LENDI 23

Koulè Vyolèt

PREMYE MOSO LABIB

“Men m’ap mouri san m’ pa fè anyen nan bagay sa yo”.

NAN LIV PWOFÈT DANYÈL 13. 1-9. 15-17. 19-30. 33-62

Jou sa yo:

Te gen yon mesye ki te abite Babilòn, yo te rele non l’ Jowakim; li te marye ak yon fi yo te rele Sizán, pitit fi Èlsyas, li te bèl anpil, li te respekte Bondye: sèke paran l’ yo te kòrèk, yo te fè ledikasyon pitit fi yo a daprè lalwa Moyiz la. Jowakim nan te rich anpil, li te gen yon jaden tou kole lakay li; Jwif yo te konn vin lakay li anpil, paske li te yon moun respektab nan pami tout moun.

Ane sa a, nan pèp la yo te enstale de ansyen kòm jij, se osijè yo Granmèt la te pale: “Peche a sòti nan Babilòn, nan ansyen yo ki jij yo, yo menm ki gen wòl pou dirije pèp la”. Yo te konn frekante kay Jowakim nan; tout moun ki te gen koz pou regle, yo te konn vin kote yo. Lè pèp la te konn pati vè midi, Sizán te konn antre, li te konn pwomennen nan jaden mari l’ la. Chak jou ansyen yo te konn wè l’ ap antre, ap pwomennen, lanvi yo t’ap boule pou li, yo pèvèti sans yo, yo bese je yo, pou yo pa wè syèl la, pou yo pa sonje jijman ki kòrèk yo.

Rive, kòm yo te veye yon jou ki ranje yo, madanm nan antre jan l’ te konn abitye fè ni yè ni avantyè avèk de jèn fi sèlman, li te li te vle benyen nan jaden an, paske l’ te fè cho. Pa t’ gen pèsonn la sof de granmoun yo ki te kache, ki t’ap ekzamine l’. Li di jèn fi yo: “Pote savon ak losyon pou mwen, epi fèmen pòt jaden an, pou m’kapab benyen.

Kon ti fi yo sòti, de granmoun yo leve, yo kouri kote l’, yo di: “Men pòt jaden an fèmen, pèsonn pa wè nou, nou anvi ou; se pou ou konsanti ba nou, pou ou gen relasyon avèk nou. Si ou pa vle, n’ap sèvi temwen kont ou, n’ap di te gen yon jenòm avèk ou, epi se pousa ou te ranvwaye ti fi yo sot kote w’ la”.

Sizán plenn, li di: “Tray ap sere m’ tout kote; sèke si m’ fè bagay sa a, se lanmò pou mwen; men si m’ pa fè l’, mwen p’ap chape sot nan men nou; epoutan li pi bon pou mwen pou m’ tonbe nan men nou san m’ pa fè sa, pase pou m’ fè peche devan fas Granmèt la”. Sizán pouse yon gran rèl, men granmoun yo pouse yon gran rèl tou kont li, youn nan yo kouri nan pòt jaden an, li louvri l’.

Lè sèvitè kay la tande rèl nan jaden an, yo kouri nan ti pòt dèyè a, pou yo wè sa k’ genyen. Lè granmoun yo fin pale, sèvitè yo vin wont anpil, paske yo pa t’ janm tande kalite pawòl konsa sou do Sizán.

Landmen rive. Lè pèp la vin kay Jowakim, mari l’ la, de granmoun yo vini tou, yo te plen move panse kont Sizán, pou yo touye l’. Yo te di devan pèp la: “Voye chèche Sizán, pitit fi Èlzyas la, madanm Jowakim nan”. Menm lè a, yo voye chèche l’. Li rive avèk paran l’ yo avèk pitit li yo avèk tout fanmi l’ yo. Moun lakay li yo t’ap kriye, ni tout moun ki te konnen l’.

De prèt leve nan mitan pèp la, yo poze men yo sou tèt li. Li menm, li kriye, li leve je l’ gade syèl la: sèke kè l’ te gen konfyans nan Granmèt la. Prèt yo di: “Pandan nou t’ap pwomennen nan jaden an pou kont nou, sila a antre avèk de jèn fi, li fèmen pòt jaden an, li ranvwaye ti fi yo sot kote l’; gen yon jenòm ki te kache, li rive, li fè move aksyon avèk li. Sèlman nou menm, kòm nou te nan kwen jaden an, nou wè peche a, nou kouri sou yo, nou wè yo toulède ap fè move aksyon. Li menm menm nou pa reyisi kenbe l’, paske li gen plis fòs pase nou, li louvri pòt yo, li sove. Fi sa a menm, nou kenbe l’, nou poze l’ kesyon, nou mande l’ kilès jenòm sa a, li refize deklare nou. Se bagay sa a nou temwen”.

Foul la kwè yo, paske se ansyen ak jij pèp la yo te ye, yo kondane madanm nan pou l’ mouri.

Sizán rele byen fò, li di: “Bondye ki ekziste tout tan, ou menm ki konnen sa k’ kache, ou menm ki konnen tout bagay anvan yo rive, ou konnen se temwayaj ki pa vre yo depoze kont mwen. Men m’ap mouri, san m’ pa fè anyen nan bagay sa yo mesye sa yo envante avèk mechanste kont mwen an”.

Granmèt la koute vwa l’. Pandan y’ap kondui l’ nan lanmò, Granmèt la drese lespri sen yon jèn ti gason, yo te rele l’ Danyèl; li rele byen fò: “Mwen inosan nan san madanm sa a”. Tout pèp la vire kote l’, yo di l: “Ki kalite pawòl sa a ou di a?” Li menm menm, li kanpe nan mitan yo, li di: “Se konsa nou aji san reflechi, pitit Izrayèl yo? nou pa menm jije, nou pa menm konnen sa k’ vre, nou kondane yon pitit fi Izrayèl. Tounen nan jijman an, paske se temwayaj manti yo depoze kont li”.

Konsa pèp la tounen byen vit, granmoun yo di l’: “Vini, chita nan mitan nou, montre nou laverite, paske Bondye ba ou konsiderasyon vyeyès”. Danyèl di yo: “Separe yo lwen youn sot kot lòt, m’ap jije

Yo”.

Lè yo fin separe yo youn sot kot lòt, li rele youn nan yo, li di l’: “Ou menm ki vyeyi nan mal, koulye a peche w’ yo fè mas, peche sa yo ou t’ap fè depi lontan an, lè ou te konn ap jije jijman ki pa kòrèk yo, lè ou te konn ap kraze inosan yo, ou te konn ap lage koupab yo, malgre Granmèt la di: “Pa touye inosan an ak sila a ki kòrèk la”. Ebyen koulye a, si ou te wè l’, di anba ki pye bwa ou te wè yo ap pale ansanm”. Li di: “Anba yon pye bwa-d-chèn”. Danyèl di: “Se sou pwòp tèt ou ou fè manti a tou dwat: sèke men Mesaje Bondye a, li resevwa rezilta jijman an nan men l’, l’ap koupe ou nan mitan”.

Li voye l’ ale, li pase lòd pou lòt la vini, li di l’: “Ras Kanaan, ou pa ras Jida, bèlte a pran ou nan pyèj, move lanvi a pèvèti kè ou. Se konsa nou aji avèk pitit fi Izrayèl yo, epi yo te konn pè nou, yo te konn pale avèk nou; men yon pitit Jida pa sipòte peche nou an. Koulye a, ebyen, di m’ anba ki pye bwa ou te pran yo ap pale ansanm”. Li di “Anba yon pye kaliptis”. Danyèl di l’: “Manti sa a ou fè a, se sou tèt ou tou dwat l’ap tonbe: sèke Mesaje Granmèt la deja rèt la, li gen epe a nan men l’, l’ap koupe ou nan mitan, l’ap touye nou”.

Konsa tout foul la rele byen fò, yo fè konpliman pou Bondye, ki sove moun ki mete espwa sou li, yo fonse sou de ansyen yo (sèke Danyèl te konvenk yo ak pwòp bouch yo sou temwayaj manti a yo te fè a), yo fè yo sibi mal la yo te vle fè pwochen yo sibi a, konsa yo aji daprè lalwa Moyiz la, yo touye yo, yo sove yon san inosan jou sa a.

Pawòl Granmèt la.

SÒM 22, l-3a. 3b-4. 5. 6

R/ Si m’ap mache nan bafon lonbraj lanmò, mwen p’ap pè malè, paske ou avèk mwen.

Granmèt la ap kondui m’, anyen p’ap manke m’: nan zèb vèt li enstale m’, sou bò dlo trankil li Mennen m’, li refè nanm mwen.R.

Li kondui m’ nan santye jistis poutèt non l’. Sèke menm si m’ap mache nan bafon lonbraj lanmò, mwen p’ap pè malè, paske ou avèk mwen. Baton ou ak bagèt ou se yo k’ap konsole m’.R.

Ou pare yon tab devan fas mwen kont sila yo k’ap fè m’ pase tray; ou swen tèt mwen ak losyon, kalis mwen ap debòde.R.

Reyèlman vre se bon kè ak kè sansib k’ap rapousuiv mwen tout tan lavi m’, m’ap abite nan lakay Granmèt la pou tout longè tan yo.R.

LEVANJIL

"Moun ki san peche nan pami nou an, se li menm an premye ki pou voye wòch la sou li".

MEN BÒN NOUVÈL JEZIKRI A DAPRÈ JAN 8. 12-20

Lè sa a:

Jezi pale avèk farizyen yo, li di: "Mwen se limyè tè a; moun k’ap suiv mwen, li p’ap mache nan fènwa, men l’ap gen limyè lavi a".

Farizyen yo di l’: "W’ap sèvi pwòp tèt ou temwen; temwayaj ou a pa vrè".

Jezi pran lapawòl, li di yo: "Menm si m’ap sèvi pwòp tèt mwen temwen, temwayaj mwen an vrè, paske mwen konnen kote m’ sòti epi kote m’ a prale; nou menm menm nou pa konnen ni kote m’ sòti ni kote m’a prale. Nou menm n’ap jije daprè chè a, mwen menm menm mwen pa jije pèsòn. Epi si m’ jije, jijman m’ nan vrè, paske mwen pa pou kont mwen, men se mwen menm avèk sila a ki voye m’ nan, Papa a. Nan lalwa nou an, yo ekri se sou temwayaj de moun pou yo asire laverite a. Mwen sèvi pwòp tèt mwen temwen, epi Papa a tou sèvi m’ temwen, li menm ki voye m’ nan".

Yo t’ap di l’: "Kot Papa w’ la"?

Jezi reponn: "Nou pa konnen ni mwen menm ni Papa m’; si nou te konnen m’, nou ta kapab konnen Papa m’ tou".

Jezi deklare pawòl sa yo nan sal kèt la, antan l’ t’ap bay lansèyman nan kay sakre a; pèsòn pa met men sou li, paske lè l’ pa t’ ko rive.

An nou fè Lwanj ak konpliman pou pawòl Bondye a.

REFLEKSYON : Pawòl Bondye pou jodi a envite nou pote bon jijman sou moun ; sa vle di, evite pote jijman sou moun san ou pa konnen li byen osinon akoz enterè ou ki menase. Nan premye lèkti a, nou wè sitiyasyon Suzàn. Moun ki te vle eksplwate li seksyèlman te fè fo temwayaj sou li, yo te akize li kòmkwa li te kouche ak lòt gason ki pa mari li. Nou konnen nan tan sa a akizasyon sa a te kapab pote lanmò. Nan Levanjil la tou nou wè Farizyen ki vle jije Jezi paske yo pa konnen kote li sòti. Nan ka Suzàn Bondye te fè li prezan a travè lòt moun pou defann li. Jezi tou, tankou pitit Bondye, te gen fòs Lespri a ak li pou l’ te ka defann tèt li devan Farizyen yo.

Se vre nou ka toujou genyen moun ki pran pou nou nan yon sitiyasyon difisil nou twouve nou, men sa ki pi enpòtan se inosans nou ak laverite. Lè nou inosan, tankou nan ka Suzán, nou pa gen anyen pou nou pè. Nou inosan epi fè Bondye konfyans, konsa l’ap defann kòz nou, pafwa atravè moun nou pa panse osinon moun nou menm konn panse ki lènmi nou. Farizyen yo te konprann Jezi mal paske li te di li se limyè epi li bay temwanyaj pou tèt li. Yo pa t’ ka konprann Jezi se moun Bondye voye a paske entèrè yo te menase. Men Jezi, paske li konn kilès li te ye, te kanpe dyanm devan yo. Sa fè nou wè yon moun ki gen Bondye ak li ap ka kanpe dyanm nan move sitiyasyon lavi a.

Jije moun se yon bagay nou fò ladan li. Anpil fwa jijman nou yo se pa pou nou ede lòt la pran konsyans de eta li sinon pou nou detwi li ak detwi repitasyon li. Men san nou pa rann nou kont Bondye toujou voye yon lòt moun oubyen li konn prezan nan yon evènman pou li ede moun sa yo. Paske nou konn fè tout sa nou kapab pou nou detwi yon moun men nou pa kapab. Konsa tou nou konn viktim epi nou konn wè Bondye delivre nou san nou konn pa menm rann nou kont.

LAPRIYÈ : Granmèt, fè m’ lagras kontwole mwen nan jijman m’ap pote sou frè ak sè mwen yo. Ou ban mwen yo pou m’ede yo grandi ak ede yo viv pi byen sou tè a. Ede m’ toujou sonje misyon sa a. Amèn !

PWOPOZISYON : M’ap fè jefò jodi a pou m’ pa pote okenn move jijman sou pwochen mwen.