DIMANCH 6

Koulè Vèt

KATÒZYÈM DIMANCH TAN ÒDINÈ, ANE-A

PREMYE LEKTI

«Men Wa ou la ap vin kote ou tou pòv»

LEKTI LIV PWOFÈT ZAKARI 9, 9-10

Men pawòl Granmèt la:

«Danse kont kò ou, pitit fi Siyon, eklate ak fèt, pitit fi Jerizalèm: men Wa w’ la ap vin jwenn ou, li kòrèk, li menm k’ap sove ou; li pòv, li monte sou yon bourik, ak sou yon ti pitit bourik. M’ap gaye kabwèt lagè yo sot nan Efrayim, ak chwal yo sot nan Jerizalèm, zam k’ap tire flèch pou lagè a ap gaye. L’ap pale lapè pou nasyon yo, pouvwa l’ap sot nan lanmè rive jous nan lanmè epi sot nan gran rivyè yo rive jous nan bout tè a».

Pawòl Granmèt la.

R/ Mèsi Bondye, mèsi.       

SÒM REPONS 144, 1-2. 8-9. 10-11. 13cd-14

R/ M’ap fè lwanj pou non ou tout tan, Bondye mwen ki wa.

M’ap fè lwanj ou, Bondye m’, wa mwen, m’ap fè konpliman pou non ou pou tout tan ak tout tan gen tan.

Chak jou m’ap fè lwanj pou non ou pou tout tan ak tout tan gen tan.R.

Granmèt la gen pitye, li gen kè sansib, li gen pasyans, li gen anpil kè sansib.Granmèt la bon pou tout moun, kè l’ sansib pou tout sa l’ fè.R.

Y’ap fè lwanj ou, Granmèt, tout sa ou fè yo; sen ou yo ap fè konpliman pou ou. Y’ap deklare bèlte rèy ou an, y’ap anonse pouvwa ou.R.

Granmèt la fidèl nan tout pawòl li yo, li sen nan tout aksyon l’ yo.

Granmèt la soulaje tout moun ki tonbe, li drese tout moun ki febli.R.

DEZYÈM LEKTI

«Si gras a Lespri a nou touye aksyon chè a, n’ap viv».

LEKTI LÈT APOT PÒL KI SEN POU WOMEN YO 8, 9. 11-13

Frè m’ yo:

Nou pa nan chè a, men nan Lespri a, si Lespri Bondye a abite nan nou reyèlman vre. Si yon moun pa gen Lespri Jezikri a, moun sa a pa pou li. Si Lespri sila a ki leve Jezi sot nan pami mò yo abite nan nou, sila a ki leve Jezikri sot nan pami mò yo ap fè kò lanmò nou yo viv tou poutèt Lespri a ki abite nan nou an.

Konsa, frè m’ yo, nou pa dwe chè a anyen, pou nou ta bliye viv daprè chè a. Sèke si nou viv daprè chè a, n’ap mouri; men si gras a Lespri a nou fè zèv chè a mouri, n’ap viv.

Pawòl Granmèt la.

R/ Mèsi Bondye, mèsi.      

LEVANJIL

«Mwen tou dou, mwen gen kè m’ tou pòv»

MEN BÒN NOUVÈL JEZIKRI A DAPRÈ MATYE KI SEN

11, 25-30

Lè sa a Jezi pran lapawòl, li di:

«Mwen fè konpliman pou ou, Papa, Granmèt syèl la ak tè a, paske ou kache bagay sa yo pou moun sajès yo ak moun entelijans yo, ou devwale yo bay ti moun piti yo. Wi, Papa, paske se konsa sa fè ou plezi. Papa m’ renmèt mwen tout bagay, pèsòn pa konnen Pitit la, sof Papa a; ni pèsòn pa konnen Papa a, sof Pitit la ak moun Pitit la vle devwale sa.

Vin jwenn mwen, nou tout k’ap fatige, k’ap redi anba gwo chaj, m’ap refè fòs nou. Pran jouk mwen sou nou, pran leson nan men m’, paske mwen tou dou, mwen pòv nan kè m’; n’ap jwenn repo pou nam nou; jouk mwen fasil pou pote, chaj mwen leje».

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON:

Jodi a n’ap selebre katòzyèm dimanch tan òdinè a. Nan pawòl sa a nou sot tande a, Jezi fè moun ki pòv nan kè yo konnen ki jan sa ye ant li menm ak Papa l’. Se moun ki pòv nan kè yo, se moun ki pa nan konnen tout, ki kab resevwa mesaj li a. Li envite yo vin jwenn li, vin kote li ak tout mizè yo, pou li kab soulaje yo. Li envite yo pou yo pran jouk li sou zepòl yo: sa vle di, pou yo swiv lòd li yo, pou yo renmen Bondye ak frè yo jan li montre nou. Li di yo: se nan viv konsa y’a jwenn kè poze ak fòs kouraj pou yo konbat ak lavi a.

Mezanmi, konbyen fwa nou santi lavi a se yon chay k’ap peze sou zepòl nou? Nou konbat ak pwoblèm, ak difikilte, ak mizè, e nou prèt pou tonbe. Jodi a Jezi envite nou vin kote l’, l’a ede nou pote chay lavi a, l’a soulaje nou, l’a fè nou jwenn kè poze.

Men, pou nou kab vin jwenn li, fòk nou gen yon kè ki senp, rekonèt nou fèb, nou piti. Se pou nou soumèt nou devan Bondye, admèt nou bezwen Jezi. Moun ki pran pòz konnen tout, moun ki konprann yo se moun lespri, moun ki plen move lògèy, yo pa wè sa, yo pa kab fè sa.

Jezi te di: Ala chans pou moun ki pòv nan kè yo, paske peyi wa ki nan syèl la se pou yo! Alò, nou menm, an nou apiye sou Jezi. Se nan feblès Jezi aji. Li devwale sekrè syèl la bay sa ki pi piti yo. Louvri pòt kè nou bay Jezi, sonje li la kote nou, avèk nou, nan nou. Mache avèk li, mache sou tras li. Fè volonte Bondye Papa nou, renmen frè nou yo. Lè sa, Jezi ap avèk nou, l’ap soutni nou, l’ap fè nou jwenn kè poze. Sa pa vle di nou p’ap gen pwoblèm ak difikilte. Non, n’ap genyen sètènman. Men nou p’ap pèdi tèt nou lè yo rive sou nou, yo p’ap boulvèse nou, paske nou konnen Jezi avèk nou, nou pa pou kont nou. L’ap ede nou pote chay lavi a. Se li ki va ba nou espwa.

LAPRIYÈ: Bondye Papa, tanpri ede mwen imite dousè, petitès ak senplisite Jezi, pou mwen ka akeyi ou chak jou nan lavi mwen. Pa pouvwa Jezikri. Amèn.

PWOPOZISYON: Lapriyè pi plis, kwape lògèy ak santiman gwo potanta nou yo, rete nan prezans Bondye pou nou ka venk demon an.