Koulè Vèt
PREMYE MOSO
LABIB
« Nou mande,
nou pa jwenn, paske nou mande mal ».
NAN LÈT APOT JAK KI SEN 4, 1 10
Nou menm mwen renmen anpil la :
Kot lagè ak batay sòti nan nou an? Èske se pa akoz lanvi nou, k’ap
batay nan manb nou yo? Nou anvi, epi nou pa genyen: n’ap touye. N’ap fè jalouzi
epi nou pa jwenn, n’ap batay epi n’ap fè lagè epi nou pa genyen, paske nou pa
mande. Nou mande, men nou pa jwenn, paske nou mande mal, pou nou
depanse pou lanvi nou.
Nou menm ki nan adiltè a, èske nou pa konnen si nou fè
zanmi ak tè sa a, nou vin ènmi Bondye ? Moun ki vle
zanmi tè sa a, li fè tèt li vin ènmi Bondye. Èske nou kwè se
pou bon tan sa k’ ekri a di : « Espri ki abite nan nou an, l’ap chèche
jwenn sa l’anvi a » ? Men li bay yon pi gran gras ; se pou sa li
di : « Bondye met antrav kont sa ki kwè yo plis pase lòt yo ; sa
k’ konsidere yo pa anyen yo, se yo menm li bay gras ».
Mete nou anba lòd Bondye, fè fòs kont dyab la, l’ap kouri
sot kote nou. Pwoche kot Bondye, l’ap pwoche kote nou. Netwaye men nou, nou menm
ki nan peche ; pwòpte kè nou, nou menm ki gen kè doub. Konsidere mizè nou,
pran dèy, kriye. Fè plezi nou an tounen rèl dèy, fè kè kontan nou an tounen lapenn.
Bese tèt nou devan Granmèt la, l’ap leve nou anlè.
Pawòl Granmèt la.
R/ Mèsi
Bondye, mèsi.
SÒM REPONS 54,
7-8. 9-10a. lOb-lla. 23
R/ Lage tèt chaje ou sou Granmèt la, se li
menm k’ap okipe ou.
Mwen te di : « Kilès k’ap ban m’ zèl tankou
toutrèl, m’a vole, m’a repoze? Men, m’ap sove kò m’ byen lwen, m’ap rete nan dezè
a ».R.
M’ap tann sa a k’ap sove m’ nan, anba souf loraj la ak
tanpèt la. Granmèt, gaye, separe lang
yo.R.
Sèke mwen wè mechanste ak jalouzi nan lavil la. Lajounen
ak nannuit y’ap fè wonn li sou miray li yo.R.
Jete tèt chaje ou sou Granmèt la, se li menm k’ap okipe
ou ; li p’ap kite moun kòrèk la nan boulvès tout tan.R.
LEVANJIL
« Y’ap renmèt
Pitit moun nan. Si yon moun vle vin premye, se pou l’ vin tounen dènye nan yo
tout ».
MEN BÒN NOUVÈL JEZIKRI A DAPRÈ MAK KI SEN 9,30-37
Lè sa a :
Jezi pati kite mòn nan, ansanm ak disip li yo, yo t’ap
travèse Galile a, li pa t’ vle pèsòn konnen.
Li t’ap anseye disip li yo, li t’ap di yo : « Y’ap
renmèt Pitit moun nan nan men lèzòm, y’ap touye l’, l’ap mouri, sou twazyèm jou
a l’ap leve ». Men yo menm yo pa t’ konprann pawòl la, epi yo te pè poze l’
kesyon.
Yo rive Kafanawòm. Pandan yo te nan lakay la, li t’ap poze
yo kesyon : « Ki sa nou t’ap diskite sou wout la » ? Men yo
menm yo te pe bouch yo ; paske sou wout la yo t’ap diskite kilès nan yo ki
pi gran.
Li chita, li rele douz yo, li di yo : « Si yon
moun vle vin premye, se pou l’ vin dènye nan pami tout moun, se pou l’ vin
sèvitè tout moun ».
Li pran yon ti gason, li mete l’ kanpe nan mitan yo. Li
anbrase l’, li di yo: «Nenpòt ki moun ki resevwa kalite ti moun sa yo o non mwen,
se mwen menm li resevwa; epi tout moun ki resevwa m’, se pa mwen menm li resevwa,
men se sa a ki voye m’ nan».
An nou fè lwanj ak konpliman
pou pawòl Bondye a.
R/ Lwanj
pou ou, Granmèt.
REFLEKSYON: Nan premye lekti a nou
dekouvri yon pawòl kle pou nou, yon mesaj ki pou ede nou oryante pwòp lavi nou
daprè sa Bondye mande nou. Se nan non Jezi nou te resevwa padon pou peche n’ yo
ak asirans yon lavi nouvo nan Granmèt la. Pou nou kapab rive jwi nan bèlte
Granmèt la, nou dwe mete espwa nou nan Pawòl li, konbat tout sa k’ pa bon nan
lavi nou,tout vye santiman nou yo, reziste ak dyab la ki vle mete n’ dozado ak
Granmèt la, dekwa pou n’ pèdi plas nou nan Syèl la.
Lavi nou kòm
kretyen ekzije nou batay kont tout sa k’ mal, pou n’ chèche viv daprè sa ki
dwat, sa ki kòrèk. Petèt pou anpil nan nou menm sa pa fasil, tou depann de fòs
volonte chak moun ak mwayen chak moun pran pou evite sa k’ kontrè ak zèv lafwa
a. Sa ki enpòtan se pou konprann plan
Bondye genyen pou l’ sove a, se pou tout
moun san eksepsyon. Chak moun dwe lib, konsyan de sa li vle viv, sa li ye, kote
li prale, nan kilès li mete lafwa li. Pawòl Bondye a envite n’ fè yon chanjman
nan lavi nou ki fè n’ retire kò nou nan tout vi ki kontrè ak sa Bondye mande nou
nan pawòl li. Nou dwe sonje pawòl Granmèt la lè l’ di nou: «kote trezò nou, se
la kè nou ye»!
Mesaj Apot Jak
la envite nou aprann rekonèt fot nou yo epi fè efo ki nesesè pou n’ sòti ladan
yo pandan n’ap louvri kè n’ pi gran pou n’ akeyi volonte Bondye epi kite Lespri
Sen an dirije lavi nou. Nan dimansyon nou louvri kè nou pou n’ akeyi padon
Bondye a nan yon kè ki sensè, se nan dimansyon sa a Granmèt la va konble nou ak
benediksyon.
Nan levanjil la
Jezi fè anonse li gen pou l’ soufri, pou l’ mouri epi pou l’ leve byen vivan
sou twazyèm jou a. Disip li yo pa t’ fin konprann sa l’ t’ap di a, yo prefere
fè silans sou koze sa a. Anpil fwa nou menm tou sa konn rive nou konprann plan
delivrans Bondye a fason pa nou. Anpil fwa nou mande Bondye tout favè ki
genyen, men anpil fwa nou pa disponib pou n’ aksepte soufrans ak rejè nou ka
rankontre nan lavi nou pandan nou aji ak tout konviksyon nou. Jezi mande n’
chanje fason nou konprann bagay yo, pou n’ chanje mòd relasyon n’ genyen ak lòt
yo; li mande n’ pou n’ fè l’ konfyans nèt ale epi pou n’ kwè nan mesaj li pote
pou nou an.
Pou sa, li mande
n’ aprann fè silans nan kè nou ak nan lavi nou pou n’ konnen, reflechi sou sa l’
mande n’ yo epi pou n’ yon fason ki konfòm ak volonte Bondye. Li envite nou
aprann aji nan imilite, sispann fè grandizè nan lavi nou, mete n’ nan sèvis lòt
yo, angaje nou pou transfomasyon sosyete nou, pou konvèsyon kè yo. Lavi nou kòm
disip misyonè Jezikri dwe tounen yon aktyalizasyon mèvèy pasyon ak leve vivan
Jezikri a, Mèt nou, Sila a k’ap viv nan nou chak, Sila a k’ap kontinye reyalize
mèvèy delivrans li an pou tout moun.
LAPRIYÈ: Granmèt, tanpri souple, ede n’ aprann mize lavi nou sou pawòl ou
yo, dekwa pou n’ benefisye tout byen ou pare pou moun ki kwè nan ou e ki fè sa
ou mande. Amèn.
PWOPOZISYON: Jodi a, ann chèche dekouvri
difikilte n’ konn rankontre nan sosyete a pa rapò ak yon dezizyon n’ gen pou n’
pran pou fè eklate bèlte Bondye. Chita an gwoup pou n’ aprann site yo, epi wè
ki limyè n’ jwenn nan pawòl Bondye a pou n’ afwonte yo.
No hay comentarios:
Publicar un comentario