MÈKREDI 19

Koulè Vèt

PREMYE MOSO LABIB

« Se pou nou fè sa pawòl la mande a, se pa pou nou kontante nou koute l’ sèlman ».

NAN LÈT APOT JAK KI SEN 1, 19-27

Nou konnen, frè m’ yo mwen renmen anpil la. Se pou tout moun rapid pou koute, men pou l’ pran tan anvan l’ pale, pou l’ pran tan anvan l’ fè kòlè ; sèke kòlè moun nan pa regle jistis Bondye. Se pousa, se pou nou rejte tout kalite sa k’ pa pwòp ak mechanste k’ap debòde, pou nou resevwa avèk dousè pawòl la ki plante anndan nou an, ki kapab sove nam nou yo.

Se pou nou fè sa pawòl la mande a, se pa pou nou koute l’ sèlman, antan n’ap twonpe tèt nou, paske, si yon moun ap koute pawòl la epi li pa fè sa l’ mande a, moun sa a sanble ak yon moun ki fin gade figi l’ genyen depi nesans li a nan yon glas; li ekzamine l’ epi li pati, menm lè a li bliye kijan l’ te ye. Men moun ki ekzamine nan lalwa libète a ki kòrèk la, epi ki rete ladan l’, ki pa koute pou l’ bliye, men ki fè aksyon an, moun sa a ala kontantman pou li nan aksyon l’.

Si yon moun konprann li zanmi Bondye, san l’ pa mèt fren nan lang li, men antan l’ap twonpe kè l’, moun sa a relijyon l’ nan pa sèvi anyen. Relijyon ki nèt san tach kot Bondye ak Papa a, men li : vizite òfelen yo ak vèv yo nan tray yo, kenbe tèt ou nan tach parapò a syèk sa a.

Pawòl Granmèt la.

R/ Mèsi Bondye, mèsi.        

SÒM REPONS 14, 2-3ab. 3cd-4ab. 5

R/ Ki moun k’ap repoze sou mòn ou an ki sen an, Granmèt ?

Moun k’ap mache san fot, k’ap fè jistis ; k’ap pale verite nan kè l’, ki pa fè rizèz ak lang li.R.

Li pa fè pwochen l’ mal, li pa fè pwochen l’ afwon. Li konsidere mechan an kòm anyen devan je l’, men li fè lwanj pou sa yo ki respekte Granmèt la.R.

Moun ki pa prete lajan ak enterè, ki pa aksepte kado sou do inosan. Moun ki aji konsa, li p’ap souke menm.R.

LEVANJIL

« Avèg la geri atèl pwen li te wè bagay byen klè ».

MEN BÒN NOUVÈL JEZIKRI A DAPRÈ MAK KI SEN 8, 22-26

Lè sa a :

Jezi rive Betsayid avèk disip li yo : yo mennen yon avèg ba li, yo t’ap lapriyè l’ pou l’ touche l’.Li pran men avèg la, li fè l’ sòti andeyò bouk la ; li krache nan je l’, li poze men l’ sou li, li mande l’ si l’ te wè kichòy. Li kòmanse wè, li di: «Mwen wè moun yo tankou se pye bwa k’ap mache».

Aprè sa li poze men l’ sou je l’ ankò; li kòmanse wè, li vin geri, atèl pwen li te wè tout bagay byen klè.

Li voye l’ lakay li, li di l’: «Ale lakay ou, epi si ou antre nan bouk la, piga ou di pèsòn sa».

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: Apot Jak, atravè premye moso Labib la, ap di nou ki atid nou dwe genyen lè n’ap dyaloge, lè n’ap kominike ak lòt moun. Apot la di nou: «Se pou tout moun rapid pou koute, men pou l’ pran tan anvan l’ pale, pou l’ pran tan anvan l’ fè kòlè ; sèke kòlè moun nan pa regle jistis Bondye.»

Vrèman vre, anpil fwa n’ap dyaloge, nou vle di tout pawòl, tout sa ki vini nan panse nou, menm sa ki pa gen a wè ak sijè n’ap debat la. Nou sèlman kwè nou gen dwa pou nou pale men nou pa gen tan pou nou koute, nou pa bay lòt la chans pou li eksprime li. Sa se yon mank respè pou sa lòt la ye ak pou sa l’ap di nou. Si mwen menm mwen pa pran tan pou mwen koute lòt la, kominikasyon an pa gen sans, dyalòg la pa dinamik. Jodi a Apot Jak ap di nou fòk nou pi rapid pou nou koute olye pou n’ap kouri pale ; fòk nou apran mete fren nan lang nou, pou nou pa kouri pale tout pawòl, pa kouri fè landyèz, fè tripotay, epi lè nou pale fòk nou pa an kontradiksyon ak tèt nou, fòk nou pa fè rizèz ak lang nou, paske se konsa nou kapab rive nan wotè Bondye vle nou rive a. Nan menm sans sa tou, Jezi ap envite nou pran chemen limyè, ouvri je nou sou reyalite ki anviwonnen nou, pou lè nou wè moun k’ap mache pou nou pa konfonn yo ak pye bwa van ap souke ; Jezi ap envite nou aprann distenge bagay yo, paske nan tan jounen jodi a, ki se tan mondyalizasyon an, nou gen tantans melanje bagay yo : se tan kote moun ap mele bagay ki sakre ak bagay pwofán ; fanm ak marye ak fanm, gason ap marye ak kason ; moun ap vanm moun, dwòg ap brase, lajan pi wo pase diyite moun, deblozay mete pye nan fanmi ; pitit pa respekte paran, paran pa respekte pitit.

An nou mande Granmèt la limyè sajès li a pou nou kapab mete tout bagay nan plas yo, pou pwòp glwa wayòm li kapab eklate pami nou nan kominote kote n’ap viv ak sou tout tè a.

LAPRIYÈ: Granmèt, mwen se yon avèg; tanpri ouvri zye mwen pou mwen kapab wè klè sa k’ap pase bò kote mwen epi ede mwen ranpli misyon mwen kòm pwofèt.

PWOPOZISYON: Jodi a m’ap koute plis, m’ap pale mwens.