MADI 15

Koulè Vyolèt

MADI SEN

PREMYE LEKTI

«Mwen mete ou kòm limyè nasyon yo, pou delivrans mwen rive  jous nan bout tè a».

LÉKTU LIV PROFÈT IZAYI 49, 1-6

Koute, zile yo, fè atansyon, pèp ki lwen yo: Granmèt la rele m’ depi nan vant, depi nan zantray manman m’ li sonje non m’; li mete bouch mwen tankou yon epe pwenti, li pwoteje m’ nan lonbraj men l’, li mete m’ tankou yon flèch ki byen chwazi, li kache m’ nan sak li.

Li di m’: «Se sèvitè m’ ou ye, Izrayèl, paske se nan ou m’ap jwenn glwa mwen». Epi mwen menm mwen te di: «Se pou granmesi mwen te travay, se san rezon ak pou anyen mwen te depanse fòs mwen; epoutan jijman m’ avèk Granmèt la, rezilta travay mwen avèk Bondye m’ nan».

Koulye a, men sa Granmèt la di, li menm ki fòme m’ depi nan vant pou m’ kapab vin tounen sèvitè l’, pou m’ fè Jakòb tounen vin jwenn li, pou m’ rasanble Izrayèl ba li, mwen jwenn glwa devan je Granmèt la, Bondye m’ nan vin tounen fòs mwen. Li di: «Sa pa kont pou ou sèvitè m’ pou ou kapab leve ras Jakòb yo, pou ou fè debri pèp Izrayèl yo tounen: men mwen mete ou kòm limyè nasyon yo, pou delivrans mwen rive jous nan bout tè a.

Pawòl Granmèt la.

R/ Mèsi Bondye, mèsi.       

SÒM REPONS 70, 1-2. 3-4a. 5-6ab. 15 e 17

R/ Bouch mwen ap anonse delivrans ou a, Granmèt,

Se nan ou, Granmèt, mwen espere, pa kite m’ wont pou tout tan.

Nan jistis ou a delivre m’, sove m’; panche zòrèy ou sou mwen, sove m’.R.

Se pou ou sèvi m’ yon wòch sitadèl, ak yon kay defans, pou ou sove m’, paske fòs mwen ak kachèt mwen se ou menm. Bondye mwen, wete m’ nan men pechè a.R.

Paske se ou menm ki esperans mwen, Granmèt; Granmèt, espwa m’ depi m’ tou jèn. Se sou ou mwen apuiye depi m’ nan vant, depi nan vant manman m’ se ou menm ki soutni m’.R.

Bouch mwen ap anonse jistis ou, tout jounen delivrans ou a, pou m’ ta konte l’, mwen pa kapab. Bondye, ou ban m’ ansèyman depi m’ tou jèn; jous koulye a m’ap anonse mèvèy ou yo.R.

LEVANJIL

«Youn nan nou ap bay mwen. Kòk la p’ap chante, w’ap gen tan nye m’ twa fwa».

MEN BÒN NOUVÈL JEZIKRI A DAPRÈ JAN KI SEN 13, 21-33. 36-38

Lè sa a:

Jezi te sou tab avèk disip li yo, espri l’ vin twouble, li temwaye, li di: «Amèn, amèn mwen di nou sa, youn nan nou ap trayi m’».  Disip yo youn t’ap gade lòt, yo pa t’ fin konprann sa l’ te vle di a.

Youn nan disip Jezi yo ki te sou tab yo te kouche sou lestonmak li, sa a Jezi te renmen an. Simon Pyè fè l’ siy, li di l’: «Ki moun l’ap pale a»? Kòm sa a te kouche sou pwatrin Jezi, li di l’: «Granmèt, kilès»?

Jezi reponn: «Se sa a m’ap lonje pen an mwen fin tranpe a ba li». Kon l’ tranpe pen an, li bay Jida, pitit Simon Iskaryòt la. Aprè bouche a, Satan antre nan li.

Jezi di l’: «Sa w’ap fè a, fè l’ vit». Bagay sa a, pèsòn nan sa k’ te sou tab yo pa konnen pouki sa li te di l’. Genyen ki te konprann, kòm Jida te gen bous la, Jezi te di l’: «Achte sa nou bezwen pou jou fèt la», oubyen pou l’ te bay pòv yo kichòy. Kon l’ fin pran bouche a, li soti menm lè a. Se te nannuit.

Kon l’ fin sòti, Jezi di: «Koulye a Pitit moun nan jwenn glwa li, Bondye jwenn glwa li nan li tou. Si Bondye jwenn glwa li nan li, Bondye ap fè l’ jwenn glwa nan li menm tou, l’ap fè l’ jwenn glwa a tou suit.

Ti pitit mwen yo, mwen avèk nou toujou pou yon ti moman ankò. N’ap chèche m’, men jan m’ te di Juif yo, «kote m’a prale a nou pa kapab vini, mwen di nou sa davans».

Simon Pyè di l’: «Granmèt, kote w’a prale»?

Jezi reponn: «Kote m’a prale a, ou pa kapab suiv mwen koulye a, w’a suiv mwen apre».

Pyè di l’: «Pouki sa mwen pa kapab suiv ou koulye a? M’ap bay lavi m’ pou ou».

Jezi reponn li: «W’ap bay lavi ou pou mwen? Amèn, amèn mwen di ou, kòk la p’ap chante, w’ap deja nye m’ twa fwa».

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: Si nou pa fè atansyon nan Levanjil jounen jodi a, nou kapab twouble si nou mal santre atansyon nou. Youn nan moun ki atire atansyon nou nan Levanjil sa a, se Jida. Lè n’ap li pasaj Levanjil sa yo, nan yon premye tan nou toujou ta kritike Jida pou nou di li mal aji, li menm merite lanmò. Ebyen la menm nou kòmanse ap devye nan fason nou dwe li Levanjil la. Èske li pa ta pi bon nan Semèn Sent la kote n’ap prepare nou pou nou selebre lanmò ak rezireksyon pou n’ reflechi sou pwòp tèt pa nou pito ? Olye nou ta mete nou nan pozisyon pou nou lapide Jida, èske nou reflechi nou menm konbyen fwa nou te sèvi Jida nan lavi nou pou nou touye Jezi sou kwa a ? Bon, sa se yon kesyon ki mande anpil refleksyon paske li ta pi fasil pou nou di : Jida se yon trèt, li trayi Jezi. Olye nou kontinye ak menm atitid farizyen yo, fason Jida aji a envite nou pran konsyans sou pwòp tèt pa nou nan fason nou konn trayi Jezi. Se sèten nou pral di nou pa janm kwaze Jezi, donk nou pa janm trayi li. Nan sans sa nou bliye si Jezi li menm li prezan atravè frè ak sè nou yo.  

Jan prezantasyon an fèt nan Levanjil la, atitid Jida a se yon pasaj oblije, se yon fason pou Granmèt la kapab montre nou atravè pitit li Jezi ke lanmou li pou nou pa gen limit. Repons Jezi bay Pyè a montre nou misyon li pa fini sou tè a, sinon se yon misyon ki apenn kòmanse. Menm aprè lanmò li, Jezi resisite e l’ap kontinye travay pou pitit li yo, li prale pou li kapab ale prepare yon plas pou yo bò kote Papa a. Ebyen men kado ki sere pou tout pitit Bondye yo, tout sa ki fè volonte Granmèt la. Ebyen, frè ak sè m’ yo, an nou kontinye travay pandan semèn sa a e pandan tout rès lavi nou pou nou kapab eritye yon plas bò kote Papa a, pou nou kapab jwi lavi ki p’ap janm fini an.

LAPRIYÈ : Bondye, ki gen tout pouvwa, ki ekziste tout tan, fè nou reyalize sakreman pasyon Granmèt la yon fason pou nou resevwa padon.  Pa pouvwa Jezikri.

PWOPOZISYON : Mande Bondye padon pou chak fwa mwen te aji tankou Jida, lè mwen te bay fo temwayaj sou yon moun…Pran desizyon pou mwen pa fè sa ankò.