LENDI 9

Koulè Blan

PREMYE LEKTI

"Èske nou te resevwa Lespri Sen an lè nou te kwè a"?

NAN TRAVAY APOT YO 19, 1-8

Pandan Apolon te Korent, Pòl travèse rejyon anwo yo, li rive Efèz, li jwenn kèk disip. Li di yo: "Èske nou te resevwa Lepri Sen an lè nou te kwè a"? Yo di l’: "Nou pa menm tande pale sou Lespri Sen an". Li di: "Nan ki sa nou te batize"? Yo di: "Nan batèm Jan an". Pòl di: "Jan te batize pèp la nan batèm penitans, antan li te di pou yo kwè nan sila a ki gen pou l’ vini aprè l’ la, sila a menm sa vle di nan Jezi".

Lè yo tande sa, yo batize o non Granmèt Jezi. Lè Pòl poze men sou yo, Lespri Sen an vin sou yo; yo t’ap pale nan lang, yo t’ap fè deklarasyon pwofèt. Tout mesye yo te apeprè douz. Li antre nan kay reyinyon an, li pale avèk asirans pandan twa mwa, l’ap diskite, l’ap bay prèv sou rèy Bondye a.

Pawòl Granmèt la.

SÒM REPONS 67, 2-3. 4-5ac. 6-7ab

R/ Rèy tè yo, chante pou Bondye.

Bondye leve, se pou lènmi l’ yo gaye; se pou sila yo ki rayi l’ yo sove kò yo devan fas li. Tankou lafimen gaye, ou gaye yo; tankou lasi fonn devan fas dife, konsa moun peche yo peri devan fas Bondye.R.

Se pou moun ki kòrèk yo fè kè yo kontan, pou yo danse devan Bondye, se pou yo jwi nan kè kontan. Chante pou Bondye, di kantik pou non l’; Granmèt la se non l’ sa.R.

Papa òfelen yo ak jij vèv yo, Bondye nan lakay li ki sen an. Bondye ki fè pòv yo abite nan yon kay, ki kondui prizonye yo nan richès.R.

LEVANJIL

"Pran konfyans, mwen ranpòte laviktwa sou tè a".

MEN BÒN NOUVÈL JEZIKRI A DAPRÈ JAN KI SEN 16, 29-33

Lè sa a:

Disip yo di Jezi: "Koulye a menm w’ap pale klè, ou pa di anyen an parabòl. Koulye a nou konnen ou konnen tout bagay, pèsòn pa bezwen poze ou kesyon: konsa nou kwè se nan Bondye ou sòti". Jezi reponn yo: "Koulye a nou kwè? Men lè a ap rive, li deja rive, chak moun ap gaye kote pa l’, n’ap kite m’ pou kont mwen; men mwen pa pou kont mwen, paske Papa a avèk mwen. Mwen di nou bagay sa yo pou nou gen lapè nan mwen. Sou tè a n’ap gen tray, men, konfyans, mwen ranpòte laviktwa sou tè a".

An nou fè lwanj ak konpliman pou pawòl Bondye a.

REFLEKSYON: Jodi a nou gen enpresyon moun yo prèske pa gen lafwa nan Jezi ankò nan mond nou an. Gen twòp enfòmasyon k’ap sikile kont sipò moral n’ap chèche nan yon lavi ki fonde sou Pawòl Bondye a. Valè sosyete konsomasyon an kapitalis la, plezi lachè a se bagay ki alamòd e ki ale nan sans kontrè ak tout sa ki ta kapab makonnen ak ekzijans Levanjil la.

Poutan, pakèt valè sa yo ak mòd lavi sa yo, yo pa ni ede moun nan devlope nan nivo pèsonèl, ni ba li lapè nan kè ak lespri li; okontrè se malè, enkyetid ak angwas yo pote. Èske nou pa kwè se akoz tout bagay sa yo ke moun yo nan lari, yo fèmen sou yo menm, y’ap viv ak enkyetid pou avni yo ki pa klè, paske yo mize lavi yo sou pri yon bèl machin, yon apatman oubyen vakans ke yo pa kapab peye?

Pawòl Jezi yo envite nou gen konfyans: « Men, konfyans, mwen ranpòte laviktwa sou tè a» (Jan 16,33), sa vle di, akoz Soufrans li, Lanmò li ak Rezireksyon li, li jwenn lavi k’ap dire pou tout tan an, lavi ki san obstak la, lavi ki san limit la, paske li te venk tout limit yo e li te depase tout difikilte yo.

Moun ki pou Kris la ap gen laviktwa sou tout difikilte menm jan ak li, menm si nou dwe pase nan divès lanmò ak rezireksyon youn apre lòt, bagay nou pa vle, men ke nou soufri nan menm Mistè Pak Kris la. Èske lanmò yon zanmi se pa lanmò? Separasyon ak yon moun ke nou renmen anpil? Echèk yon pwojè oubyen konfwontasyon ak limit oubyen frajilite nou kòm moun? San dout sa fè nou soufri.

Men « sou tout bagay sa yo, nou genyen batay la nèt ale, gremesi moun ki renmen nou an» (Wom 8,37). Se pou nou temwaye lanmou Bondye a, paske « Bondye ki gen tout pouvwa a fè anpil bèl bagay »

LAPRIYÈ: Bondye Papa, tanpri fè semans lavi toutan nou te resevwa nan batèm nan grandi nan nou pou pou li kapab pote fwi nan lavi nou. Pa pouvwa Jezikri.

PWOPOZISYON:M’ap revize atitid ak konpòtman mwen yo pou mwen kapab chanje tout sa ki fè mwen kanpe lwen limyè verite a.