JEDI 8

Koulè Blan

PREMYE LEKTI

«Si ou kwè ak tout kè ou, ou kapab batize».

LEKTI TRAVAY APOT YO 8,26-40

Jou sa yo:

Zanj Granmèt la pale ak Filip, li di:

«Leve, al nan sid, sou wout ki desann sot Jerizalèm al Gaza a: li pa gen pèsòn. Li leve, 1’ale.

Te gen yon mesye Etyopi, yon minis Kandas, rèn Etyopi a, li te gen gwo pouvwa, se li menm ki te responsab tout richès li yo, li te vin adore Jerizalèm.

Pandan l’ap tounen, li te chita nan charyo li, l’ap li pwofèt Izayi. Lespri a di Filip: «Pwoche, rive kot charyo sa a». Filip pwoche, li tande l’ap li pwofèt Izayi a; li di: «Èske ou kwè ou konprann sa ou ap li a»? Li di:

«Epi, kijan mwen ta kapab, si pèsòn pa montre m’»? Li mande Filip pou l’ monte, pou l’ chita avèk li. Pasaj sa k’ ekri a li t’ap li a, men li: «Tankou yon mouton yo kondui labatwa, tankou yon mouton devan moun k’ap koupe lenn li, san vwa, se konsa li pa louvri bouch li. Yo rabese l’, yo wete jijman l’. Ras li, ki moun k’ap rakonte l’? paske yo wete lavi l’ sot sou tè a». Minis la pran lapawòl, li di Filip: «Tanpri, osijè ki moun pwofèt la ap di sa a? Èske se osijè pwòp tèt pa l’ oubyen osijè yon lòt»? Filip ouvri bouch li, li kòmanse depi nan pasaj sa k’ ekri la a, li ba l’ bòn nouvèl Jezi a.

Pandan yo t’ap vwayaje sou wout la, yo rive nan yon dlo, li di minis la: «Men dlo; ki sa k’ anpeche m’ batize»? Filip di:

«Si ou kwè ak tout kè ou, ou kapab». Li reponn, li di:

«Mwen kwè Jezikri se Pitit Bondye». Li pase lòd pou yo fè rete charyo a. Yo tou le de desann nan dlo a, ni Filip, ni minis la, li batize l’. Pandan y’ap monte sot nan dlo a, Lespri Granmèt la sezi Filip, minis la pa wè l’ ankò; li kontinye wout li ak kè kontan. Filip menm rive Azòt, li travèse, l’ap bay bòn nouvèl la nan tout vil yo, joustan li rive Sezare.

Pawòl Granmèt la.

R/ Mèsi Bondye, mèsi.

SÒM REPONS 65, 8-9. 16-17. 20

R/ Bat bravo pou Bondye, tout tè a.

Oubyen: Alelouya.

Fè konpliman pou Bondye nou, nasyon yo, fè tande vwa lwanj li;

li menm ki mete nanm nou nan lavi, ki pa kite pye nou frape.R.

Vini, koute, nou tout ki krenn Bondye, m’ap rakonte tout sa l’ fè pou nam mwen. Se kote l’ mwen rele ak bouch mwen, mwen fè lwanj li ak lang mwen.R.

Konpliman pou Bondye, ki pa meprize priyè m’, li pa wete kè sansib li sot sou mwen.R.

LEVANJIL

«Mwen se pen vivan an, ki desann sot nan syèl la».

MEN BÒN NOUVÈL JEZIKRI A DAPRÈ JAN KI SEN 6, 44-52

Lè sa a: Jezi di foul yo:

«Pèsòn pa kapab vin jwenn mwen, si Papa a ki voye m’ nan pa rale l’; epi mwen menm m’ap fè l’ resisite l’ nan dènye jou a. Men sa ki ekri nan pwofèt yo: «Yo tout ap jwenn ansèyman nan men Bondye».

Tout moun ki koute Papa a epi ki kite l’ ba l’ ansèyman, l’ap vin jwenn mwen.

Se pa paske gen moun ki wè Papa a, sof sa a ki sot nan Bondye a, se li menm ki wè Papa a. Amèn, amèn mwen di nou, moun ki kwè nan mwen, li gen lavi tout tan an.

Mwen se pen lavi a.

Papa nou yo te manje mán nan dezè a, yo mouri; sa a se pen ki desann sot nan syèl la, pou si yon moun manje ladan l’, li pa mouri.

Mwen se pen vivan an ki desann sot nan syèl la. Si yon moun manje nan pen sa a, l’ap viv tout tan, epi pen an m’ap bay la, se kò m’ pou lavi tè a».

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: Premye lekti a pale nou sou eksperyans levanjelizasyon apot Filip ak minis trezò rèn Etyopi a ki t’ap sòti Jerizalèm nan pelerinaj tounen lakay li. Apot Filip, se moun rejyon Betsayida, se te senkyèm apot Jezi te chwazi, se li menm ki te fè Natanayèl rekonèt Jezi, se li menm nan miltiplikasyon pen yo Jezi te rele l’ mande l’ konbyen pen ki te genyen, se li menm ki te di Jezi nan dènye repa (soupe Granmèt la): «Montre nou Papa a e sa ap sifi pou nou». Depi nan kòmansman misyon Jezi Filip te prezan. Jodi a nou li ke Lespri a mennen li sou wout yon mesye ki t’al chèche Bondye Jerizalem, li t’ap li yon pawòl, men li pa t’ konprann li. Apot la eksplike l’ mesaj ki gen nan pawòl l’ap li yo, li pale li de Jezi ki se Mouton Bondye a yo te touye a, se li menm ki te leve vivan sòti pami mò yo. Sètènman li eksplike l’ lavi Jezi depi nan kòmansman rive jis nan aparisyon l’ yo aprè li te leve pami mò yo. Kòm konsekans, minis la deside resevwa batèm. Nou menm tout pafwa nou konn ap li yon pati nan Labib la e nou pa konprann li, nan moman sa yo, li toujou bon pou nou chèche konkou yon lòt moun, se pou sa tou li bon pou nou reyini an kominote pou n’ pataje pawòl Bondye a. Moso levanjil sa a ap kontinye diskou Jezi a. Sa ki bèl nan diskou sa, sa ki fè diskou sa a diferan, sèke Jezi ap pale de tèt li, men nan tout sa l’ap di, li  fè referans ak Papa l’. Se Papa l’ ki voye l’. Moun ki koute l’, se Papa a li koute. Moun ki kwè nan li, li kwè nan Papa a, e l’ap viv pou tout tan.

LAPRIYÈ: Bondye ki gen tout pouvwa, ki ekziste tout tan, fè nou santi bon kè ou pi plis nan jou sa yo, kote nou konnen l’ pi byen gras a favè ou la, pou sa yo ou fin delivre sot nan fènwa move chemen an, ou fè yo kole kò yo pi fèm nan ansèyman verite ou la. Pa pouvwa Jezikri. Amèn

PWOPOZISYON: Nan premye lekti a, apot Filip eksplike minis Etyopi a pawòl Bòn Nouvèl la, e nonm nan te ouvri kè l’, li te resevwa mesaj la si tèlman byen, li te mande batize. Nou menm tou jodi a, an nou ouvri kè nou kite Pawòl la Bondye a penetre nan lavi nou.