DIMANCH 19

Koulè Vèt                        

12 ZYÈM DIMANCH ÒDINÈ, ANE C

PREMYE LEKTI

“Y’ap gade sila a yo pike a”.

NAN LIV PWOFÈT ZAKARI 12, 10-11

Men pawòl Granmèt la:

“M’ap vide yon lespri favè ak lapriyè sou kay David la ak sou moun ki abite Jerizalèm yo: y’ap gade m’, mwen menm yo te pèse a, y’ap kriye sou li, yon rèl tankou pou yon sèl pitit gason, y’ap plenn sou li, tankou yo konn plenn pou lanmò premye pitit gason.

Jou sa a, rèl la ap gran nan Jerizalèm, tankou rèl Adadremon nan plenn Megido a”.

Pawòl Granmèt la.

SÒM REPONS 62, 2. 3-4. 5-6. 8-9

R/ Nanm mwen swaf ou, Granmèt, Bondye mwen.

Bondye, se Bondye m’ ou ye. se kote ou m’ap veye depi granmaten. Nanm mwen swaf ou, chè mwen anvi ou.R.

Nan tè savann nan, ki sèk la, ki san dlo a, se konsa mwen parèt devan ou nan kay sakre a, pou m’ wè fòs ou ak bèlte ou. Sèke kè sansib ou pi bon pase lavi yo, bouch mwen ap fè lwanj ou.R.

Konsa m’ap fè konpliman pou ou nan lavi m’, o non ou m’ap leve men m’. Tankou ak vyann ak bon manje gra nanm mwen plen, ak pawòl fèt bouch mwen ap fè lwanj ou.R.

Paske ou pote m’ sekou, anba vwal zèl ou m’ap fete. Nanm mwen kole apre ou, men dwat ou soutni m’.R.

DEZYÈM LEKTI

“Nou tout ki batize, nou abiye ak Jezikri”.

NAN LÈT APOT PÒL KI SEN, POU GALAT YO 3, 26 29

Frè m’ yo:

Nou tout nou se pitit Bondye gras a lafwa a, ki nan Jezikri a. Reyèlman vre nou tout ki batize nan Jezikri, nou abiye ak Jezikri. Pa gen kesyon Juif ni Grèk, nan pwen ni esklav ni moun lib, pa gen gason ni fi: sèke nou tout se yon sèl nou fè nan Jezikri.

Si nou pou Jezikri, konsa nou se ras Abraam, eritye daprè pwomès la.

Pawòl Granmèt la.

LEVANJIL

“Ou se Kris Bondye a. Pitit moun nan gen pou l’ soufri anpil”.

MEN BÒN NOUVÈL JEZIKRI A DAPRÈ LIK KI SEN 9, 18-24

Lè sa a:

Jezi t’ap lapriyè pou kont li, disip yo te avèk li. Li poze yo kesyon, li di: “Kilès foul yo di mwen ye?”

Yo reponn, yo di: “Jan Batis; dòt menm Eli; dòt ankò se youn nan pwofèt lontan yo ki leve”.

Jezi di yo: “Nou menm menm kilès nou di mwen ye?”

Simon Pyè pran lapawòl, li di: “Kris Bondye a”.

Jezi menm menase yo li pase yo lòd sevè pou yo pa di pèsònn sa, li di Pitit moun nan gen pou l’ soufri anpil, pou ansyen yo rejte l’, ni chèf prèt yo, ni pwofesè yo, l’ap mouri, men sou twazyèm jou a, l’ap tounen vin vivan.

Li t’ap di tout moun: “Si yon moun vle vin apre mwen, se pou l’ renonse pwòp tèt li, pou l’ pran kwa l’, chak jou, pou l’ suiv mwen. Reyèlman vre, moun ki vle sove lavi l’, l’ap pèdi l’: moun ki pèdi lavi l’ poutèt mwen, l’ap sove li”.

An nou fè lwanj ak konpliman pou pawòl Bondye a.

REFLEKSYON: “Nou menm menm kilès nou di mwen ye?”

Jodi a, nan Levanjil la, Jezi poze nou yon kesyon-kle, fondamantal. Lavi nou depann de sa: «Nou menm menm kilès nou di mwen ye?» (Lik 9,20). Nan non lòt patizan Jezi yo, Pyè bay yon repons rapid ak yon lafwa ki klè: «Kris Bondye a». E nou men, jodi a, ki repons nou bay? Èske nou vrèman konnen Jezi pou nou reponn kesyon sa a? Nou kapab konnen Jezi pi plis nan lapriyè, nan lekti ak meditasyon Levanjil la, nan lavi sakreman yo ak Legliz la.  Toutotan nou poko kapab bay yon repons tankou Pyè, yon repons ki sòti nan fon kè nou, ebyen Jezi poko ap transfòme lavi nou. Nou dwe rive santi sa Pyè te santi a.

Levanjil jodi a ankouraje nou suiv Jezi ak kè nou senp, antan nou pare pou nou pote kwa nou. Lè nou suiv Jezi nan fason sa a, nou kapab jwenn delivrans la, libète. Sen Abwaz di nou: «Sa ki rive lò a, li rive Legliz la tou; sa vle di, lè li pase sou dife, li pa santi anyen ki fè l’ mal, okontrè li vin pi bèl».

Oken kontraryete, okenn pèsekisyon pou koz Wayòm Bondye a pa dwe fè nou pè, okontrè yo dwe fè nou gen plis espwa e menm plis kè kontan. Lè ou bay lavi ou pou Kris la, se pa pèdi ou pèdi li, men se genyen ou genyen li pou tout tan. Jezi mande nou pou nou viv nan senplisite ak fidelite Levanjil la; li vle ke se ak pwòp libète nou nou ofri li eksistans nou. Sa vo lapenn pou nou bay lavi nou pou Wayòm Bondye a!

Sa ki enpòtan pou nou kòm kretyen, se swi Jezi, imite li, viv lavi lagras la, kidonk se rete avèk Bondye. Sen Ogisten di nou:«Bondye fè li moun pou moun nan te ka vin tounen Bondye, yon bagay ki te enposib avan». Se pou Bondye ede nou viv divinite li a nan chè nou, gras ak konkou fòs Lespri Sen an.

LAPRIYÈ: Granmèt, ou menm ki se Papa bon kè a, ou menm ki renmen nou chak epi ki devwale kè sansib ou an favè nou, tanpri, ede n’ kite Lespri w’ la anvayi nou pou n’ ka tounen  vrè temwen leve byen vivan w’ lan. Amèn

PWOPOZISYON: M’ap kontanple Jezi nan fason li sove mwen.