LENDI 22

Koulè Vèt

PREMYE LEKTI

"Abram pati, jan Granmèt la te pase l’ lòd la".

LEKTI LIV LAJENÈZ 12, 1-9

Jou sa yo:

Granmèt la di Abram: «Pati sot nan peyi ou, ak nan fanmi ou, ak nan kay papa ou, vini nan peyi a m’a montre ou la. M’ap fè ou vin tounen yon gran nasyon, m’ap beni ou, m’ap fè non ou vin gran, w’ap beni. M’ap beni moun ki beni ou yo, m’ap madichonnen moun ki madichonnen ou yo, tout fanmi sou tè a ap beni nan ou».

Abram pati, jan Granmèt la te pase l’ lòd la, Lòt te pati avèk li tou. Abram te gen swasant-kenz-an, lè l’ kite Aran. Li pran Saray, madanm li, avèk Lòt, pitit frè l’ la, ak tout sa l’ te posede, ak tout mouton li te gen nan Aran; yo pati, y’ale nan peyi Kanaan an.

Lè yo rive la, Abram travèse peyi a jous nan kote yo rele Sikèm nan, jous nan tè fon ki gen renome a. Kananeyen an te nan peyi a lè sa a.

Granmèt la parèt devan Abram, li di l’: «Se ras ou m’ap bay peyi sa a». Li bati yon lotèl pou Granmèt la kote sa a, Granmèt la ki te parèt devan l’ nan. Li sot la, li travèse nan mòn nan, ki te anfas Betèl la, li drese joupa l’ la, li te gen Betèl nan direksyon solèy leve, avèk Ayi nan direksyon solèy kouche; li bati yon lotèl pou Granmèt la, la a tou; li lapriyè non l’. Abram mache, li vanse depase limit direksyon nan Sid.

Pawòl Granmèt la.

SÒM REPONS 32, 12-13. 18-19. 20-e 22 (r.: 12b)

R/ Se chans pou pèp sa a Granmèt la chwazi kòm eritaj li a.

Se chans pou nasyon ki gen Granmèt la pou Bondye l’, pèp sa a li chwazi kòm eritaj li a.

Nan syèl la Granmèt la gade, li wè tout pitit moun yo.R.

Men je Granmèt la sou moun ki respekte l’ yo, sou moun ki espere sou kè sansib li,

Pou l’ delivre nam yo sot nan lanmò, pou l’ ba yo manje nan grangou.R.

Nam nou ap konte sou Granmèt la, paske se sekou nou ak pwoteksyon nou li ye.

Se pou kè sansib ou vin sou nou, Granmèt, tankou nou te espere nan ou.R.

LEVANJIL

«Kòmanse wete bout bwa a sot nan je ou».

MEN BÒN NOUVÈL JEZIKRI A DAPRÈ SEN MATYE 7, 1-5

Lè sa a: Jezi di disip li yo:

«Pa jije, pou yo pa jije nou; sèke avèk jijman n’ap jije a, se avèk li y’ap jije nou; mezi n’ap mezire a, se avèk li y’ap renmèt nou.

Konsa, pouki sa w’ap gade ti pay la ki nan je frè w’ la, epi gwo bout bwa a ki nan je w’ la, ou pa wè l’? Oubyen kòman fè ou di frè w’ la: «Kite m’ wete ti pay la sot nan je ou», epi men yon gwo bout bwa nan je pa ou? Ipokrit, kòmanse wete gwo bout bwa a sot nan je ou, epi lè sa a w’a wè klè pou ou wete ti pay la sot nan je frè w’ la».

An nou fè lwanj ak konpliman pou pawòl Bondye a.

REFLEKSYON: Jodi a, Levanjil la raple nou pawòl Marechal la nan woman «Le Chevalier à la Rose» ke Hugo Von Hofmansthal te ekri a: «Se fason an ki fè gwo diferans la». Fason nou aji ap chanje rezilta nan plizyè aspè nan lavi nou, sitou nan kontèks espirityèl.

Jezi di nou: «Pa jije, pou yo pa jije nou» (Mt 7,1). Men Jezi di nou tou pou nou korije sila a ki nan peche a, e sa si poze nou te gen tan fè yon jijman kèlkonk. Menm Sen Paul jije nan tèks li yo kominote Korent la e Sen Pyè kondane Ananyas ak madanm li pou mansonj yo. Se pou sa Sen Jan Krizostòm jistifye sa lè li di: « Jezi pa di ke nou pa dwe evite yon pechè sispann peche, sètènman nou dwe korije li, men pa tankou yon ènmi k’ap chache vanjans, men pito tankou medsen an ki bay malad la yon remèd». Kidonk nou dwe jije ak entansyon pou nou korije, men pa ak entansyon pou nou vanje.

Men, sa Sen Ogisten di nou an pi enteresan toujou: « Granmèt la ba nou avèstisman pou nou pa kouri jije ak mechanste (…).  An nou reflechi dabò pou wè si nou pa t’ komèt menm peche a tou, an nou sonje frajilite pa nou, e an nou jije toutan ak entansyon pou sèvi Bondye, men pa pwòp tèt nou». Si nou wè pwòp peche nou atravè peche frè ak sè nou yo, sa Levanjil la di nou an p’ap rive, nou p’ap vle «retire ti pay nan je frè nou alòske nou gen yon gwo bout bwa nan je pa nou» (cf. Mt 7,3).

Si nou gen yon bòn fòmasyon, n’ap rive wè, prèske yon fason enkonsyan, sa ki bon ak sa ki pa bon nan lavi lòt yo: e n’ap rann yon jijman. Men lefèt ke nou wè fot lòt yo avèk yon vizyon ki pi laj tankou jan nou mansyone sa pi wo a, sa ap ede no unan «fason» nou jije: sa a ede nou pa jije jis pou nou jije oubyen jis pou nou fè yon kòmantè oubyen pou kache defo pa nou, oubyen tou senpleman paske tout moun fè sa. Pou fini, nou dwe sitou kenbe pawòl Jezi yo: « mezi n’ap mezire a, se avèk li y’ap renmèt nou» (Mt 7,2).

LAPRIYÈ: Granmèt, tanpri ede nou konbat ipokrizi ki nan kè nou pou nou kapab chèche amelyore pwòp tèt nou avan nou kritike ak jije lòt yo.

PWOPOZISYON: Jodi a m’ap pran yon ti tan pou reflechi sou pwòp tèt mwen. M’ap dekouvri limit mwen, feblès mwen, defo mwen. Konsa m’a fè efò pou mwen vin pi bon epi m’a ede lòt yo grandi tou.