SAMDI 6

Koulè Vèt

PREMYE LEKTI

"M’ap tounen al jwenn sila a ki voye m’ nan; nou menm fè konpliman pou Bondye".

LEKTI LIV TOBI 12, 1. 5-15. 20

Jou sa yo:

Tobi rele pitit li a, li di l’: "Ki sa nou kapab bay mesye sa a ki sen an, ki vini avèk ou a?" Yo rele l’, ni papa a ni pitit la, yo pran l’ apa, yo kòmanse mande pou l’ aksepte resevwa mwatye pòsyon nan tout sa yo pote yo.

Lè sa a atò, li di yo an kachèt: "Fè konpliman pou Bondye syèl la, epi devan tout vivan yo se pou nou fè lwanj pou li, paske li fè kè l’ sansib pou nou. Reyèlman vre sekrè wa a li bon pou yo kache l’, men aktivite Bondye yo, yo merite pou yo devwale yo, pou yo fè lwanj yo.

Lapriyè, ak jèn, ak lacharite pi bon pase kache trezò lò; paske lacharite delivre sot nan lanmò, se li menm ki pwòpte peche yo, li fè jwenn kè sansib ak lavi ki p’ap janm fini an.

Moun yo k’ap fè peche ak fot, se lènmi nam yo yo ye. M’ap montre nou laverite a, mwen p’ap kache pawòl sekrè a pou nou.

Lè ou te konn ap lapriyè a avèk dlo nan je ou yo, lè ou te konn ap antere mò yo, lè ou te konn kite manje ou la, epi ou te konn ap kache mò yo lajounen nan lakay ou a, epi ou te konn antere yo lannuit la, mwen menm menm mwen te prezante lapriyè ou la bay Granmèt la.

Paske ou te fè Bondye plezi, li te nesesè pou tray te eseye ou. Koulye a menm Granmèt la voye m’ pou m’ geri ou, ni Sara, madanm pitit ou a, pou m’ delivre l’ anba men demon an.

Se mwen menm Rafayèl, Mesaje a, youn nan sèt yo ki kanpe devan Granmèt la.

Li lè pou m’ tounen kot sila a ki te voye m’ nan. Kanta nou menm fè konpliman pou Bondye, rakonte tout mèvèy li yo".

Pawòl Granmèt la.

SÒM REPONS Tob 13, 2. 6. 7. 8 (r.: Ib)

R/ Granmèt, ou gran pou tout tan.

Sèke se ou menm ki pini, ki sove, ki kondui anba tè, ki ramne, pèsònn pa chape nan men ou.R.

Konsidere sa l’ fè pou nou, avèk respè ak krent se pou nou fè lwanj pou li, fè lwanj Wa syèk tan yo nan aksyon nou yo.R.

Mwen menm nan tè kote m’ ekzile a, m’ap fè lwanj li, paske li montre bèlte l’ nan yon nasyon ki nan peche.R.

Konsa se pou nou tounen, pechè yo, fè jistis devan Bondye, antan nou kwè l’ap fè kè l’ sansib pou nou.

LEVANJIL

"Pòv vèv sa a mete plis pase tout moun".

MEN BÒN NOUVÈL JEZIKRI A DAPRÈ SEN MAK 12, 38-44

Lè sa a:

Jezi t’ap di foul yo nan lansèyman l’ nan: "Fè atansyon pwofesè yo ki renmen pwonmennen nan gran manto, epi ki renmen pou moun yo salye yo sou laplas la, yo renmen chita nan premye plas yo nan kay reyinyon yo, yo renmen plas donè nan resepsyon yo; y’ap devore byen vèv yo sou pretèks lapriyè long yo fè sanblan ap fè; moun sa yo ap resevwa pinisyon ki pi rèd".

Jezi chita an fas sal kèt la; l’ap gade kijan foul la t’ap mete lajan nan kèt la; anpil moun rich t’ap mete anpil lajan. Yon pòv vèv vin rive, li mete de ti pyès, ki vo vensenk kòb.

Jezi rele disip li yo, li di yo: "An verite mwen di nou, pòv vèv sa a mete plis pase tout moun ki met lajan nan kèt la; sèke tout moun, se nan sa yo genyen an twòp yo bay; li menm menm se nan ti sa k’ pa menm kont pou li a, li pran, tout sa l’ te genyen, li bay li, tout sa l’ te bezwen pou l’ viv la".

An nou fè lwanj ak konpliman pou pawòl Bondye a.

REFLEKSYON: Tankou nan epòk Jezi t’ap viv la, jodi a gen anpil moun k’ap fè devosyon, e sitou sila yo ki espesyalis nan relijyon an, pafwa yo kapab tonbe nan tantasyon ipokrizi espirityèl, ki manifeste nan yon atitid vanite ke yo jistifye nan pretansyon ke yo pi bon pase lòt yo oubyen yo siperyè pase yo. Malgre sa, nou tout nou se kwayan, nou se moun k’ap lite pou nou kapab vin pi bon chak jou, pou nou kapab vin sen!

Pou montre nou kontradiksyon avèk pwofesè Lalwa yo, Levanjil la prezante nou jès ti pòv vèv la, yon jès ki plen senplisite, yon jès ki prèske pa ta siyifye anyen, men yon jès ke Jezi tèlman admire: «Yon pòv vèv vin rive, li mete de ti pyès, ki vo vensenk kòb». (Mt 12,42). Kado sa a te prèske san valè, men dezizyon ti malerèz sa a te montre li se yon fanm vanyan, yon fanm ki merite respè: Li te bay tout sa li te genyen pou viv.

Atravè jès sa a, li montre kijan li plase Bondye ak lòt yo pi wo pase pwòp tèt li ak pwòp bezwen pa li. Li te abandone li totalman nan men Pwovidans la. Li te lib de tout bagay, li pa t’ gen anyen pou li makonnen tèt li ankò, paske li te deside pou pwòp tèt pa li pou li mete tout bagay nan sèvis Bondye ak pòv yo. Jezi ki te temwen bagay sa a, li fè konpliman pou ti pòv la ki te bliye tèt li pou li te ka fè lwanj pou Bondye e pou li te ka pote lòt yo sekou; Jezi kalifye kado vèv la kòm kado ki te pi enpòtan nan tout kado ki te fèt nan menm kote a.

Kidonk, sa vle di, chwa fondamantal ki kapab libere nou an, se yon chwa ki fèt nan pwofondè konsyans nou, lè nou deside ouvri nou bay Bondye epi mete nou nan sèvis pwochen nou. Valè chwa nou an, li pa depann de kantite oubyen kalite aksyon nou men de kalite entansyon nou ak kalite kado lanmou ki sòti nan pwòp konsyans nou.

LAPRIYÈ: Jezi, tanpri ede m’ demakonnen ak tout sa ki anpeche m’ renmen e sèvi tout bon vre, menm jan ak ti pòv vèv la ki te bay tout sa li te genyen.

PWOPOZISYON: Aprann pataje sa m’ genyen ak sa mwen ye pou byen lòt yo.