MADI 17

Koulè Vyolèt

PREMYE MOSO LABIB

"Mwen wè yon dlo k’ap sòti nan kay sakre a, tout moun li rive sou yo, dlo sa a sove yo".

NAN LIV PWOFÈT EZEKYÈL 47, 1-9. 12

Jou sa yo:

Mesaje a fè m’ vire jous nan pòt kay Granmèt la, men dlo t’ap sòti anba papòt la nan direksyon solèy leve a; sèke fas kay la t’ap gade nan direksyon solèy leve, dlo yo menm t’ap desann bò kote dwat kay sakre a, nan mitan lotèl la, li fè m’ sòti nan chemen ki t’ap gade nan direksyon solèy leve a; te gen dlo ki t’ap koule anpil sot nan kote dwat la.

Lè mesye a sòti nan direksyon solèy leve a, li te gen yon mèt nan men l’, li konte senk san mèt, li fè m’ travèsè nan dlo a, jous nan talon. Aprè sa, li konte senk san mèt, li fè m’ travèse nan dlo a jous nan jenou; li konte senk san epi li fè m’ travèse nan dlo a jous nan ren. Li konte senk san, se te yon ravin mwen pa t’ kapab travèse, paske dlo ravin fon an t’ap bouyi, yo pa t’ kapab travèse l’. Li di m’:

"Sètènman ou wè, pitit moun". Li kondui m’, li fè m’ travèse jous sou bò ravin nan.

Lè m’ vire, mwen wè anpil pye bwa sou bò ravin nan, sou chak kote. Li di m’: "Dlo sa yo, k’ap sòti pou y’al nan rejyon kot solèy leve a, y’ap desann nan plenn savann nan, y’ap antre nan lanmè a; y’ap sòti, dlo yo ap sèvi remèd : tout bèt vivan k’ap mouvmante, y’ap viv, tout kote ravin nan ap rive, ap gen anpil pwason, lè dlo sa yo rive kote sa a, tout bagay kote ravin nan rive a, y’ap geri, y’ap viv.

Anlè ravin nan, sou bò l’ chak bò, ap gen pye bwa k’ap leve, y’ap donnen fwi; fèy yo p’ap tonbe, yo p’ap manke fwi; chak mwa l’ap donnen premye fwi, paske dlo ravin nan se nan kay sakre a y’ap sòti, fwi l’ yo ap sèvi manje, fèy li yo ap sèvi remèd".

Pawòl Granmèt la.

SÒM 45. 2-3. 5-6. 8-9

R/ Granmèt lame yo avèk nou, kachèt pou nou Bondye Jakòb la.

Bondye se yon kachèt pou nou ak fòs, sekou nou jwenn tout tan nan tray. Se pousa nou pa pè, pandan tè a ap mouvmante, pandan mòn yo ap transpòte nan kè lanmè a.R.

Bò larivyè a mete kontantman nan vil Bondye a, joupa Sila a ki anwo nèt la, ki sen yo. Bondye nan mitan l’, li p’ap bouke;

Bondye pote l’ sekou depi granmaten.R.

Granmèt lame yo avèk nou, kachèt pou nou Bondye Jakòb la.Vini, gade aksyon Granmèt la, mèvèy li mete sou tè a.R.

LEVANJIL

"Menm lè a mesye sa a vin geri".

MEN BÒN NOUVÈL JEZIKRI A DAPRÈ JAN KI SEN 5, 1-3a. 5·16

Se te yon jou fèt Jwif yo, Jezi monte Jerizalèm.

Jerizalèm gen yon basen pou mouton yo, yo rele l’ nan langaj ebre Betsayid, li gen senk galri. Nan yo te gen yon pakèt foul moun ki te kouche, ak maladi, avèg, moun k’ap bwate, moun ki gen men yo seche; te gen yon mesye ki te la, li te gen trant uitan depi l’ te malad. Lè Jezi wè l’ kouche, li te konnen sa te fè anpil tan deja li te gen maladi a, li di l’: "Èske ou vle geri"? Malad la reponn li: "Granmèt, mwen pa gen pèsonn, pou voye m’ nan basen an, lè dlo a ap fè mouvman; lè m’ rive, yon lòt gen tan desann anvan m’", Jezi di l’: "Leve, pran nat ou, al mache". Menm lè a mesye sa a vin geri, li pran nat li a, li t’ap mache. Se te yon jou saba, Jwif yo di moun nan ki te geri a: "Se saba; ou pa gen dwa pran nat ou". Li reponn yo: "Sila a ki geri m’ nan, se li menm ki di m’: "Pran nat ou, mache".

Yo poze l’ kesyon: "Kilès moun sa a ki di ou pran nat ou, mache a"? Sila a menm ki te geri a, li pa t’ konnen ki moun sa; Jezi te wete kò l’ sot nan foul la ki te la a.

Aprè sa"Jezi jwenn li nan kay sakre a, li di l’: "Men ou geri, pa fè peche ankò, pou pi grav domaj pa rive ou". Mesye a ale, li bay Jwif yo nouvèl, li di se Jezi ki te fè l’ geri. Se pou sa Jwif yo t’ap pèsekite Jezi, paske li te fè bagay sa yo jou saba.

An nou fè Lwanj ak konpliman pou pawòl Bondye a.

REFLEKSYON : Frè ak sè m’ yo, litiji pawòl Bondye pou jodi a kapab pèmèt nou sonje feblès nou kòm moun ak mizerikòd Bondye ki manifeste nan feblès nou. Nan premye lekti a nou kapab souliye de ekspresyon : kay sakre ak dlo. Kisa de bagay sa yo vle di pou nou ? Premyèman, an nou konsidere kay sakre a : yo byen di nou, ‘‘kay sakre’’ ; yon non ak yon adjektif. Se pa de yon kay konsa konsa y’ap pale nou, men de yon kay ki sakre. Kay sakre a, li vle di kay kote Bondye abite, kay ke yo dwe respekte, kay kote moun pa kapab fè sa yo vle. Nou sonje sa ki te pase lè Jezi te jwenn moun yo t’ap fè komès nan kay sakre a, kòman li te fè yon gwo fwèt pou li kouri dèyè yo pou li kwape yo. Vrèman vre moun sila yo te vle konfonn sa ki sakre ak sa ki pwofán. E lè Jezi kouri dèyè yo pou li kale yo a, li te vle aprann yo fè distenksyon sa a. Lè yo pale nou de kay sakre, yo vle pale nou de Legliz la. Men atansyon ! Gen de fason pou nou konpran mo ‘‘Legliz la’’ : premyèman Legliz vle di tout moun ki kwè nan Bondye, k’ap mache dèyè Jezikri ; brèf, tout moun k’ ap suiv ansèyman Kris la. Se sa k’ fè yo pale de ‘‘Legliz Inivèsèl oubyen Legliz Katolik’’ (nan lang grèk, katolikôs = inivèsèl). Jezikri se fondatè Legliz la e se li ki tèt Legliz la. Si li se tèt, moun k’ap swiv li yo fòme kò a ansanm ak li. Dezyèmman, Legliz la vle di ‘kay kote moun yo reyini pou yo fè lwanj ak konpliman pou Bondye’. Nan premye lekti a, yo pale nou de yon dlo ki t’ap sòti anba papòt kay Granmèt la, nan direksyon solèy leve a. Sa a se sous dlo lagras Bondye rele nou pou nou plonje ladan li an, sous ki lave nou, ki pirifye nou e ki fè nou tounen yon moun tou nèf pou Bondye, yon pafen k’ap degaje bon lodè nan nen li.

Depi nan batèm nou, nou tounen manb Legliz la e nou genyen yon misyon ki pa piti. Misyon pè, pwofèt ak wa nan Jezikri. Misyon ke nou resevwa aprè nou fin plonje nan lanmò Kris la pou nou leve byen vivan ak li (batèm nan genyen 2 mouvman : plonje/ leve). Se premye sakreman ki fè nou antre nan Legliz la pou nou fè kò ak Kris la. E gras a sa, nou resevwa pwoteksyon nan men Bondye, nou jwenn yon fòs ki pèmèt nou lite epi venk tout fòs fènwa ki vle anpare nou. Sa pote yon gwo kontantman nou jwenn ki eksprime nan sòm 45 lan, « Granmèt lame yo avèk nou, kachèt pou nou Bondye Jakòb la ».

Kanta pou moso Levanjil Sen Jan nou li pou jodi a, li prezante nou yon mesaj ki klè : Pitit moun nan kontinye ap libere moun nan kò ak nan lespri. Nou wè kòman Juif yo te eskandalize, yo te estomake poutèt nèg sa ki te malad depi trantuit an, ke Jezi te libere jou Saba a. Jezi di mesye a : « pran nat ou, mache ». Sa se yon gwo mèvèy ! Aprè sa li di li : « Men ou geri, pa fè peche ankò, pou pi grav domaj pa rive ou ». Mesaj nou dwe kenbe pou jodi a, sèke Bondye renmen nou menm si tout moun rayi nou ; saba a fèt pou moun, se pa moun ki fèt pou Saba a. Pa genyen okenn prensip sosyete yo kapab mete pi wo pase lavi yon moun. Pa pwofite konpasyon Bondye pou nou kontinye ap benyen nan peche, paske malè ka rive nou.

LAPRIYÈ : Bondye, ou menm ki renmen mwen pase tout bagay, ou menm ki mete diyite mwen pi wo ke tout lwa ak prensip, tanpri fè m’ gen kouraj temwaye grandè w’ ak renmen ou chak jou nan lavi mwen.

PWOPOZISYON : M’ap chèche dekouvri nan ki fason mwen konn mal itilize kay sakre Granmèt la, nan ki fason mwen konn sal kò mwen ki se kay sakre Lespri Bondye a, m’ap mande Bondye pou li lave mwen nan sakreman penitans lan epi m’ap fè efò pou mwen toujou rete pwòp devan li.