SAMDI 10

Koulè Blan

PREMYE MOSO LABIB

« Sa k’ renmen Bondye a, se pou l’ renmen frè l’ tou »

NAN PREMYE LÈT APOT JAN KI SEN 4, 19-5,4

Nou menm mwen renmen anpil la, nou renmen Bondye donk, paske Bondye te renmen nou an premye. Si yon moun di: Mwen renmen Bondye, epi li rayi frè l’, li se yon mantè.  Sa k’ pa renmen frè l’ la li wè a, Bondye li pa wè a, kijan li kapab renmen li? Sa a se kòmandman an nou te resevwa nan men Bondye a : pou sa k’ renmen Bondye a, li renmen frè l’ la tou.

Tout moun ki kwè Jezi se Kris la, se sot nan Bondye li fèt.  Epi tout moun ki renmen sa a li bay nesans la, li renmen sa a tou ki pran nesans sot nan li a.Nan sa a nou konnen nou renmen sa k’ gen nesans Bondye yo, lè nou renmen Bondye epi nou reyalize kòmandman l’ yo. Sa a reyèlman se charite Bondye a, pou nou kenbe kòmandman l’ yo : epi kòmandman l’ yo pa lou. Sèke tout sa k’ gen nesans sot nan Bondye, li ranpòte viktwa sou tè a, epi sa a se viktwa a, ki metrize tè a, lafwa nou.

Pawòl Granmèt la.

SÒM REPONS 71, 1-2. 14-15bc. 17

R/ Vini adore Bondye nou.

Bondye, bay wa a jijman ou, bay pitit wa a jistis ou, se pou l’ kòmande pèp ou a nan jistis, ak pòv ou yo nan verite.R.

L’ap delivre yo sot nan enjistis ak vyolans, san yo ap gen fran valè devan l’. Y’ap priye pou li tout tan, tout tan y’ap beni l’.R.

Se pou non l’ beni tout tan ; toutotan solèy la ap klere, se pou non l’ dire. Se pou tout fanmi tè a beni nan non l’, se pou tout nasyon deklare ala kontantman pou li.R.

LEVANJIL

« Jodi a Pawòl sa a ki ekri a reyalize»

MEN BÒN NOUVÈL JEZIKRI A DAPRÈ LIK KI SEN 4, 14-22a

Lè sa a :

Jezi tounen nan fòs Espri a nan Galile a ; repitasyon l’ gaye nan tout rejyon an. Li t’ap anseye nan sinagòg yo, tout moun t’ap fè lwanj li.

Li rive Nazarèt, kote yo te fè edikasyon l’ nan ; li antre daprè abitid li nan sinagòg la jou saba a, li leve pou l’ fè lekti a. Yo renmèt li liv pwofèt Izayi a. Lè l’ dewoule liv la, li jwenn kote ki ekri a :

« Espri Granmèt la sou mwen ; se pousa li sakre m’, li voye m’anonse pòv yo bon nouvèl la, geri sa k’ gen kè kraze yo, preche delivrans bay prizonye yo, preche limyè bay avèg yo, ranvwaye sa y’ap maltrete yo an libète, preche yon ane ki fè Granmèt la plezi, yon jou l’ap bay rekonpans ».

Li woule liv la, li renmèt sèvitè a li, li chita. Nan sinagòg la, tout je te fikse sou li.

Li kòmanse di yo : « Jodi a Pawòl sa a ki ekri a reyalize nan zòrèy nou ». Tout moun t’ap fè temwayaj sou li, yo te sezi pou pawòl gras yo ki t’ap sòti nan bouch li a.

An nou fè lwanj ak konpliman pou pawòl Bondye a.

REFLEKSYON : Nou menm ki di nou renmen Bondye, apot Jan ta renmen nou klè sou sa, paske pou li, renmen ta dwe yon bagay natirèl ki pran nou nan zantray e ki makonnen nou ak Bondye.

Kòm patizan, kòm disip-misyonè Jezikri, nou dwe renmen, poutèt Bondye se Renmen. Si nou renmen pwochen nou tout bon vre, lè sa a nou mèt sèten nou renmen Bondye tout bon vre. Jan di nou Bondye renmen nou, sa se yon bagay nou pa dwe doute sou li. Pi gwo prèv nou genyen, li voye Pitit li Jezikri vin montre nou kijan lanmou sa a san kondisyon e li san parèy ; li la ni pou sa k’ fè volonte l’, ni pou sila yo ki pa fè volonte li.

Ala yon bèl bagay se renmen, paske li anvlope tout bagay. Se nan renmen sa a ke fòs Lespri Sen sòti, Lespri ke Levanjil la rakonte nou ki te poze sou Jezi nan sinagòg la, lè li t’ap anonse misyon l’ sou tè a : li di Granmèt la voye l’anonse Bòn nouvèl delivrans la.

Bòn nouvèl la, sèke Jezi se Sovè a, Mesi a, Liberatè a, li vin chanje tout bagay ki pa fè kè Bondye plezi, li vin transfòme lavi nou, li vin fè nou lagras, li pa vle nou soufri ankò.

Frè ak sè m’ yo, daprè mesaj Jezikri a, ki se mesaj delivrans lan, nou dwe konte pi plis toujou sou Granmèt la, paske li renmen nou, li vle nou byen viv sou tè a.

LAPRIYÈ : Granmèt, voye Lespri renmen w’ lan nan nou, pou nou kab aprann renmen frè ak sè n’ yo ; konsa n’a kapab di nou renmen w’ tout bon vre.

PWOPOZISYON : M’ap aprann renmen tèt mwen, pou mwen ka renmen Bondye atravè pwochen mwen.