LENDI 17

Koulè Vyolèt

PREMYE LEKTI

«Nou fè peche, nou fè sa ki pa kòrèk».

LEKTI LIV PWOFÈT DANYÈL 9, 4b-10

M’ap lapriyè ou, Granmèt, Bondye ki gran, ki terib, ki kenbe kontra a ak kè sansib la pou moun ki renmen ou yo epi ki kenbe kòmandman ou yo.

Nou fè peche, nou fè sa ki pa kòrèk, nou aji san nou pa respekte ou, nou vire do nou, nou devye sot nan kòmandman ou yo ak jijman ou yo; nou pa t’ obeyi sèvitè ou pwofèt yo, ki te pale o non ou ak wa nou yo, chèf nou yo, zansèt nou yo ak tout pèp peyi a.

Se pou ou, Granmèt, jistis la: nou menm menm se pou nou lawont nan figi a, jan sa ye jodi a pou moun Jida ak pou moun ki abite Jerizalèm yo ak pou tout Izrayèl la, ni pou moun ki tou pre yo, ni pou moun ki lwen yo sou tout tè a, kote ou te voye yo an ekzil poutèt peche yo te fè kont ou menm menm.

Granmèt, pou nou menm se lawont nan figi a, pou wa nou yo, pou chèf nou yo ak zansèt nou yo, ki te fè peche yo. Kanta pou ou menm menm, Granmèt Bondye nou, se kè sansib ak padon, paske nou vire do ba ou, nou pa t’ koute vwa Granmèt Bondye nou an, pou nou te mache nan lalwa l’ la, sa l’ te ba nou pa lentèmedyè sèvitè l’ yo pwofèt yo.

Pawòl Granmèt la.

R/ Mèsi Bondye, mèsi.  

SÒM REPONS 78, 8. 9. 11 e 13

R/ Granmèt, se pa daprè peche nou yo pou ou aji avèk nou.

Pa sonje peche zansèt nou yo, fè vit pou kè sansib ou pran devan nou, paske nou vin pòv anpil.R.

Pote nou sekou, Bondye delivrans nou, poutèt bèlte non ou, delivre nou; padonnen peche nou yo, poutèt non ou.R.

Se pou l’ antre devan fas ou, rèl prizonye yo; daprè grandè bra ou kite rès pitit lanmò yo.   R.

Nou menm menm, pèp ou a ak mouton pak ou a, n’ap fè lwanj ou tout tan; pou jenerasyon ak jenerasyon, n’ap anonse lwanj ou.R.

LEVANJIL

«Padonnen, y’ap padonnen nou».

MEN BÒN NOUVÈL JEZIKRI A DAPRÈ LIK KI SEN 6, 36-38

Lè sa a: Jezi di disip li yo:

«Se pou nou gen kè sansib, tankou Papa nou gen kè sansib. Pa jije, yo p’ap jije nou; pa kondane, yo p’ap kondane nou; padonnen, y’ap padonnen nou.

Bay, y’ap ba nou: se yon mezi ki bon, ki byen foule, ki byen souke, k’ap debòde, y’ap mete nan pli rad nou. Nan menm mezi n’ap mezire a, se ladan l’ y’ap mezire pou nou tou, se ladan l’ y’ap renmèt nou».

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: «Pa jije, yo p’ap jije nou; pa kondane, yo p’ap kondane nou; padonnen, y’ap padonnen nou.» Se atravè fason Jezi te gade epi aji pou sove mond nou an, se nan fason sa tou nou dwe aprann gade reyalite mond nou an. Lè nou rive pran konsyans de pwòp mizè nou, pwòp feblès nou, ebyen nou p’ap prese pote jijman sou lòt yo; okontrè n’ap lapriyè bay Bondye pou li kapab gen pitye ak mizerikòd pou tout moun. Se lanmou Granmèt la ki sove nou. «Sila yo li te renmen yo, li te renmen yo jiskobou», «Li menm ki te egal ak Bondye e ki pa t' janm konsidere sa tankou yon avantaj pou l' te chache kenbe ak tout fòs», (Fil 2,6). Gras a tèt li li te rabese, li fè nou jwenn remèd pou pwòp mizè nou ak feblès nou. «Se pou nou gen kè sansib, tankou Papa nou gen kè sansib». Lè nou pran konpasyon devan mizè lòt yo, sa fè nou kominike yo pwòp mizerikòd Bondye gen pou nou an. Antan n’ap vanse pi pre Pak la, an nou mete pye nou nan mak pye Jezi, konsa n’a gen menm santiman ak li, li menm ki te fè kò li tou piti, ki te rabese tèt li yon fason ki te ekstrawòdinè.Te gen anpil moun ki te antoure Jezi lè Jan Batis t’ap batize li, men se li menm sèl ki te san peche pami yo. Pi devan, Apot Pòl pral di nou: «Li menm ki pa t’ komèt peche, te fè tèt li pase pou pechè». Bondye ki sove nou an, li mande nou pou nou sanble ak li nan konpòtman nou. « Padonnen, y’ap padonnen nou. » Atitid ke nou genyen pou frè ak sè nou yo, se atitid nou genyen pou Bondye li menm. Pwofèt Danyèl ap envite nou pran atitid moun ki koupab e ki konte sou mizerikòd Bondye: « Nou fè peche, nou fè sa ki pa kòrèk, nou aji san nou pa respekte ou, nou vire do nou, nou devye sot nan kòmandman ou yo ak jijman ou yo; nou pa t’ obeyi sèvitè ou pwofèt yo, ki te pale o non ou ak wa nou yo, chèf nou yo, zansèt nou yo ak tout pèp peyi a. » Lè nou rekonèt nou pa pi bon pase lòt yo, sa kapab efase sikatris peche a kite nan fon kè nou.Sa ap ede nou grandi. Sa ap ede nou pa kritike lòt yo, men pou nou ba yo lamen pou ede yo leve lè yo tonbe. Nou tout nou koupab nan sa k’ap pase nan mond nou an, se pou sa, antan n’ap antre pi fon nan Pak la, nou dwe rekonèt tò nou, nou dwe mande Granmèt la padon.

LAPRIYÈ: Bondye, ou menm ki te pase lòd metrize kò yo, pou nam yo kapab geri, tanpri, fè nou evite tout kalite peche, fè kè nou obeyi kòmandman ou yo ki sen an. Pa pouvwa Jezikri.

PWOPOZISYON: Fè silans, gade pwòp tèt mwen nan miwa konsyans mwen avan mwen kritike lòt yo. Wè gwo bout bwa ki nan je mwen avan mwen wè ti pay ki nan je lòt la.