DIMANCH 18

Koulè Blan

SENKYÈM DIMANCH PAK, ANE-A

PREMYE LEKTI

«Yo chwazi sèt mesye ki plen ak Lespri Sen an»

LEKTI TRAVAY APOT YO 6, 1-7

Jou sa yo, foul disip yo t’ap gwosi, Grèk yo plenyen kont Ebre yo, paske nan sèvis chak jou a yo te meprize vèv pa yo.

Douz yo konvoke foul disip yo, yo di: «Se pa nòmal pou nou kite pawòl Bondye a epi pou n’ap sèvi sou tab yo. Frè m’ yo, chèche sèt mesye nan pami nou ki gen bon temwayaj sou yo, ki plen ak Lespri Sen an ak sajès, n’a enstale yo pou travay sa a. Kanta nou menm, n’ap rete nan priyè ak sèvis pawòl la».

Pawòl la fè tout foul la plezi, yo chwazi Etyèn, yon mesye ki plen lafwa ak Lespri Sen, Filip, Pwokò, Nikamò, Timon, Pamenas, ak Nikola, yon moun Antyòch ki te fèk vin tounen disip.Yo prezante yo devan Apot yo, yo lapriyè, yo poze men sou yo.

Pawòl Granmèt la t’ap devlope, foul disip yo t’ap vin anpil menm nan Jerizalèm, anpil foul prèt t’ap obeyi lafwa a.

Pawòl Granmèt la.

R/ Mèsi Bondye, mèsi.      

SÒM REPONS 32, 1-2. 4-5. 18-19 7

R/ Se pou mizerikòd ou sou nou, Granmèt, menm jan nou met espwa sou ou a.

Oubyen: Alelouya.

Fete nan Granmèt la, nou menm ki kòrèk yo; lwanj la ale ak moun ki dwat yo. Fè lwanj pou Granmèt la sou gita, sou enstriman dis kòd la, chante pou li.R.

Sèke pawòl Granmèt la dwat, tout aksyon l’ yo nan fidelite. Li renmen jistis ak jijman, mizerikòd Granmèt la plen tè a.R.

Men je Granmèt la sou moun ki respekte l’ yo, sou moun ki met espwa sou mizerikòd li, pou l’ delivre nam yo sot nan lanmò, pou l’ ba yo manje nan grangou.R.

DEZYÈM LEKTI

«Nou menm nou se yon ras ki chwazi, yon peyi-wa prèt»

LEKTI PREMYE LÈT APOT PYÈ KI SEN  2, 4-9

Nou menm mwen renmen anpil la:

Se pou nou pwoche kot Granmèt la, li menm wòch vivan an, sa lèzòm yo rejte a, men sa Bondye menm chwazi a, sa l’ bay konsiderasyon an, nou menm tou tankou wòch ki vivan, se pou nou kite yo bati nou pou nou vin tounen yon kay Espri, yon reyinyon prèt ki sen, pou nou ofri sakrifis Espri, sa Bondye resevwa gras a Jezikri. Se pousa sa ki ekri a gen: «Men mwen poze yon wòch ki anlè nèt nan Siyon, yon wòch kwen, yon wòch ki chwazi, ki gen anpil valè; moun ki kwè nan li p’ap wont».

Konsa pou nou menm ki kwè yo, se konsiderasyon; men se pa pou moun ki pa kwè yo, «wòch la, sa bòs mason yo te jete yon kote a, li vin tounen tèt kwen an», epi «wòch k’ap fè moun bite ak blòk wòch k’ap jennen moun», pou sa yo k’ap bite sou pawòl la epi ki pa kwè nan sa a kote yo poze a.

Nou menm nou se yon ras chwazi, yon peyi wa prèt, yon nasyon ki sen, yon pèp Bondye posede, pou nou anonse mèvèy sa a ki rele nou vin nan bèl limyè l’ la.

Pawòl Granmèt la.

R/ Mèsi Bondye, mèsi.      

LEVANJIL

«Mwen se chemen an, verite a, ak lavi a»

MEN BÒN NOUVÈL JEZIKRI A DAPRÈ JAN KI SEN 14, 1-12

Lè sa a: Jezi di disip li yo:

«Pa kite kè nou twouble. Nou kwè nan Bondye, se pou nou kwè nan mwen menm tou. Nan kay Papa m’ nan gen anpil kote pou rete. Otreman mwen ta di nou, paske m’a prale pare yon plas pou nou.Lè m’a fin al prepare plas la pou nou an, m’a tounen vin pran nou avèk mwen, konsa, kote m’ap ye a, se la n’a ye tou. Epi kote m’a prale a, n’a konnen l’, n’a konnen chemen an».

Toma di l’: «Granmèt, nou pa konnen kote ou a prale; kòman nou kapab fè konnen chemen an»?

Jezi di l’: «Mwen se chemen an, verite a, ak lavi a. Pèsòn pa vin kot Papa a sof si l’ pase pa lantremiz mwen». Si nou te konnen m’, nou ta konnen Papa m’ tou; koulye a nou konnen l’, epi nou wè l’».

Filip di l’: «Granmèt, montre nou Papa a, epi sa ap kont nou».

Jezi di l’: «Depi tout tan sa a mwen avèk nou, epi nou pa konnen m’? Filip, moun ki wè m’, li wè Papa a tou. Kijan ou fè di: «Montre nou Papa a»? Ou pa kwè mwen nan Papa a, epi Papa a nan mwen? Pawòl yo mwen pale nou an, se pa nan mwen menm mwen pale yo. Papa a ki rete nan mwen an, se li menm ki fè travay yo. Nou pa kwè mwen nan Papa a, epi Papa nan mwen? O mwen poutèt travay yo se pou nou kwè.

Amèn, amèn, mwen di nou, travay mwen fè yo, l’ap fè yo tou, l’ap fè pi gran pase yo menm, paske m’a pral kay Papa a.

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: Jezi se Chemen an, Verite a ak Lavi a. Sa vle di pèson pa ka rive kot Papa a san l’ pa pase pa Pitit la. Jezi, wòch bòs mason yo te jete a, li tounen wòch kwen kay la. Se li ki fòs nou, se li ki konnen fon kè n’, si nou apiye sou li, si nou mete tout konfyans nou nan li, nou p’ap janm pase wont. Pawòl li se verite. Vrè lavi a se li sèl ki bay li, sous lavi a se nan li li ye. Jan nou wè sa nan premye lekti a, li chwazi nou pou nou sèvi li menm jan ak 7 dyak sa yo pou ede sa ki pòv yo, pran swen malad yo, sa ki nan nesesite yo, san fanmi yo, sa ki abandone yo. Jezi vle montre nou jan nou dwe solidè youn ak lòt.

Jezi se chemen an, kidonk nou pa gen pou n’ chèche lòt chemen. Li se vrè chemen ki mennen kay Papa a, se chemen kè kontan ak lapè, chemen gerizon ak soulajman, chemen renmen ak padon, chemen delivrans ak liberasyon an. Jezi idantifye li kòm Verite a. Ane sa a, se ane nou vle dyalòg la fèt nan laverite pou nou renouvle sosyete a. Anpil moun pa renmen verite, yo pa zanmi verite, yo plis renmen bay manti, di sa ki pa sa, pale lòt moun mal, kale do lòt moun, di sa yo pa wè, sa yo pa ka pwouve. Jezi envite nou fè yon revolisyon nan lavi nou, li mande nou kwape mansonj. Tou manti pa fon, depi w’ap bay manti y’ap kenbe ou kan menm. Jezi envite nou gen zanmitay ak verite a. Jezi di nou tou, li se Lavi a. Lavi se nan Bondye li sòti, se li ki bay lavi, nou pa mèt lavi a. Se pou sa nou pa ka detwi lavi pa n’ ni lavi pa lòt moun. Se pou nou renmen lavi, se pou nou respekte lavi, kite lavi pou boujonnen.Vrè lavi a, se nan Bondye li sòti, se pa nan plezi ni nan lajan, ni nan pouvwa. Jezi se lavi nou bezwen an. Se pou Bondye ba nou lavi li a agogo. Se pou li beni nou byen beni.

LAPRIYÈ : Granmèt, fè lavi a pa janm sispan boujonnen nan nou, fè n’ renmen lavi a nèt ale, pou nou viv nan laverite, pou nou renmen verite a epi swiv chemen w’ nan. Ou Menm ki vivan e ki Wa, depi tout tan e pou tout tan. Amèn.

PWOPOZISYON : Pa banalize lavi Bondye a nan nou. Pa detwi ni menase lavi lòt la, respekte lavi a e ba li tout enpòtans li.