VANDREDI 25

Koulè Vèt

PREMYE LEKTI

"Yon ti moman ankò, m’ap plen kay sa a ak bèlte".

LEKTI LIV PWOFÈT AJE 2, lb-10

Nan dezyèm ane wa Dariyis, sou setyèm mwa a, venteyinyèm jou mwa a, pawòl Granmèt la rive pa lantremiz pwofèt Aje, li di: "Pale ak Zorobabèl, pitit Salatyèl, chèf Jida, ni ak Jezi, pitit Losedèk, prèt an chèf la, ni ak tout rès pèp la, w’a di: « Kilès ki rete nan pami nou, ki te wè kay sa a nan bèlte lontan l’ nan? Epi sa nou wè koulye a? Èske sa k’ la a koulye a se pa tankou si se pa t’ anyen, devan je nou? Koulye a pran kouraj, Zorobabèl, deklarasyon Granmèt la, pran kouraj, Jezi, pitit Losedèk, prèt an chèf, pran kouraj, tout pèp tè a, deklarasyon Granmèt lame yo; reyalize (paske mwen avèk nou, deklarasyon Granmèt lame yo), reyalize pawòl la mwen te angaje avèk nou an, lè nou t’ap kite peyi Lejip la; lespri m’ ap nan mitan nou: pa pè».

Paske men pawòl Granmèt lame yo: «Yon ti moman ankò, m’ap souke syèl la ak tè a ak lanmè a ak dezè a, m’ap souke tout nasyon yo; Sila a tout nasyon yo ap tann nan, l’ap rive, m’ap plen kay sa a ak bèlte, deklarasyon Granmèt lame yo. Lajan an se pou mwen, lò a se pou mwen, deklarasyon Granmèt lame yo. Bèlte dènye kay sa a ap pi gran pase premye a, deklarasyon Granmèt lame yo, nan kote sa a, m’ap bay lapè, deklarasyon Granmèt lame yo».

Pawòl Granmèt la.

SÒM REPONS 42, 1. 2. 3. 4 (r.: cf 5bc)

R/ Espere nan Bondye; m’ap fè lwanj li, delivrans fas mwen ak Bondye mwen.

Jije m’, Bondye, ekzamine kòz mwen sot nan men nasyon ki pa sen; anba men moun mechan an k’ap bay manti a, sove m’.R.

Paske ou se Bondye kachèt mwen; pouki sa ou te repouse m’ nan, pouki sa m’ap mache tou tris, pandan lènmi m’ ap fè m’ pase tray? R.

Voye limyè ou ak verite ou; se yo menm k’ap kondui m’, k’ap mennen m’ sou mòn ou a ki sen an, ak nan joupa ou la.R.

M’ap antre kot lotèl Bondye a, kot Bondye kè kontan m’ ak fèt mwen an.

M’ap fè lwanj ou sou gita, Bondye, Bondye m’.R.

LEVANJIL

"Ou se Kris Bondye a. Pitit moun nan gen pou l’ soufri anpil".

MEN BÒN NOUVÈL JEZIKRI A DAPRÈ SEN LIK 9, 18-24

Lè sa a:

Jezi t’ap lapriyè pou kont li, disip yo te avèk li. Li poze yo kesyon, li di: "Kilès foul yo di mwen ye?"

Yo reponn, yo di: "Jan Batis; dòt menm Eli; dòt ankò se youn nan pwofèt lontan yo ki leve".

Men li di yo: "Nou menm menm kilès nou di mwen ye?"

Simon Pyè pran lapawòl, li di: "Kris Bondye a".

Jezi menm menase yo, li pase yo lòd sevè pou yo pa di pèsònn sa, li di: "Sèke Pitit moun nan gen pou l’ soufri anpil, pou ansyen yo rejte l’, ni chèf prèt yo, ni pwofesè yo, l’ap mouri, men sou twazyèm jou a, l’ap leve vivan".

An nou fè lwanj ak konpliman pou pawòl Bondye a.

REFLEKSYON

Pawòl Bondye pou jodi a envite nou reflechi sou idantite ak pèsonalite Jezi. Nan sans sa a, nan levanjil jodi a, gen 2 kesyon ke Mèt la poze tout moun. Premyè kesyon an mande yon repons statistik, apwoksimatif: "Kilès foul yo di mwen ye?" (Lik 9,18). Li pouse nou gade nan antouraj nou pou nou wè kòman lòt yo rezoud kesyon sa a: vwazen yo, kòlèg travay yo, zanmi yo, fanmi yo. Nou gade nan antouraj nou e nou santi nou plis responsab (sa depan de ka a) oubyen nou prèske bay menm repons a kesyon a kèk nan kesyon ke sila yo ki an afè avèk nou fòmile. E repons la di nou anpil, li enfòme nou, sou sa moun ki pwòch nou yo vle oubyen sa y’ap chache. Repons la ede nou chache amoni, dekouvri sa nou gen an komen ak lòt la pou nou ka vanse pou pi devan.

Gen yon dezyèm kesyon ki konsène nou menm menm: «Nou menm menm kilès nou di mwen ye?» (Lik 9,20). Se yon kesyon fondamantal ki frape pòt kay nou, ki rive jwenn nou chak: Yon adezyon oubyen yon rejè; yon venerasyon oubyen yon endiferans; mache avèk Li e nan Li oubyen pwoche bò kote li akoz yon senp atachman… Kesyon sa a delika, li se yon kesyon fondamantal paske li touche nou pa anndan. Kisa bouch nou ak aksyon nou di? Èske nou vle viv nan fidelite ak sila ki se e ki bay lavi nou yon sans? Èske tout bon vre nou vle suiv li ak senserite sou chemen lavi a? Èske nou dispoze suiv li Jerizalèm sou chemen lakwa a ak laglwa a?

«Se yon chemen lakwa ak rezireksyon. Lakwa a se leve Kris la anlè. Li menm menm Li te di sa: «Men mwen menm, lè y'a leve m'anlè sou tè a, mwen gen pou m' rale tout moun vin jwenn mwen.» Kidonk, lakwa a se laglwa ak ekzaltasyon Kris la» (Sen Andre de Krèt). Èske nou pare pou nou pran wout Jerizalèm nan ansanm ak Jezi. Sèlman avèk li, nan li, pa vre?

LAPRIYÈ: Jezi, se avè w’ mwen vle mache nèt ale. Tanpri, ban m’ fòs pou m’ suiv ou tout rès vi mwen.

PWOPOZISYON: Kilès Jezi ye pou mwen? Èske se yon moun konsa konsa, oubyen èske se yon moun trè enpòtan pou mwen?