VANDREDI 26

Koulè Vèt

PREMYE MOSO LABIB

“Tout gason ap fè sikonsizyon nan siy kontra a. Sara ap anfante yon ti gason ba ou ”.

NAN LIV LAJENÈZ 17,1.9-10.15-22

Aprè Abram te kòmanse gen katrevendiznevan, Granmèt la parèt devan l’, li di l’: “Se mwen menm Bondye ki gen tout pouvwa a. Mache devan m’, se pou ou kòrèk nèt ”.

Bondye di Abraam ankò : «Ou menm, se pou ou kenbe kontra m’ nan, ni desandans ou aprè ou nan jenerasyon yo. Men kontra m’ nan, sa n’ap obsève ant mwen menm ak nou menm nan, ak desandans ou aprè ou : tout gason nan pami nou dwe fè sikonsizyon ».

Bondye di Abraam: “Saray, madanm ou an, ou p’ap rele l’ Saray, men Sara. M’ap beni l’, m’ap ba ou yon pitit sot nan li, m’ap beni pitit sa a. L’ap vin tounen anpil nasyon, wa pèp yo ap leve sot nan li”.

Abraam tonbe sou fas li, li ri, li di nan kè l’: “Èske ou kwè yon moun ki gen santan kapab fè pitit? epi Sara ki gen katrevendizan an, l’ap fè pitit?” Li di Bondye: “Se pou Izmayèl viv devan ou!”

Bondye di Abraam: “Sara, madanm ou, ap fè yon ti gason pou ou, w’ap rele non l’ Izaak; m’ap pase kontra m’ avèk li kòm kontra tout tan, ni avèk ras li aprè l’. Sou Izmayèl tou mwen tande ou: men m’ap beni l’, m’ap fè l’ vin anpil, m’ap fè l’ vin anpil anpil; l’ap fè douz chèf, m’ap fè l’ vin tounen yon gran nasyon. M’ap pase kontra m’ pou Izaak, li menm Sara ap anfante ba ou, menm epòk sa a ane pwochèn”.

Lè l’ fin pale avèk li, Bondye monte kite Abraam.

Pawòl Granmèt la.

SÒM REPONS 127, 1-2. 3. 4-5

R/ Men ki jan moun ki respekte Granmèt la beni.

Se chans pou tout moun ki respekte Granmèt la, k’ap mache nan wout li yo.

Se fwi travay men ou w’ap manje, se chans pou ou, w’ap jwenn avantaj.R.

Madanm ou ap tankou yon jaden rezen ki byen donnen sou bò lakay ou; pitit ou yo ap tankou jèn plant pye oliv alantou tab ou a.R.

Men se konsa moun nan ap beni, sa k’ respekte Granmèt la. Se pou Granmèt la beni ou sot Siyon, se pou ou wè byen Jerizalèm toulejou lavi ou.R.

LEVANJIL

“Si ou vle, ou kapab geri m””.

MEN BÒN NOUVÈL JEZIKRI A DAPRÈ MATYE KI SEN 8, 1-4

Lè sa a:

Pandan Jezi t’ap desann sot sou mòn nan, anpil foul t’ap suiv li. Men yon moun maladi lalèp rive, li adore l’, li di: “Granmèt, si ou vle, ou kapab geri m’”. Jezi lonje men l’, li touche l’, li di: “Mwen vle, se pou ou geri”. Menm lè a lalèp li a geri.

Jezi di l’: “Gade, pa di pèsòn sa; men ale, montre w’ devan prèt la, ofri kado a Moyiz te kòmande a kòm temwayaj pou yo”.

An nou fè lwanj ak konpliman pou pawòl Bondye a.

REFLEKSYON: Malgre Abraam te yon moun ki te gen lafwa, ki te gen yon relasyon pesonèl ak Granmèt la, te gen yon seri de bagay Abraam pa t’ janm kwè Granmèt la te ka fè pou li. 

Pa ekzanp Abraam te gen tan reziye l’ lontan nan zafè fè pitit. Ni li menm ni madam li, yo toulède te gen tan granmoun. Abraam te gen katrevendiznèf an, epi Madanm li te gen katrevendiz an, yo pa t’ gen pitit ansanm. Epoutan, Bondye fè l’ pwomès l’ap fè yon pitit ak madanm li, ki te pral bay li anpil desandans. Tèlman Abraam twouve sa enposib, se ri li tonbe ri lè l’ tande sa. 

Abraam te gen lafwa, men lafwa li te piti. Abraam pa t’ janm konnen si anyen pa enposib pou Granmèt la. Men Bondye si tèlman gran, li ka fè plis pou nou, plis pase sa nou kwè li ka fè. Abraam ak Sara te fè yon pitit tout bon, ki rele Izaak. Se nan pitit Abraam nan, Izaak, tout pèp Izrael la ki se pèp jwif la, pèp Wa David la, sòti.  Ata Jezi, ansanm ak Mari, Jozèf ak tout douz apot yo, se nan pèp sa yo sòti tou, sa vle di yo se desandan Abraam ak pitit Abraam, ki te Izaak. Pafwa nou menm tou, nou sanble ak Abraam. Gen yon seri de sityasyon nan lavi nou, ak nan peyi nou ki konn anvi fè nou pèdi lespwa. Nou panse sa pa janm regle. Nou reziye nou.  Nou bliye si Bondye kapab. Lafwa nou twò piti. 

Epoutan, si n’ louvri kè nou, si n’ louvri lespri nou, temwayaj Abraam nan, ansanm ak temwayaj moun maladi lalèp la ki te geri nan lekti Levanjil jodi a tou, yo ka ede nou kwè. 

Jezi vle geri nou, menm jan li te vle geri moun maladi lalèp la. Li vle, epi li kapab. 

PRIYE: Granmèt, mwen kwè nan ou, men lafwa mwen twò piti. Ogmante li, souple!  Amèn.

PWOPOZISYON: Gade nan ki fason nou kapab travay pou chanje kominote n’ap viv la.