DIMANCH 3

Koulè Blan

DEZYÈM DIMANCH PAK, ANE C

PREMYE MOSO LABIB

“Foul moun yo ki kwè yo t’ap devlope nan Granmèt la”.

NAN TRAVAY APOT YO

5, 12-16

Pa pouvwa men Apot yo te gen anpil siy ak pwodij ki t’ap fèt nan pèp la; yo tout te rete ansanm nan pòtay Salomon an. Pèsòn dòt moun pa t’ pran chans vin jwenn yo, men pèp la t’ap fè lwanj yo.

Foul gason ak fi ki te kwè nan Granmèt la t’ap vin pi plis tout tan; a tèl pwen yo t’ap pote malad yo sou plas yo, yo te poze yo sou kabann yo ak sou nat yo, pou lè Pyè rive, o mwen lonbraj li te kouvri kèk nan yo, pou yo delivre anba maladi yo. Ata foul ki te sòti nan vil tou prè Jerizalèm yo, yo te vini, yo te pote moun ki malad ak moun espri papwòp t’ap maltrete; yo tout te geri.

Pawòl Granmèt la.

SÒM REPONS 117, 2-4.22-24. 25-27a

R/ Fè lwanj Granmèt la poutèt li bon, poutèt kè l’ sansib pou tout tan.

Se pou Izrayèl di sa koulye a, poutèt li bon, poutèt kè l’ sansib pou tout tan. Se pou kay Aawon an di, poutèt kè l’ sansib pou tout tan. Se pou sa yo ki respekte Granmèt la di: poutèt kè l’ sansib pou tout tan.R.

Wòch la bòs mason yo te rejte a, se li menm ki vin tounen tèt kwen an, se nan Granmèt la sa sòti pou l’ fèt, se yon bagay ekstrawòdinè nan je nou. Sa a se jou Granmèt la fè a: se pou nou fete, se pou nou kontan nan li.R.

Granmèt, sove m’, Granmèt, bay kè kontan. Konpliman pou sa a k’ap vini o non Granmèt la. Konpliman pou nou sot nan kay Granmèt la. Bondye Granmèt la klere nou.R.

DEZYÈM MOSO LABIB

“Mwen te mouri, men mwen vivan pou tout tan gen tan”.

NAN LIV APOKALIPS APOT JAN KI SEN 1, 9-11a. 12-13. 17-19

Mwen menm, Jan, frè nou, ki patisipe nan tray ak peyi wa a ak pasyans nan Jezikri, mwen te nan zile a yo rele Patmòs la, poutèt pawòl Bondye a ak temwayaj Jezi a. Mwen te nan espri a nan jou Granmèt la, mwen tande yon gran vwa dèyè m’ tankou yon foul ki t’ap di: “Sa w’ wè a, ekri l’ nan liv, voye l’ bay sèt legliz yo ki nan Azi a”.

Mwen vire pou m’ wè vwa a ki t’ap pale avèk mwen an; lè m’ vire, mwen wè sèt chandelye an lò, epi nan mitan sèt chandelye an lò yo se tankou yon Pitit moun, ki abiye ak pouvwa, li te gen yon senti an lò ki te mare ren l’ jous nan lestomak li.

Lè m’ wè l’, mwen tonbe nan pye l’, kòm si m’ te mouri, li poze men dwat li sou mwen, li di: “Pa pè; se mwen menm premye a ak dènye a; mwen vivan, mwen te mouri, men m’ap viv pou tout tan gen tan, mwen gen kle lanmò a ak anba tè a. Ekri sa ou wè yo ak sa k’ la a ak sa k’ gen pou yo rive aprè bagay sa yo”.

Pawòl Granmèt la.

LEVANJIL

“Aprè ui jou, Jezi rive”.

MEN BÒN NOUVÈL JEZIKRI A DAPRÈ JAN KI SEN 20, 19-31

Lè aswè rive, jou sa a, premye jou semèn nan, tout pòt yo te fèmen, kote disip yo te rasanble poutèt yo te pè Juif yo, Jezi rive, li kanpe nan mitan, li di yo: “Lapè pou nou”. Pandan l’ap di sa, li montre yo men yo ak bò kòt la. Disip yo kontan, lè yo wè Granmèt la.

Li di yo ankò: “Lapè pou nou. Menm jan Papa a voye m’ nan, mwen menm tou mwen voye nou”. Lè l’ fin di sa, li soufle, li di yo: “Resevwa Espri Sen an. Moun nou renmèt peche yo, peche yo ap renmèt, moun nou kenbe peche yo, y’ap ret kenbe”.

Toma menm, youn nan douz yo, sa yo rele Didim nan, li pa t’ avèk yo lè Jezi te vini an. Lòt disip yo di l’: “Nou te wè Granmèt la”.

Li menm li di yo: “Si m’ pa wè mak klou yo nan men l’, si m’ pa met dwèt mwen nan plas klou yo, si m’ pa met men m’ nan kòt li, mwen p’ap kwè”.

Aprè ui jou, disip li yo te anndan an ankò, Toma te avèk yo. Jezi rive, pòt yo te fèmen, li kanpe nan mitan, li di: “Lapè pou nou”. Aprè sa, li di Toma: “Met dwèt ou isit, gade men m’, lonje men ou, mete l’ nan bò kòt mwen, sispann ret san lafwa, se pou ou gen lafwa”.

Toma reponn, li di l’: “Granmèt mwen ak Bondye m’”!

Jezi di l’: “Paske ou wè m’, Toma, ou kwè; ala kontantman pou moun ki pa wè epi ki kwè”.

Jezi fè anpil lòt siy ankò devan disip li yo, yo pa ekri nan liv sa a. Sa yo, yo ekri yo, pou nou kwè Jezi se Kris Pitit Bondye, epi pou antan nou kwè a, nou gen lavi o non l’.

An nou fè lwanj ak konpliman pou pawòl Bondye a.

REFLEKSYON

Jodi a, yon lòt fwa ankò Jezi parèt devan disip li yo. Fwa sa a li mande pou nou aprann kwè san nou pa wè ak de je nou, san nou pa manyen sa n’ kwè. Se sa lafwa ye : se kwè san ou pa wè, se aksepte Jezi, se koube devan Jezi, se di li tankou Toma : «Granmèt mwen, Bondye mwen ! », san ke nou pa fè doutans menm jan ak Toma. Jezi mande nou sispann «Sen Toma»; se pou nou aprann kwè san nou pa wè. Selon Sen Jan, «wè» se rankontre ak Jezi, se eksperyans renmen an, eksperyans mèvèy Bondye nan lavi m’. Disip Jezi yo te wè li, y’ale e yo rete avèk li.

Jezi leve, li leve vivan, alelouya ! Li leve tout bon vre jan Labib la te di sa. Premye disip Kris la te temwen gwo evènman sa. Se sa nou kwè e nou dwe kwè.

Poutèt sa a, frè m’ak sè m’ yo, fete Pak se fete Jezi ki leve byen vivan, ki mete pye sou kou lanmò a pou lavi kapab triyonfe. Jezi kraze lanmò e lavi jayi toupatou. Fete Pak se fete lapè. Jezi di nou : «Lapè pou nou».

Patizan Pak yo, patizan Jezi yo anonse lapè ; yo renmen lapè, yo vle lapè pou tout moun. Lapè Jezi a pa gen koulè, li pa gen nasyonalite, li pa baze sou posibilite ekonomik, li pa vann nan mache, se pa ak zam ou jwenn li, li pa dakò moun fè moun abi ni chifonnen dwa moun. Lapè Jezi ki resisite a, se kè kontan, se kè poze, se renmen youn ak lòt, se youn padone lòt, se lespri bon konprann li pote pou nou. Se sa k’ fè nou ka di byen fò : “Jezi leve, li leve tout bon vre” ! Se pou Bondye beni nou byen beni.

LAPRIYÈ: Bondye Papa, ou menm ki leve Jezi sòti pami mò yo, men pitit ou yo ; pa kite lanmò nouvo tan sa yo kontinye toupizi nou. Ba nou fòs pou nou rele byen fò : Jezi leve, li leve byen vivan ! Alelouya ! Amèn.

PWOPOZISYON :An montre kijan Jezi leve vivan antan n’ap divòse ak lespri vanjans la pou nou marye ak lespri mizerikòd la.