SAMDI 6

Koulè wouj

PÒL MIKI AK KONPAYON L’ YO KI SEN, Mati

(Memwa)

PREMYE MOSO LABIB

"M’ap viv se vre, men se pa mwen menm ankò; se Jezikri k’ap viv nan mwen".

LEKTI LÈT APOT PÒL KI SEN POU GALAT YO 2, 19-20

Frè m’ yo:

Akoz lalwa a mwen mouri parapò a lalwa a, pou m’ viv parapò a Bondye; mwen kloure sou kwa a avèk Jezikri.

Mwen viv, men se pa mwen menm ankò k’ap viv, se Jezikri k’ap viv nan mwen.

Si m’ap viv koulye a nan chè a, se nan lafwa Pitit Bondye a m’ap viv, li menm ki renmen m’, ki bay pwòp tèt li pou mwen.

SÒM REPONS: 125, 1-2ab.

2cd-3. 4-5. 6;

R/ Moun ki simen ak dlo nan je, yo ranmase ak kè kontan.

Lè Granmèt la te fè prizonye Siyon yo tounen an, nou te tankou nan rèv.

Lè sa a bouch nou te plen ak kè kontan epi lang nou ak fèt.R.

Lè sa a yo t’ap di nan pami nasyon yo: "Granmèt la fè mèvèy avèk yo".

Granmèt la fè mèvèy avèk nou; nou vin gen kè kontan.R.

Granmèt, fè prizonye nou yo tounen tankou ravin nan sid yo.

Moun ki simen ak dlo nan je, yo ranmase ak kè kontan. R.

Yo t’a prale, yo t’ap kriye, antan y’ap pote semans pou simen an,

Y’ap vini sou wout la ak fèt, pandan y’ap pote zepi yo.R.

LEVANJIL

"Ale anseye tout nasyon yo".

MEN BÒN NOUVÈL JEZIKRI A DAPRÈ MATYE KI SEN

28, 16-20

Le sa a:

Onz patizan yo pati nan Lagalile, sou mòn nan kote Jezi te endike yo a; lè yo wè l’, yo adore l’, men kèkzen te fè dout.

Jezi pwoche, li pale avèk yo, li di: "yo renmèt mwen tout pouvwa nan syèl la ak sou tè a. Konsa ale, anseye tout nasyon yo, batize yo o non Papa a ak Pitit la ak Lespri Sen an, aprann yo obsève tout sa m’ te kòmande nou yo.          .

Men mwen menm mwen avèk nou toulejou, jou finisman syèk tan yo".

REFLEKSYON:

«MWEN AVÈK NOU TOU LEJOU, JOUS FINISMAN SYÈK TAN YO».

Jodi a, n’ap fete Sen Pòl Miki ak konpayon l’ yo ki sen, ki te mouri mati nan sèzyèm syèk, nan peyi Japon. Tankou onz apot yo, nan jou Lasansyon Jezikri a (Mt.28, 17), yo menm tou yo te ale sou tèt ‘‘mòn’’ nan: nan ka pa yo a, se tèt mòn soufrans lakwa a ke yo te monte nan lavil Nagazaki.

Pandan n’ap sonje sila yo ki te mouri mati a, se vle nou vle montre ke istwa Legliz la «se yon istwa ki make ak laglwa, paske se yon istwa sakrifis», - pou nou repete pwòp pawòl Pap Franswa.

Istwa soufrans Pòl Miki ak konpayon l’ yo ki sen an, dekri anbyans lapriyè ke yo te retwouve yo, lè yo yo te tou vivan sou lakwa a. Èske nou ka pale de yon pi gwo adorasyon ke priyè sa yo t’ap fè ak konfyans la, lè yo te temwaye renmen Bondye a ki depase tout bagay la, e ki te menm depase pwòp lavi yo?

Plis toujou, istwa rakonte nou kòman Pòl Miki- antan li te sou lakwa a- li pwofite menm nan dènye moman li te nan agoni, li mande sila yo ki t’ap asasinen li pou yo chèche vin pi pre Bondye, lè li di: «Avèk tout kè mwen, mwen padone wa a ak nou tout ki responsab lanmò mwen e mwen mande nou, tanpri, resevwa batèm Kris la». Tout sitiyasyon, tout sikonstans, menm si li parèt defavorab, li se yon opòtinite pou nou transmèt Levanjil la.

Vrèman vre, kalamite ki frape nou nan lemond pa ta dwe tounen eskiz pou diminye agajman nou ak detèminasyon nou: Pap Franswa di nou, bagay sa yo dwe tounen defi ki fè nou grandi. Nou p’ap janm manke konkou; Jezi pa voye nou nan misyon nenpòt kòman. Se li ki te di nou: «Mwen avèk nou toulejou jis finisman syèk tan yo.» (Mt.28, 20)

LAPRIYÈ: Bondye, se ou menm ki fòs tout sen yo. Ou rele Pòl avèk konpayon l’ yo pou yo antre nan lavi a sou wout kwa a. Yo pase mati pou ou, yo vin sen, y’ap plede kòz nou. Tanpri, n’ap lapriyè ou. Lafwa n’ap deklare a, fè nou kenbe l’ fèm jous nou mouri. Pa pouvwa Jezikri.

PWOPOZISYON: Jodi a, menm jan ak Pòl Miki, m’ap temwaye renmen Bondye a, menm si m’ap soufri.