DIMANCH 10

Koulè Blan

TWAZYÈM DIMANCH PAK, ANE C

PREMYE MOSO LABIB

“Nou menm nou sèvi pawòl sa yo temwen, ak Espri Sen an”.

NAN TRAVAY APOT YO 5, 27b-32. 40b-41

Jou sa yo:

Gran prèt la poze Apot yo kesyon, li di: “Nou te pase nou lòd sevè pou nou pa t’ bay lansèyman sou non sa a; epi gade nou plen Jerizalèm ak ansèyman nou an nou vle fè san mesye sa a tonbe sou nou”.

Pyè menm reponn ak Apot yo, yo di: “Nou dwe obeyi Bondye plis pase lèzòm. Bondye papa nou yo te leve Jezi, li menm nou te touye a antan nou te pandye l’ sou kwa a. Bondye leve l’ adwat li kòm chèf ak sovè, pou l’ bay Izrayèl regrè ak delivrans peche yo. Kanta nou menm, nou sèvi pawòl sa yo temwen, ak Espri Sen an Bondye bay tout moun ki obeyi l’ yo”.

Yo avèti Apot yo pou yo pa janm pale o non Jezi, epi yo lage yo. Yo menm menm yo pati tou kontan sot devan tribinal la paske yo te konsidere yo te merite soufri move tretman pou non Jezi.

Pawòl Granmèt la.

SÒM REPONS 29, 2 e 4.5 e 6. 11 e 12a e 13b

R/ M’ap fè lwanj ou, Granmèt, paske ou delivre m’.

M’ap fè lwanj ou, Granmèt, paske ou delivre m’, ou pa bay ènmi m’ yo kè kontan sou do m’.Granmèt, ou wete lavi m’ sot anba tè a, ou fè m’ viv, pou m’ pa desann nan fòs la.R.

Chante pou Granmèt la, sen l’ yo, fè lwanj pou souvni l’ ki sen. Sèke pou yon moman kòlè l’ rive, men se pou lavi renmen l’ nan dire. Nan aswè gen dlo nan je, nan maten se kè kontan.R.

Koute, Granmèt, pran pitye pou mwen, Granmèt, pote m’ sekou. Ou chanje plent mwen an an chante dans. Granmèt Bondye m’, pou tout tan m’ap fè lwanj ou.R.

DEZYÈM MOSO LABIB

“Li merite sa, Mouton an yo te touye a, pou l’ resevwa pouvwa ak ran Bondye a”.

NAN LIV APOKALIPS APOT JAN KI SEN 5, 11-14

Mwen menm Jan, mwen wè, mwen tande vwa anpil zanj alantou fotèy la ak vivan yo ak ansyen yo; kantite yo se te mil milyon ki t’ap pale ak vwa byen fò: “li merite sa, Mouton an yo te touye a, pou l’ resevwa pouvwa ak ran Bondye, ak sajès, ak fòs, ak konsiderasyon ak glwa, ak benediksyon”.

Tout kreyati ki nan syèl la ak sou tè a ak anba tè a, ni sa k’ nan lanmè a, yo tout mwen tande y’ap di: “Pou sila a ki chita sou twòn nan ak pou Mouton an benediksyon, konsiderasyon, glwa ak pouvwa pou tout tan gen tan”. Kat vivan yo t’ap di: “Amèn”. Vennkat ansyen yo tonbe sou fas yo, yo adore sa a k’ap viv pou tout tan gen tan an.

Pawòl Granmèt la

LEVANJIL

“Jezi rive, li pran pen an, li ba yo ak pwason an”.

MEN BÒN NOUVÈL JEZIRI A DAPRÈ JAN KI SEN 21, 1-19

Lè sa a:

Jezi parèt ankò devan disip yo bò lanmè Tiberyad la. Men kijan li te parèt la.

Se te Simon Pyè ak Toma, sa yo rele Didim nan, ak Natanayèl, moun Kana Galile a, ak pitit Zebede yo ak de lòt nan disip li yo, yo te ansanm. Simon Pyè di yo: “M’a pral lapèch”. Yo di l’: “N’a prale avèk ou tou”. Yo sòti, yo monte nan batiman an, men nan nuit sa a yo pa pran anyen.

Lè granmaten rive, Jezi te kanpe sou bò lanmè a men disip yo pa t’ rekonèt se te Jezi.

Jezi di yo: “Timoun yo, èske nou gen pwason”?

Yo reponn li: “non”.

Li di yo: “Voye filè a adwat batiman an, n’a jwenn”. Yo voye l’, yo pa t’ kapab redi l’, tèlman te gen anpil pwason. Disip Jezi te renmen an di Pyè: “Se Granmèt la”. Lè Simon Pyè tande se Granmèt la, li pase rad li nan ren l’, (li te nikò), li lage kò l’ nan lanmè. Lòt disip yo rive nan batiman an (yo pa t’ lwen tè a, se te apeprè san mèt) y’ap remòke filè pwason yo.

Lè yo desann atè a, yo wè chabon dife ki poze, epi pwason ak pen sou li, Jezi di yo: “pote nan pwason yo nou sot pran koulye a”. Simon Pyè monte, li redi file a atè, plen ak gwo pwason, sansenkant twa. Epi malgre te gen tout kantite sa a, filè a pa chire. Jezi di yo: “Vin manje”. Pèsòn nan sa k’ t’ap manje yo pa t’ gen kouraj mande l’: “Kilès ou ye”? Yo te konnen se Granmèt la. Jezi rive, li pran pen an, li ba yo, ni pwason an tou.

Sa te fè twazyèm fwa Jezi te parèt devan disip li yo, lè l’ te fin resisite sot nan pami mò yo.

Lè yo fin manje, Jezi di Simon Pyè: “Simon pitit Jan, èske w’ renmen m’ plis pase sa yo”? Li di l’: “Wi, Granmèt, ou konnen mwen sansib pou ou”. Li di l’: “Okipe ti mouton m’ yo”.

Li di l’ ankò: “Simon pitit Jan, èske ou renmen m”?

Li di l’: “Wi Granmèt, ou konnen mwen sansib pou ou”.

Li di l’: “Okipe ti mouton m’ yo”.

Li di l’ pou twazyèm fwa a: “Simon pitit Jan, èske ou sansib pou mwen”?

Pyè pran lapenn, paske li te di l’ twazyèm fwa a “Èske ou sansib pou mwen”? Li di l’: “Granmèt, ou konnen tout bagay; ou konnen mwen sansib pou ou”. Li di l’: “Okipe bann mouton m’ yo”.

An verite, an verite mwen di ou, lè ou te pi jèn, ou te konn mare ren w’, epi ou ale kote w’ te vle; men lè w’ap vin vye, w’ap lonje men w’ yon lòt ap mare ren w’, l’ap kondui w’ kote ou pa vle”. Li te di sa pou l’ montre ki kalite mòd jan lanmò li t’ap sibi pou l’ fè wè glwa Bondye. Lè l’ fin di sa, li di l’: “Suiv mwen”.

An nou fè lwanj ak konpliman pou pawòl Bondye a.

REFLEKSYON

Jodi a se twazyèm dimanch Pak. Dimanch sa a se pwolongasyon dimanch Rezireksyon an, kote nou selebre kokenn chenn evènman leve byen vivan Jezi a; se yon evènman ki enpòtan nan lavi nou kòm kretyen, kòm moun k’ap chèche asirans yo nan Bondye.

Tankou Sen Pòl te di sa, nan youn nan lèt li yo, si Kris la pa t’ resisite, lafwa n’ pa t’ap kanpe sou anyen. Fèt Pak la se fèt kè kontan, se fèt limyè, lajistis, laverite, solidarite, pèseverans. Se mèvèy Pak sa a k’ap oryante lavi nou chak jou, ki ba nou tout enèji pou n’ kontinye mache travay pou bati wayòm Bondye a tout kote n’ pase, kòmanse nan fanmi n’ yo ak nan kote n’ap travay yo.

Toutotan gen tèt ansanm, youn kore lòt, youn sansib pou lòt, youn travay men nan men ak lòt, youn sèvi lòt, se Pak n’ap selebre! Sa vle di, n’ap viv reyalite nouvo lavi nan Lespri Bondye a ki abite nan nou an.

Jan, nan Liv Apokalips la fè n’ konnen kòman Sila a ki leve byen vivan sòti pami mò yo, li merite tout glwa, konpliman, lwanj, respè ak adorasyon. Vivan yo ak ansyen yo, ansam ak tout zanj yo te la pou yo te remèt Granmèt la onè li merite, li menm ki te rabese tèt li nan kondisyon moun nou an pou l’ te ka sove n’ anba pouvwa peche ak lanmò a, pou l’ pataje lavi pa l’ la ak nou.

Liv Lajenèz la pale nou sou kreyasyon linivè ak tout sa ki ladan l’. Ladan l’ nou dekouvri Bondye te kreye nou pou n’ adore l’ epi viv nèt ale bò kote l’. Peche a , dezobeyisans la te vin mete nou dozado ak Bondye;, men Li te voye pwòp Pitit li a vin rekonsilye nou ak li nan mizerikòd li ki san limit la. Nou dwe fè kè n’ kontan e nou dwe mete n’ an aksyon pou n’ gaye Bòn Nouvèl renmen Bondye a pou limanite, pou n’ deklare delivrans li pote pou tout moun alawonnbadè, pou n’ envite yo kase tèt tounen vin jwenn Bondye nan fè sa ki byen, nan mete nou youn nan sèvis lòt.

Nan Levanjil la, nou wè Jezi ki leve byen vivan an, li parèt nan mitan disip li yo san yo pa t’ konnen si se li. Li parèt tankou yon moun nòmal, men lè yo dekouvri konsekans pawòl Jezi di yo a, yo vin wè se te Mèt la.

Yo di nou yon tèm ki enpòtan avan yo te konprann se te Jezi. Yo di n’: Disip Jezi renmen an… sa vle di se renmen Bondye a chak jou ki pou ede n’ dekouvri prezans li nan mond lan. Renmen Bondye sa a, san dout ki nan nou chak, ki se pi gran mèvèy. Se pou nou antre nan fon kè nou, pou n’ dekouvri vrè pèsonalite n’, pou n’ kapab rive viv an akò ak sa n’ye a.

Jezi ki mouri, ki leve epi k’ap manje epi k’ap pale ak zanmi l’ yo, se yon reyalite ki depase tout konpreyansyon nou, men ki mande nou pou nou kite Lespri Sen an ede n’ pou n’ viv reyalite Pak la nan bon zèv, nan makonnen aksyon n’ yo ak kwayans nou, pou n’ prezève lavi, pou n’ defann lavi, pou n’ travay pou rekonsilyasyon moun ak Bondye, moun ak moun, epi moun ak pwòp tèt li.

Bondye gen konfyans nan nou malgre feblès nou. Anpil fwa nou ezite nan anpil desizyon, angajman; men Jezi vle di n’ ale pi devan, pa abandone, fè sa n’ gen pou n’ fè a. Li swiv nou nan chak ti moman lavi n’, san l’ pa pouse n’, tankou yon papa k’ap mache sou menm pa ak pitit li pou l’ aprann li mache, tankou yon manman ki aksepte deranje l’ nan somèy devan tout ti « way » pitit li fè sou kabann. Bondye n’ nan sansib pou nou e li prèt pou l’ mache ak nou, pou l’ travay ak nou. Se pou Bondye beni nou!

LAPRIYÈ: Granmèt, mèsi pou lavi pa w’ la ou pataje ak nou nan vini w’ te vin bay pwòp lavi w’ pou nou. Ede n’ konprann chak jou kòman w’ renmen n’, epi ede n’ mete n’ chak jou nan sèvis Levanjil, pou nou ka kontinye kolabore nan travay liberasyon tè a. Amèn!

PWOPOZISYON: Pataje sa ou genyen ak yon moun ki nan bezwen.