MÈKREDI 7

Koulè Blan

PREMYE LEKTI

«Yo t’ap travèse antan y’ap anonse pawòl Bondye»

LEKTI TRAVAY APOT YO 8,1-8

Jou sa yo vin gen yon gran pèsekisyon kont Legliz la ki te Jerizalèm nan; tout moun te gaye nan rejyon Jide ak Samari a sof Apot yo. Gen moun ki krenn Bondye ki okipe Etyèn, yo fè gran dèy sou li. Sòl menm t’ap ravaje Legliz la; li t’ap antre nan kay yo, li t’ap mete ni gason ni fi deyò, li t’ap mennen yo nan prizon. Konsa sa yo ki te gaye yo, yo t’ap travèse ap pote bòn nouvèl pawòl Bondye a. Filip desann nan yon vil Samari, li t’ap bay moun yo ansèyman sou Jezikri. Foul moun yo te fikse lide yo sou sa Filip t’ap di, yo tout t’ap koute, yo te wè siy yo li te fè yo. Sèke anpil nan sa yo ki te gen lespri papwòp yo, yo te sòti, antan y’ap rele byen fò; anpil moun ki pa t’ kapab fè mouvman, ki te enfim, yo te vin geri. Te vin gen gran kè kontan nan vil sa a.

Pawòl Granmèt la.

R/ Mèsi Bondye, mèsi.

SÒM REPONS 65, l-3a. 4-5. 6-7a

R/ Bat bravo pou Bondye, tout tè a.

Oubyen: Alelouya.

Bat bravo pou Bondye, tout tè a, chante glwa non l’, fè lwanj li.

Di Bondye: «A la respè travay ou yo merite.R.

Tout tè a ap adore ou, l’ap chante pou ou, l’ap chante pou non ou».

Vini, n’a wè travay Bondye yo, li merite respè nan aksyon li fè pou pitit moun yo.R.

Li fè lanmè a vin tounen tè sèk, y’ap pase rivyè a apye; n’ap kontan nan li kote sa a. Li menm k’ap kòmande nan pouvwa l’ pou tout tan. R.

LEVANJIL

«Sa a, se volonte Papa a, pou tout moun ki wè Pitit la, li gen lavi tout tan an».

MEN BÒN NOUVÈL JEZIKRI A DAPRÈ JAN KI SEN 6, 35 40

Lè sa a: Jezi di foul yo:

«Mwen menm mwen se pen lavi a; moun ki vin jwenn mwen p’ap grangou, moun ki kwè nan mwen p’ap janm swaf. Men mwen te di nou, nou wè m’, epi nou pa kwè. Tout sa Papa a ban mwen, l’ap vin jwenn mwen; moun ki vin jwenn mwen, mwen p’ap jete l’ deyò; paske mwen pa desann sot nan syèl la pou m’ fè volonte pa m’, men volonte sa a ki voye m’ nan. Men volonte sa a ki voye m’ nan, Papa a, sèke tout sa l’ ban mwen, pou m’ pa pèdi anyen nan yo, men pou m’ fè l’ resisite nan dènye jou a. Sa a se volonte Papa m’ nan ki voye m’ nan, pou tout moun ki wè Pitit la, epi ki kwè nan li, jwenn lavi tout tan an; mwen menm m’ap fè l’ resisite nan dènye jou a».

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON:Premye moso labib nou sot li nan liv travay Apot yo pale nou de kòmansman pèsekisyon kont Legliz la aprè lanmò Jezi. Youn nan prensipal aktè yo, se te sila yo te rele Sòl. Kilès li te ye? Se te yon jwif ki te fèt nan peyi Tas, nan Azi Minè, li te gen anpil konesans sou lalwa Moyiz la, depi l’ piti li t’ap etidye l’, li te elèv yon gran pwofesè nan tan sa ki te rele Gamalyèl; li te yon save nan lang grèk la. Li te fè pati gwoup farizyen yo. Pèsekisyon kont Kretyen yo te vin pran plis jarèt lè Sòl, li menm pèsonèlman te pran angajman pou rapouswiv tout moun ki te deklare yo kwè nan Jezi. Sòl te la lè yo t’ap touye Etyèn ak kout wòch la, se nan pye l’ moun ki te asasinen Etyèn yo te kite rad yo te retire sou yo pou kalonnen l’.Se Sòl menm ki t’ap antre lakay kretyen yo, trennen yo nan prizon fi kou gason. Pa t’ gen mwayen pou yo te chape anba Sòl si yo pa t’ sove kite peyi a. Men pèsekisyon sa te pèmèt moun ki t’ap kouri sove yo gaye Bòn Nouvèl la tout kote yo te rive.Nou gen pou nou li pi devan fason Bondye pral sèvi ak pèsekitè sa a, jan l’ pra l’ fè l’ tounen youn nan pi gran apot k’ap anonse levanjil Jezikri a. Nan levanjil la, Jezi di nou «Mwen menm mwen se pen lavi a; moun ki vin jwenn mwen p’ap grangou, moun ki kwè nan mwen p’ap janm swaf». Pa t’ap gen pi bon manje ke manje ki pa ta janm fini, paske nou pa t’ap janm grangou. E Jodi a Jezi bay tèt li kòm manje ki p’ap janm fini an, kòm bwason ki pase swaf pou tout tan. Poukisa dèfwa nou meprize l’, nou refize pran l’ ? Jezi ba nou l’avèk anpil tandrès, anpil sakrifis. Manje sa a se pwòp kò li, bwason sa se pwòp san li; se remèd pou maladi nou, se lajwa nou nan moman chagren, se repo nan fatig nou; se menm Bondye k’ap lonje pran nou nan tout kalite mal kote nou antere tèt nou.

LAPRIYÈ: Granmèt, ak pawòl delivrans ou yo, ak sakrifis ou sou lakwa, jodi a nou k’ab di ke nou vivan, nou kapab gen lespwa. Mèsi pou manje sa a, mèsi paske ou te bay tèt ou pou nou kab gen lavi.

PWOPOZISYON: Pran desizyon al jwenn Jezi jodi a epi depoze tout bagay nan men li.