SAMDI 24

Koulè Blan

FRANSWA DE SAL, KI SEN, Evèk e Savan sakre Legliz la

(Memwa)

PREMYE LEKTI

«Ak pwòp san l’ li antre yon fwa pou tout nan pati ki sen nan tanp la»

LEKTI LÈT EBRE YO 9, 2-3. 11-14

Frè m’ yo:

Te gen premye tant la, kote te gen sipò-chandèl yo, tab la ak pen yo fri a, yo te rele l’ «Sin». Dèyè vwal la menm se te dezyèm tant la, sa yo rele «Sen sen yo».

Jezikri menm vin rive kòm prèt an chèf byen k’ap vini yo, li travèse tant ki pa fèt ak men moun nan, ki pi gran an epi ki pi kòrèk la, sa ki pa sòti nan kreyasyon sa a, se pa ak san bouk oubyen bèf, men se ak pwòp san l’ li antre yon fwa pou tout nan Sen an, lè l’ fin fè nou jwenn redanmsyon tout tan an. Reyèlman si san bouk ak towo yo, ak san gazèl yo, sa yo konn vide sou moun ki gen peche yo, te konn fè yo vin sen pou pwòpte chè yo, konbyen fwa pi plis san Jezikri a, ki ofri tèt li san tach bay Bondye gras a Espri Sen an, l’ap pwòpte konsyans nou sot nan aksyon lanmò yo pou nou sèvi Bondye vivan an?

Pawòl Granmèt la.

SÒM REPONS 46, 2-3, 6-7. 8-9 (r.: 6)

R/ Bondye monte nan gran fèt, Granmèt la monte nan son klewon.

Tout nasyon yo, se pou nou bat bravo,

fè lwanj pou Bondye avèk rèl kè kontan.

Paske Granmèt la ki anwo nèt la, li terib,

wa ki gran anlè tout tè a.R.

Bondye monte nan gran fèt,

Granmèt la monte nan son klewon.

Fè lwanj pou Bondye, fè lwanj ;

fè lwanj pou wa nou an, fè lwanj.R.

Paske Bondye se wa tout tè a,

fè lwanj avèk sajès.

Bondye wa sou nasyon yo,

Bondye chita sou twòn li ki sen an.R.

LEVANJIL

«Moun lakay li yo t’ap di: «Li pèdi bon sans li»

MEN BÒN NOUVÈL JEZIKRI A DAPRÈ SEN MAK 3, 20-21

Lè sa a:

Jezi rive avèk disip li yo nan yon kay, foul la rive ankò, atèl pwen yo pa t’ kapab menm manje yon moso pen. Lè moun kay li yo tande sa, yo pati pou yo pran l’; yo t’ap di: «Li pèdi bon sans li».

An nou fè lwanj ak konpliman pou pawòl Bondye a.

NB: SI YO VLE, YO VA LI TÈKS ESPESYAL POU MEMWA SEN VENSAN:

PREMYE LEKTI: Efezyen 3, 8-12

SÒM REPONS: Sòm 36, 3-4. 5-6. 30-31 (r.: 30a)

LEVANJIL: Jan 15, 9-17

REFLEKSYON: Jodi a nan okazyon fèt Sen Franswa de Sal la, Legliz la prezante nou li kòm yon modèl renmen, sajès ak bon konprann. Konsa nou mande Bondye pa lantremiz sen Franswa pou fè nou rive renmen lòt tout bon vre.

Levanjil la ap ede nou konnen ki kalite angouman foul la te genyen nan mache li t’ap mache dèyè Jezi, kote Jezi vin pa gen tan men m’ pou l’ pran yon ti poz, alevwa pou l’ ta pran yon ti kichòy. Nou remake kòman Jezi sakrifye l’ pou yo e se kritike yo kritike Jezi, yo menm di li pèdi tèt li; se yon bagay ki nan abitid nou, lè yon moun mete tout li menn nèt ale nan yon misyon, yon sèvis, lè li vrèman angaje l’ antan bay tout li menn san rezèv, nou toujou pote kritik, ou byen nou fè move jijman sou li kòmkwa li gen yon bagay ki pa mache.

Frè ak sè mwen, an nou viv selon konviksyon lafwa nou, an nou pa pè travay malgre tout kritik. Depi se travay Bondye n’ap fè, anyen pa dwe dekouraje nou, paske foli Bondye a pi gran ke sajès lèzòm. Ansanm ak Jezi an nou gade devan.

LAPRIYÈ: Granmèt, malgre tout kritik sosyete a, mwen vle kontinye mache ansanm avèk ou. Tanpri ban m’ fòs ou.

PWOPOZISYON: Rete kole sou Jezi, fè li konfyans, malgre tout difikilte ak pwoblèm lavi a.