JEDI 25

Koulè Vèt

PREMYE MOSO LABIB

“Aga anfante yon ti gason, pou Abraam, li rele non l’ Izmayèl”.

NAN LIV LAJENÈZ LA 16,1-12.15-16

Jou sa yo:

Saray, madanm Abram nan, pa t’ fè pitit; men li te gen yon esklav ejipsyen, yo te rele Aga, li di mari l’: “Men Granmèt la fèmen m’, pou m’ pa fè pitit; al jwenn sèvant mwen an, petèt omwen m’ap gen pitit gras a li”. Abram aksepte sa l’ mande a, li pran Aga, fi ejipsyen an, sèvant li a, aprè dizan depi yo te kòmanse abite nan peyi Kanaan an, li bay mari l’ li kòm madanm. Abram al kote l’. Men lè fi a wè li vin pote yon pitit nan vant, li meprize metrès li a.Saray di Abram: “Ou aji avèk mechanste kont mwen; mwen renmèt sèvant mwen an sou kè ou, li menm lè l’ wè li vin pote yon pitit nan vant, li koupe m’ kout je. Granmèt la ap jije ant mwen menm ak ou menm”. Abram reponn li: “Men, sèvant ou nan men ou; fè jan ou vle avèk li”.Saray maltrete l’; li sove. Lè Mesaje Granmèt la rankontre l’ bò sous dlo nan savann nan, ki sou wout Sour la nan dezè a, li di l’: “Aga, sèvant Saray, kote ou sòti, epi kote w’a prale?” Li reponn: “Mwen sove sot devan Saray, metrès mwen an”.

Mesaje Granmèt la di l’: “Tounen kay metrès w’a, rabese tèt ou anba men li”. Li di ankò: “M’ap fè ras ou vin anpil anpil, yo p’ap kapab konte l’, tèlman l’ap anpil”.

Aprè sa, li di: “Men, ou pote yon ti pitit nan vant, w’ap fè yon ti gason, w’ap rele non l’ Izmayèl, paske Granmèt la koute tray ou. Li menm l’ap yon gason ki gen fòs: men l’ kont tout moun, men tout moun kont li, l’ap plante joupa an fas rejyon tout frè l’ yo”.

Aga anfante yon ti gason pou Abram, li rele non l’ Izmayèl. Abram te gen katrevensizan, lè Aga anfante Izmayèl pou li a.

Pawòl Granmèt la.

SÒM REPONS 105, 1-2. 3-4a. 4b-5

R/ Fè lwanj Granmèt la, poutèt li bon.

Fè lwanj Granmèt la, poutèt li bon, poutèt kè sansib li pou tout tan. Kilès k’ap rakonte pouvwa Granmèt la, k’ap fè tande tout lwanj li yo? R.

Se chans pou moun ki obsève jijman l’, ki fè jistis pou tout okazyon.Sonje nou, Granmèt, nan bon kè ou genyen pou pèp ou a.R.

Vizite nou nan delivrans ou a, pou nou kapab wè byen sila yo ou chwazi yo, pou nou kontan nan kontantman nasyon w’ nan, pou nou jwenn lwanj nou avèk eritaj ou a.R.

LEVANJIL

“Kay ki bati sou wòch avèk kay ki bati sou sab”.

MEN BÒN NOUVÈL JEZIKRI A DAPRÈ MATYE KI SEN 7, 21-29

Lè sa a: Jezi di disip li yo:

“Se pa tout moun k’ap di m’: “Granmèt, Granmèt”, k’ap antre nan rè syèl la, men se moun ki fè volonte Papa m’ ki nan syèl la, se li menm k’ap antre nan rèy syèl la. Anpil moun ap di m’ jou sa a: “Granmèt, Granmèt, èske se pa onon ou nou te fè travay pwofèt, èske se pa o non ou nou te fè anpil mèvèy?” Lè sa a, m’ap deklare yo: “Mwen pa janm konnen nou: rale kò nou sot sou mwen, nou menm k’ap fè peche”.

Sèke tout moun ki tande pawòl mwen sa yo, epi ki reyalize yo, li sanble avèk yon moun sajès, ki bati kay li sou wòch; lapli tonbe, larivyè desann, van soufle, yo fonse sou kay sa a, li pa tonbe: sèke fondasyon l’ te sou wòch.

Tout moun ki tande pawòl mwen sa yo, men ki pa reyalize yo, li sanble ak yon moun sot, ki bati kay li sou sab; lapli tonbe, larivyè desann, van soufle, yo fonse sou kay sa a, li tonbe, tablati l’ la gran”.

Rive, lè Jezi fin di tout pawòl sa yo, foul yo te sezi poutèt lansèyman l’: sèke li t’ap anseye yo tankou moun ki gen pouvwa, men se pa tankou pwofesè yo ak farizyen yo.

An nou fè lwanj ak konpliman pou pawòl Bondye a.

REFLEKSYON: Nan premye moso Labib la, nou jwenn nan liv Lajenèz, nou wè kòman Saray, madanm Abram pa t’ ka fè pitit, li te bay Abram sèvant li pou te kapab fè yon pitit. Men aprè sa, sèvant lan t’ap taye banda sou Sara. Konsa Sara te maltrete l’ e li te sove kite kay la. Men mesaje Bondye te mande l’ retounen mande Sara eskiz e li te fè sa. Byen souvan, nou menm tou, lè yon moun fè yon byen pou nou, nou konn sòti pou nou bay moun nan pwoblèm aprè. Ann gade nan nou menm konbyen fwa nou aji konsa, pou nou kapab gen kouraj mande padon. Nan sòm 105 yo pwopoze nou pou jodi a, nou wè se toutan nou dwe fè lwanj pou Bondye, ni lè sa bon, ni lè sa pa bon, paske kè sansib Granmèt la se pou tout tan.

Jezi ban ou avètisman nan Levanjil Matye a, nan chapit 7, vèsè 21 : «Se pa tout moun k’ap di Granmèt, Granmèt k’ap antre nan rèy syèl la, se moun ki fè volonte Papa m’ ki nan syèl la». Pi devan li di moun ki koute pawòl li e ki mete yo an pratik, se tankou moun ki bati kay yo sou wòch, lè lapli vini, li rete fèm. E moun ki koute pawòl li ki pa mete yo an pratik, se tankou moun ki bati kay yo sou sab, lè lapli vini, lavalas pote kay la ale.

Nou menm, ann gade ki reyalite n’ap viv : pafwa nou byen fon nan Legliz, nou nan tout gwoup, nou nan tout selebrasyon k’ap fèt nan Legliz. Pafwa nou sanble moun ki pi sen nan Legliz la. Anpil fwa, tout se aparans, se kamouflay, paske nou pa mete pawòl Bondye an pratik, nou fè lekontrè.

Se pou nou fè atansyon nan fason n’ap sèvi Bondye, pou nou pa travay an ven, konsa n’a rive eritye wayòm syèl la.

LAPRIYÈ: Bondye Papa, n’ap mande w’ jodi a, ede nou mete pawòl ou yo an Pratik, ede nou kore lafwa nou sou pawòl ou yo, konsa n’a eritye wayòm ou pwomèt nou an.

PWOPOZISYON: Kore lafwa nou sou pawòl Bondye a, pou l’ kapab pote fwi nan lavi nou.