VANDREDI 16

Koulè Blan

PREMYE LEKTI

«Bondye reyalize pwomès la, antan l’ fè Jezi resisite».

LEKTI TRAVAY APOT YO 13, 26-33

Jou sa yo: Lè Pyè rive Antyòch Pisidi, li di nan sinagòg la: «Mesye frè m’ yo, pitit ras Abraam, epi nou menm ki krenn Bondye, se pou nou pawòl delivrans sa a yo voye l’. Sa yo ki te abite Jerizalèm yo, ni chèf li yo, yo pa rekonèt li, ni pawòl pwofèt yo yo konn li chak Saba a, yo reyalize pawòl sa yo antan yo jije l’. Yo pa jwenn okenn koz lanmò nan li, yo mande Pilat pou yo touye l’. Lè yo fin reyalize tout sa k’ te ekri sou li, yo desann li sot sou bwa a, yo depoze l’ nan yon kavo.Men Bondye leve l’ sot nan pami mò yo sou twazyèm jou a; li parèt pandan anpil jou devan sa yo ki te monte avèk li sot Galile a rive Jerizalèm nan, yo menm ki sèvi l’ temwen jous koulye a devan foul la. Nou menm nou anonse nou reyalizasyon pwomès la yo te fè bay papa nou yo; Bondye reyalize l’ pou pitit nou yo antan l’ fè Jezi resiste, jan sa ekri nan sòm dezyèm nan: «Ou se Pitit mwen; jodi a mwen anfante ou».

Pawòl Granmèt la.

R/ Mèsi Bondye, mèsi.      

SÒM REPONS 2. 6-7. 8-9. 10-11

R/ Se Pitit mwen ou ye: jodi a mwen anfante ou.

Oubyen: Alelouya.

«Mwen enstale wa m’ nan sou Siyon, mòn mwen an ki sen an»!

M’ap anonse desizyon l’ nan. Granmèt la di m’: «Se Pitit mwen ou ye, se mwen menm jodi a ki anfante ou.R.

«Mande m’, m’ap ba ou nasyon yo kòm eritaj ou, posesyon ou, se limit tè a. W’ap kòmande yo ak yon bagèt an fè, tankou veso ki fèt ak tè, w’ap kraze yo».R.

Koulye a, wa yo, konprann, pran leson, nou menm k’ap jije tè a.

Sèvi Granmèt la ak krent, fete devan l’ avèk sezisman.R.

LEVANJIL

«Mwen se chemen an, verite a, ak lavi a».

MEN BÒN NOUVÈL JEZIKRI A DAPRÈ JAN KI SEN 14, 1-6

Lè sa a: Jezi di disip li yo:

«Pa kite kè nou twouble. Se pou nou kwè nan Bondye, epi kwè nan mwen menm tou. Nan kay Papa m’ nan gen anpil kote pou rete. Otreman mwen ta di nou, paske m’a prale pare yon plas pou nou. Lè m’a fin al prepare plas la pou nou an, m’a tounen vin pran nou avèk mwen, konsa, kote m’ap ye a, se la n’a ye tou. Epi kote m’a prale a, n’a konnen l’, n’a konnen chemen an». Toma di l’: «Granmèt, nou pa konnen kote ou a prale; kòman nou kapab fè konnen chemen an»? Jezi di l’: «Mwen se chemen an, verite a, ak lavi a. Pèsòn pa vin kot Papa a, sof si l’ pase pa lantremiz mwen».

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: Pawòl Bondye pou jodi a ap envite nou gen konfyans, nou ta kapab di konfyans nan Bondye epi konfyans nan pwòp tèt nou ak nan kapasite nou genyen pou nou travay pou yon lavi miyò.Nou dwe chèche konnen kisa Bondye vle nan lavi nou, paske Bondye gen yon pwoje pou nou chak, e pafwa nou bliye sa. Si nou te fè Granmèt la yon pwomès, nou dwe kenbe pwomès nou. Gen yon pwovèb ki di «pwomès se dèt»; lè w’ di yon moun w’ap fè yon bagay pou li oubyen w’ap ba li yon bagay, moun sa gen anpil espwa. Nan premye lekti a, nou wè kijan Bondye fidèl, li reyalize pwomès li antan li fè Jezi leve byen vivan. Pwomès sa a Bondye reyalize l’ tout bon vre pou nou menm ki se pitit eritye l’ yo; li louvri pòt yon lavi tou nèf pou nou antan li fè Pitit li a touye lanmò a. Vrèman vre, se Jezi ki vin reyalize tout pwomès Bondye Papa a. Li se Wa nou, e poutèt sa nou dwe santi nou gen asirans, nou pa gen pou n’ap trakase tèt nou ni jodi a, ni demen. Pou kisa nasyon yo ap toumante kò yo konsa? Pou kisa pèp yo ap fè plan pa yo pou anyen kont Wa sila a ki korèk la, li menm ki se Chemen, Verite ak Lavi a? Jezi kontinye ap fè mèvèy tout kote li pase, paske li gen tout pouvwa epi li vini pou kase tout chenn esklavaj nou yo. Se poutèt sa, se pou nou koute li, epi kwè nan li. Jan di nou nan Levanjil li a, nou pa bezwen boulvèse nou pou anyen; yon sèl bagay se pou nou kwè nan Bondye Papa a epi kwè nan Jezi. Kay Papa a gen anpil plas pou n’ rete, men fòk nou fè anpil atansyon, si pou yon moun eritye plas sa a, fòk li travay pou sa, paske syèl la se pa piyay; pa gen mafya, pa gen magouy, ou pa bezwen parenn ni marenn pou w’ al ladan l’; nan pwen vòlè ni achte. Si nou swiv Chemen Jezi a, si nou mache ak Jezi, yon jou nou va rive.

LAPRIYÈ: Jezi, tanpri ede mwen chwazi ou chak jou nan lavi mwen: ou se Chemen ki bay asirans, ou se Verite ki sèten an, ou se Lavi ki p’ap janm fini an.

PWOPOZISYON: Mwen vle jwenn yon plas kay Papa Bondye. Poutèt sa depi jodi a m’ap travay pou rèv sa a ka reyalize.