MADI 10

Koulè Blan

SKOLASTIK KI SEN, Vyèj

(Memwa)

PREMYE LEKTI

"An nou fè moun nan nan pòtre nou, pou l’ sanble ak nou".

LEKTI LIV LAJENÈZ 1, 20-2, 4a

Bondye di ankò : "Se pou dlo yo bay bèt k’ap glise, ki gen lavi, avèk zwazo sou tè a anba sipò syèl la". Bondye kreye gran pwason yo ak tout kalite bèt vivan, ak sa ki gen mouvman, sa dlo yo bay daprè espès yo, epi tout kalite zwazo daprè ras yo. Bondye wè sa te bon, li beni yo, li di : "Devlope, vin anpil, plen dlo lanmè a, se pou zwazo yo vin anpil sou tè a. Vin gen yon aswè ak yon maten, senkyèm jou.

Bondye di ankò : "Se pou tè a bay bèt vivan nan ras yo, bèt chaj ak sa k’ap glise atè, ak tout bèt tè a, daprè espès yo". Sa fèt konsa. Bondye fè bèt tè a daprè espès yo, ni bèt chaj yo, ni tout sa k’ap glise atè a daprè ras yo. Bondye wè sa te bon.

Li di : "An nou fè moun nan sou pòtre nou ak resanblans nou; se pou l’ kòmande sou pwason lanmè yo ak zwazo syèl yo ak tout bèt tè a ak tout sa k’ap glise atè, ki gen mouvman sou tè a". Bondye kreye moun nan sou pòtre l’ ; sou pòtre Bondye li kreye l’, gason ak fi li kreye yo.

Bondye beni yo, li di : "Devlope, vin anpil, plen tè a, mete l’anba lòd nou ; se pou nou kòmande sou pwason lanmè a ak zwzo syèl la ak tout bèt vivan, ki gen mouvman sou tè a".

Bondye di : "Men mwen ba nou tout zèb ki pote semans sou tè a ak tout kalite pye bwa ki gen semans ras yo nan yo, pou yo sèvi nou kòm manje, ni pou tout bèt vivan sou tè a, ni pou tout sa ki an mouvman sou tè a, ki gen lavi nan yo, pou yo kapab jwenn manje". Sa fèt konsa. Bondye wè tout sa l’ te fè yo, yo te bon anpil. Vin gen yon aswè ak yon maten, sizyèm jou.

Konsa syèl la ak tè a reyalize, ak tout dekorasyon yo. Setyèm jou a Bondye konplete travay li a li te fè a, li repoze setyèm jou a pou tout travay li te fè yo.

Se konsa syèl la ak tè a te fèt.

Pawòl Granmèt la.

SÒM REPONS 8, 4-5. 6-7. 8-9 (r.: 2a)

R/ Granmèt, Granmèt nou ala gran non ou gran sou tout tè a !

Lè m’ wè syèl ou yo, travay dwèt ou yo, lalin ak zetwal yo ou fikse ; sa moun nan ye, pou ou sonje l’ ?

Oubyen pitit moun nan, pou ou vizite l’ ? R.

Ou fè l’ vin pi ba yon ti kras anba zanj yo, ak glwa ak konsiderasyon ou kouwonnen l’ ;

Ou enstale l’anlè travay men ou yo. Tout bagay, ou mete yo anba pye l’.R.

Ni mouton, ni bèf yo tout, menm bèt nan rak bwa yo,

Zwazo syèl yo ak pwason lanmè yo,

Tout sa k’ap deplase nan santye lanmè yo.R.

LEVANJIL

"Nou lage kòmandman Bondye yo, nou kenbe abitid moun yo".

MEN BÒN NOUVÈL JEZIKRI A DAPRÈ SEN MAK 7. 1 -13

Lè sa a :

Farizyen yo rasanble vin kot Jezi avèk kèk nan skrib yo ki te vin sot Jerizalèm. Kòm yo te wè kèk nan disip li yo ki t’ap manje avèk men yo sal, sa vle di san lave, yo fè yo repwòch. Sèke Farizyen yo ak tout Juif yo, si yo pa lave men yo souvan, yo p’ap manje, pou yo kenbe abitid ansyen yo. Lè yo sot deyò, si yo pa lave kò yo, yo p’ap manje ; pou yo kenbe anpil lòt bagay yo te transmèt yo : lave gode, krich, veso an kuiv ak kabann.

Konsa Farizyen yo ak skrib yo mande : "Pouki sa disip ou yo pa mache daprè abitid ansyen yo, men y’ap manje manje yo ak men yo sal” ?

Men li menm li reponn, li di yo : "Izayi te pale byen sou nou kòm pwofèt, bann ipokrit, jan sa ekri a. 'Pèp sa a se ak po bouch l’ap fè lwanj mwen, men kè yo lwen m’. Se pou granmesi y’ap ofri m’ sèvis antan y’ap bay ansèyman ak kòmandman moun". Nou kite kòmandman Bondye a, nou kenbe abitid moun yo : N’ap lave krich, gode ak dòt bagay konsa n’ap fè an kantite".

Li t’ap di yo : "Nou anile kòmandman Bondye a byen pwòp, pou nou kenbe abitid pa nou. Moyiz te di : «Respekte papa ou ak manman ou» ; epi : «Moun ki madichonnen papa oubyen manman l’, se pou l’ mouri byen mouri». Nou menm menm nou di : «Si yon moun di papa l’oubyen manman l’ : Kòban (sa vle di kado), tout sa m’ genyen pou m’ te ba ou a» ; nou pa kite l’ fè anyen ankò pou papa l’oubyen manman l’, nou chire pawòl Bondye a pou abitid pa nou, sa nou menm nou transmèt ; epi se konsa nou fè anpil bagay».

An nou fè lwanj ak konpliman pou pawòl Bondye a.

REFLEKSYON : Jodi a, nou kontanple kòman anpil vye tradisyon mèt Lalwa yo manipile vrè sans katriyèm kòmandman Lalwa Bondye a. Skrib yo t’ap anseye timoun yo ke li te pi bon pou yo te prezante ofrann lajan ak byen nan Tanp la. Timoun yo ki te gen konsyans yo mal fòme nan sans sa a, yo te kwè yo te vrèman respekte katriyèm kòmandman a, yo te kwè yo te sou bon chemen an. Men, an reyalite yo te twonpe.

«Nou anile kòmandman Bondye a byen pwòp, pou nou kenbe abitid pa nou.» (Mk 7,9) : Jezi se pi gran entèprèt Lalwa a, nan sans sa li eksplike vrè sans katriyèm kòmandman an, e se konsa li repare gwo erè fanatism jwif yo te komèt la.

«Vrèman vre, Moyiz te di : «Respekte papa ou ak manman ou» (Mk 7,10) : Katriyèm kòmandman an raple timoun yo responsablite yo anvè paran yo. Nan mezi kapasite yo oubyen posiblite yo, yo dwe ede paran yo nan nivo materyèl e moral pandan vyeyès yo ak lè yo malad, lè yo pou kont yo oubyen lè yo gen enkyetid. Jezi raple ke sa dwe fèt kòm yon atitid rekonesans.

Respè nou gen pou paran nou (pyete filyal), se rekonesans nou genyen poutèt yo ba nou lavi ak pou jefò yo fè nan travay di pou ede pitit yo grandi kòmsadwa nan laj ak sajès. « Respekte papa w’ ak tout kè w’, e pa bliye doulè manman w’. Sonje se gras a yo menm ki fè ou te vini nan mond lan: e kijan ou kapab remèt yo sa yo te ba ou?» (Sir 7,27-28).

Granmèt la fè wè bèlte papa a nan pitit li yo, e nan yo menm li konfime otorite manman. Moun ki respekte papa li, li jwenn padon pou peche li, moun ki fè konpliman pou manman li, li tankou yon moun k’ap ramase trezò (cf. Sir 3,2-6). Tout sa ak lòt konsèy klere nan lavi nou sa ki konsène relasyon nou ak paran nou. An nou mande Granmèt la gras pou nou pa janm manke renmen ke nou dwe paran nou yo, epi atravè ekzanp lavi nou, pou nou aprann lòt yo ke se yon obligasyon pou yo renmen paran yo.

LAPRIYÈ : Granmèt, tanpri, fè m’ renmen manman m’ak papa m’, fè m’ respekte yo antan m’ap sonje kijan yo ban m’ lavi, kijan yo travay di pou pran swen mwen chak jou. Fè m’ sèvi yo ak dousè ak lanmou.

PWOPOZISYON : Ede paran mwen fè kèk ti aktivite, tankou netwaye kay la, lave asyèt, elatriye. Montre yo kijan mwen renmen yo epi ou rekonesan antan mwen di yo mèsi pou tout sa yo fè pou mwen.