konvèsyon enteryè pou nou resantre lavi nou nan Jezikri li menm ki prensip e fondman lavi nou. Sen Inyas de Loyola di nou se pou nou aprann chèche e jwenn Bondye nan tout bagay. Sa vle di se itilize tout sa Bondye mete o sèvis nou kòm moun pou nou rantre an kontak avèk li, san nou pa bay bagay sa yo plis enpòs ke Bondye. Sa vle di se sèl nan Jezi nap rive nou kontanple glwa Bondye a e se li k ap fè kè nou poze.

LAPRIYÈ: Bondye ou menm ki kreye tout bagay, tanpri ede nou chèche e dekouvri volonte w’ nan tout bagay ou mete o sèvis nou yo. Ban nou fòs pou nou itilize yo kòm mwayen e non kòm fen, konsa n’ap kapab ba w’ tout lonè, lwanj ak laglwa paske se ou menm ki prensip e fondman lavi nou! Amèn!

PWOPOZISYON: M’ap pran sanm pou m’ kontanple lanati, pou m’ chèche e jwenn Bondye nan tout bagay. M’ap bay Bondye glwa pou bèl mèvèy kreyasyon an. M’ap rete atantif a siy tan yo nan menm Lespri Konsil Vatikan II a, epi m’ap priye Bondye pou l’ ban m’ fòs Lespri Sen an pou m’ kapab gen fòs pou m’ fè volonte l’ nan lavi m’.