SAMDI 15

Koulè Vyolèt
PREMYE LEKTI
«Pou ou kapab vin tounen pèp sen Granmèt Bondye w’ la».
LEKTI LIV DETEWONÒM 26, 16-19
Moyiz pale ak pèp la, li di :
«Jodi a Granmèt Bondye ou la pase ou lòd, pou ou reyalize kòmandman sa yo ak desizyon yo, pou ou obsève yo, pou ou reyalize yo ak tout kè ou, ak tout nam ou.
Jodi a menm, ou chwazi Granmèt la, pou l’ vin tounen Bondye ou, pou ou mache nan chemen l’ yo, pou ou obsève kòdmanman l’ yo, lòd li yo ak desizyon l’ yo, pou ou obeyi lòd li. Granmèt la chwazi ou jodi a, pou ou vin tounen pèp li yon fason espesyal, jan l’ te di w’ la, pou ou obsève tout lòd li yo ; pou l’ fè ou pi wo pase tout nasyon yo li te kreye yo nan lwanj ; nan non l’ak nan bèlte l’, pou ou vin tounen pèp ki sen pou Granmèt Bondye w’ la, jan l’ te pale a».
Pawòl Granmèt la.
R/ Mèsi Bondye, mèsi.  
PSÒM RÉPONS 118, 1-2. 4-5. 7-8
R/ Se chans pou moun yo k’ap mache nan lalwa Granmèt la.
Se chans pou moun ki entak nan chemen an, k’ap mache nan lalwa Granmèt la.
Se chans pou moun yo ki kenbe temwayaj li yo, k’ap chèche l’ak tout kè yo.R.
Ou pase lòd pou yo obsève kòmandman ou yo. Mwen swete pou chemen m’ yo dirije pou m’ kenbe desizyon ou yo.R.
M’ap fè lwanj ou nan kè ki dwat, paske mwen aprann jijman ou yo ki kòrèk yo. M’ap kenbe desizyon ou yo, pa lage m’ pou tout tan.R.
LEVANJIL
«Se pou nou kòrèk nèt tankou Papa nou nan syèl la».
MEN BÒN NOUVÈL JEZIKRI A DAPRÈ MATYE KI SEN   5, 43-48
Lè sa a: Jezi di disip li yo:
«Nou te tande yo te di: «Se pou ou renmen pwochen ou, pou ou rayi lènmi ou».
Mwen menm mwen di nou: «Renmen lènmi nou, fè dibyen pou moun ki rayi nou yo, lapriyè pou moun k’ap pèsekite nou yo, k’ap fè manti sou nou; pou nou kapab vin tounen pitit Papa nou ki nan syèl la, li menm ki fè solèy li leve sou bon yo ak move yo, ki fè lapli tonbe sou moun kòrèk yo ak sou mechan yo.
Si nou renmen sila yo ki renmen nou, ki rekonpans nou genyen? Èske pibliken yo pa fè sa? Si nou salye frè nou yo sèlman, ki sa nou fè an plis? Èske payen yo pa fè sa?
Konsa se pou nou kòrèk nèt, tankou Papa nou ki nan syèl la li kòrèk nèt».
An nou fè lwanj ak konpliman pou pawòl Bondye a.
R/ Lwanj pou ou, Granmèt.
REFLEKSYON: «Nou te tande yo te di: «Se pou ou renmen pwochen ou, pou ou rayi lènmi ou». Sa se kalite edikasyon yo te ba nou. Men Jezi li menm li vin di nou: « Renmen lènmi nou, fè dibyen pou moun ki rayi nou yo, lapriyè pou moun k’ap pèsekite nou yo, k’ap fè manti sou nou…». Kòm mou ki konvèti, ki kite fènwa peche, ki pran wout limyè, nou dwe divòse ak vye koutim nou yo, nou dwe chanje vye manyè nou yo, pou nou kapab tounen sèl ki bay lavi lòt yo gou, pou nou kapab tounen limyè k’ap klere yo. Kòm patizan Jezikri, nou dwe kominike lavi nou resevwa nan pwòp kò ak san li. Nou kontanple Jezi, e nou vle viv menm jan ak li, nan fidelite renmen Papa. Nou dwe swiv ekzanp Jezi a, li menm ki te renmen nou san mezi, li renmen nou jiskaske li mouri pou nou, malgre nou te lènmi li, nou te rejte li, nou te trayi li; granmesi soufrans li ak pasyon li, nou te jwenn favè merite lanmou enfini Bondye a ankò. Konsa, an nou mande Bondye fòs ak kouraj pou nou kapab fè sa li mande nou fè, pou lavi nou kapab tounen yon temwayaj renmen ak mizerikòd lanmou san limit li a, gras a konkou Lespri renmen li a k’ap klere nou.

LAPRIYÈ: Papa, ou menm ki ekziste tout tan, vire kè nou nan direksyon ou, pou nou kapab chèche sèl sa ki nesesè a tout tan, pou nou aji avèk charite, pou ou mete nou apa pou sèvis ou. Pa pouvwa Jezikri.
PWOPOZISYON : Pran konsyans Bondye renmen mwen epi mwen dwe renmen lòt yo menm jan atravè aksyon m’ap poze.