VANDREDI 5

Koulè Wouj

BONIFAS KI SEN, EVÈK E MATI (MEMWA)

PREMYE LEKTI

"Se ou menm ki korije m’, se ou menm ki sove m’, epi men mwen wè pitit mwen an'.

LEKTI LIV TOBI 11, 5-17

Jou sa yo:

Án te chita bò wout la chak jou sou tèt mòn nan, kote li te kapab wè byen lwen. Antan nan kote sa a menm li t’ap kalkile kilè pitit li a ap vini, li gade byen lwen, menm lè a li rekonèt pitit li a k’ap vini; li kouri l’al anonse mari l’, li di: "Men pitit ou a ap vini".

Rafayèl di Tobi: "Gade, osito ou antre lakay ou, menm lè a adore Granmèt Bondye ou la; epi di l’ mèsi, aprè sa, pwoche kot papa ou, epi anbrase l’. Menm lè a, fwote je l’ ak fyèl pwason sa a, ou pote avèk ou a; se pou ou konnen yon ti moman apre, je l’ap louvri, papa ou ap wè limyè syèl la, l’ap kontan wè figi ou".

Lè sa a chyen an ki te avèk yo sou wout la, li kouri devan, li rive tankou yon mesaje, l’ap fè karès ak kè l’ tèlman li kontan. Papa l’ menm leve tou avèg la, li kòmanse ap kouri, antan l’ap bite ak pye l’; li bay ti gason an men l’, li kouri al rankontre pitit li a. Li anbrase l’, li bo l’, ansanm ak madanm li, yo tou le de yo kòmanse kriye ak kontantman. Lè yo fin adore Bondye, yo fin di l’ mèsi, yo chita.

Lè sa a atò, Tobi pran nan fyèl pwason an, li fwote je papa l’; li kite l’ prèske pandan demi-èd-tan. Gen tach blanch ki kòmanse sòti nan je l’, tankou kal ze. Tobi pran l’, li wete l’ sot nan je l’, menm lè a li rekòmanse wè. Yo fè konpliman pou Bondye, ni li menm, ni madanm li, ni tout moun ki te rekonèt li. Tobi t’ap di: "Mwen fè konpliman pou ou, Granmèt Bondye Izrayèl, paske se ou menm ki te korije m’, epi se ou menm ki sove m’; gade men mwen wè Tobi, pitit mwen an".

Pawòl Granmèt la.

SÒM REPONS 145, 2abc. 7. 8-9a. 9bc-10 (r.: 2a)

R/ Fè lwanj Granmèt la, nam mwen.

Fè lwanj Granmèt la, nam mwen; m’ap fè lwanj Granmèt la nan lavi m’,

M’ap chante kantik pou Bondye m’ nan, tout tan m’ap viv.R.

Li menm ki kenbe verite a pou tout tan, ki fè jijman pou moun y’ap maltrete yo, ki bay moun ki grangou yo manje. Granmèt la defèt chenn yo.R.

Granmèt la klere avèg yo, Granmèt la leve sa k’ tonbe yo, Granmèt la renmen moun ki kòrèk yo, Granmèt la pwoteje etranje yo.R.

Òfelen an ak vèv la, li soutni yo, men wout pechè yo, li gaye yo. Granmèt la ap wa pou tout tan, Bondye ou la, Siyon, pou jenerasyon ak jenerasyon.R.

LEVANJIL

"Kijan yo fè di Kris la se pitit David?"

MEN BÒN NOUVÈL JEZIKRI A DAPRÈ SEN MAK 12, 35—37

Lè sa a:

Jezi pran lapawòl, li di, antan l’ap bay lansèyman nan kay sakre a: "Kijan pwofesè yo fè di Kris la se pitit David? David menm di nan Lespri Sen an:

'Granmèt la di Granmèt mwen: Chita adwat mwen, joustan mwen mete lènmi ou yo kòm macheskalye pye ou'.

Konsa David li menm rele l’ Granmèt; ebyen kòman fè li se pitit li?" Anpil moun t’ap koute l’ avèk satisfaksyon.

An nou fè lwanj ak konpliman pou pawòl Bondye a.

REFLEKSYON : «Mwen fè konpliman pou ou, Granmèt Bondye Izrayèl, paske se ou menm ki te korije m’, epi se ou menm ki sove m’». Souvan, nou pa pran tan pou nou di Bondye mèsi pou sa l’ reyalize nan lavi nou, nan fwaye nou, nan peyi nou, nan travay nou, nan etid nou. Men nou plis pran tan pou nou mande Bondye lajan, machin, bèl kay, viza, maryaj, pitit, tout lòt bagay ke nou bezwen pou nou viv.

Wi, se vre bagay sa yo enpòtan pou nou ka gen yon vi diy men pafwa nou ba yo twòp enpòtans. Tobi rive lakay li, premye bagay li fè li adore Bondye nan lavi fanmi an, nan lavi li pou l’ rekonèt pouvwa Bondye, prezans Bondye nan lavi li.

Frè ak sè m’, se chak jou nou dwe di Bondye mèsi paske se gras a li menm ki fè n’ap viv. San prezans Granmèt la nou pa ka fè anyen. Ou mèt gen tout sa k’ sou tè a, si Bondye Granmèt la pa la tout bagay sa yo pa vo anyen. Nou pa ka viv san li paske, se Li menm ki pou soutni nou nan konba lavi a.

LAPRIYÈ : Rekonesans pa lachte pou yon kretyen. Mèsi Granmèt pou sa w’ ye pou nou ak pou sa w’ fè pou nou.

PWOPOZISYON : Pwofite pandan tan sa, pou bay chante yon mès pou w’ di Bondye mèsi pou sa l’ fè nan lavi w’, nan lavi fanmi w’, nan peyi w’, nan aktivite w’ yo. Pwofite yon moun mèsi pou sa l’ te fè pou ou.