VANDREDI 30

Koulè Blan

PREMYE LEKTI

«Mwen gen yon gran pèp nan lavil sa a»

LEKTI TRAVAY APOT YO 18, 9-18

Pandan Pòl te Korent, Granmèt la di l’ yon nuit nan vizyon: «Pa pè, se pou ou pale, pa pe bouch ou. Paske mwen avèk ou, pèsòn p’ap poze men sou ou pou yo fè ou kichòy, sèke mwen gen yon pèp ki anpil pou mwen nan vil sa a». Li rete la yon ane ak si mwa, l’ap anseye pawòl Bondye a lakay yo. Pandan Galyon te prefè Lagrès, Juif yo met ansanm yo fè konplo kont Pòl, yo kondui l’ nan tribinal, yo di: «Sila a ale kont lalwa a, l’ap pran tèt moun yo pou yo adore Bondye». Pòl menm te kòmanse ap louvri bouch li, Galyon di Juif yo: «Si se te yon krim oubyen yon move aksyon, mesye Juif yo, mwen ta pran ka nou byen Men si se kesyon sou mo ak non ak lalwa nou an, se nou menm ki pou wè sa; mwen pa vle jij bagay sa yo». Li ranvwaye yo sot nan tribinal la. Tout moun sezi Sostèn, chèf kay reyinyon an, yo kòmanse frape l’ devan tribinal la, Galyon menm pa okipe yo. Kanta Pòl, li te rete ankò kèk jou, aprè sa li kite frè yo, li navige pou Lasiri (Prisil avèk Akila te avèk li). Li te fè koupé cheve l’ Sankre; paske li te fè yon ve.

Pawòl Granmèt la.

R/ Mèsi Bondye, mèsi.      

SÒM REPONS 46, 2-3. 4-5. 6-7

R/ Bondye wa tout tè a.

Tout nasyon yo, se pou nou bat bravo, fè lwanj pou Bondye avèk kè kontan. Paske Granmèt la ki anwo nèt la, li terib, wa ki gran anlè tout tè a.R.

Li mete pèp yo anba lòd nou, ak nasyon yo anba pye nou. Li chwazi eritaj nou pou nou, bèlte Jakòb la, sila a li renmen an.R

Bondye monte nan gran fèt, Granmèt la monte nan son klewon. Fè lwanj pou Bondye, fè lwanj; fè lwanj pou wa nou an, fè lwanj.R.

LEVANJIL

«Kè kontan nou an, pèsòn p’ap wete l’ sot nan nou»

MEN BÒN NOUVÈL JEZIKR A DAPRÈ JAN KI SEN 16, 20-23a

Lè sa a: Jezi di disip li yo:

«An verite, an verite mwen di nou, n’ap kriye, n’ap plenn, tè a menm ap nan kè kontan.N’ap gen lapenn, men lapenn nou an ap vin tounen kè kontan.Yon madanm k’ap anfante, li nan lapenn, paske lè l’ rive; men lè l’ fin fè pitit la, li pa sonje soufrans la ankò akoz kè kontan an, paske yon moun fèt sou tè a. Konsa nou menm tou koulye a nou gen lapenn; men m’ap wè nou ankò, kè nou ap kontan, kè kontan nou an, pèsòn p’ap pran l’ sot nan nou. Jou sa a nou p’ap mande m’ anyen».

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: Jodi a nou gen lapenn, men yon jou n’ap gen kè kontan k’ap dire pou tout tan, pawòl Bondye pou jodi a ba nou anpil ankourajman avèk fòs, kote li di nou nou pa bezwen pè pale pawòl la paske nou pa pou kont nou, menm jan sòm 46 la di nou, se Bondye Granmèt la ki tout pwoteksyon nou, se li menm ki sèl fòs nou; li toujou pare pou pote n’ sekou nan tout antrav nou yo; se pou tèt sa li di nou menm si nou wè tè a ap tranble, mòn yo ap chavire nou pa bezwen pè anyen, papa n’ ki  nan syèl la avèk nou. Si nou gen Bondye ki toujou kanpe ak nou, nanpwen jou pou n’ pa byen kore. Paske viktwa a se pou moun k’ap travay san rete, epi k’ap lite pou fè volonte Bondye. Kòm mwen toujou di nou, pa janm gen dimanch Pak san Vandredi Sen. Se poutèt sa Sen Jan nan Levanjil li a di nou, menm si nou nan lapenn, n’ap kriye jodi a, lapenn sa a gen pou tounen kè kontan; li di gen moun k’ap viv pou moun, pou fè moun plezi, y’ap kontan wè nou nou nan lapenn, men piga nou ebranle, yon jou lapenn nou an gen pou tounen kè kontan. Pou ede n’ konprann pawòl la pi byen Sen Jan prezante nou yon imaj:li pran imaj yon fi k’ap akouche pou l’ montre nou kijan Bondye genyen pou l’ fè kè nou kontan. Nou konn wè yon fi k’ap pote yon bebe, pafwa depi nan premye mwa a l’ap soufri pou jis li rive nan dènye mwa pou l akouche a, men aprè akouchmam an, li bliye soufrans lan tèlman li kontan wè ti pitit li, lè sa a li pran tan l’ pou l’ admire pitit li, paske li te gen espwa pitit la t’ap pote lajwa. Jodi a se menm espwa sa a Jezi vle pote pou nou, kote li vle nou rive menm kote avèk li, nan yon lavi san lapenn ni tristès, kote ki pa gen soufrans, abi ak lanmò. Ann mande Jezi tanpri fè espwa sa a grandi nan kè nou kòm pitit Bondye.

LAPRIYÈ: Bondye ki refè nou pou lavi tout tan an nan leve vivan Jezikri a, drese nou kot lotè delivrans nou an ki chita adwat ou a, pou lè Sovè nou an rive nan bèlte l’ la, sila yo ou te refèt nan batèm nan, ou a fè yo abiye avèk lavi ki p’ap fini an, ki sen an. Pa pouvwa Jezikri.

PWOPOZISYON:Aksepte soufri ak Jezi pou mwen ka pote laviktwa ansanm ak li.