MÈKREDI 29

Koulè Wouj

PYÈ AK PÒL KI SEN, Apot

(Gran Fèt)

PREMYE LEKTI

«Koulye a mwen konnen tout bon vre Granmèt la delivre m’ sot nan men Ewòd.

LEKTI LIV TRAVAY APOT YO 12, 1-11

Jou sa yo:

Wa Ewòd lonje men l’ pou l’ fè kèk moun nan Legliz la pase mati. Li touye Jak, frè Jan an, avèk epe. Lè l’ wè sa fè Juif yo plezi, li pase lòd arete Pyè tou. Se te jou azim yo. Lè l’ fin fè arete l’, li fè mete l’ nan prizon, li renmèt li nan men kat eskwad sòlda ki gen kat sòlda nan chak pou yo siveye l’, li te vle fè l’ konparèt devan pèp la aprè Pak la. Yo te kenbe Pyè nan prizon an; men priyè t’ap monte san rete nan Legliz la kot Bondye pou li.

Lè Ewòd t’a pral fè l’ konparèt la, nan nuit sa a menm, Pyè t’ap dòmi nan mitan de sòlda, li te mare ak de chenn, te gen sòlda devan pòt la ki t’ap siveye prizon an.

Anj Granmèt la vin kanpe, limyè klere nan kay la, li frape Pyè sou kote, li reveye l’, li di: «Leve byen vit». Chenn yo tonbe sot nan men l’.

Anj la di l’: «Met sentiwon ou, met sapat ou nan pye ou». Li fè sa. Li di l’: «Abiye ou, suiv mwen». Li sòti, li suiv li, san l’ pa konnen sa anj la t’ap fè a t’ap fèt vre; li te konprann se nan rèv li te ye. Yo travèse premye santinèl la, epi dezyèm nan, yo rive nan pòt an fè a ki kondui nan vil la; li louvri devan yo, yo sòti, yo pase nan yon koridò; menm lè a anj la kite l’.

Lè sa a atò, Pyè retounen nan li menm epi li di: «Koulye a mwen konnen tout bon vre Granmèt la voye anj li a, li delivre m’ sot nan men Ewòd ak nan tout sa pèp Juif yo t’ap tann nan».

Pawòl Granmèt la.

SÒM REPONS 33, 2-3. 4-5. 6-7. 8-9

R/ Nan tout tray mwen yo Granmèt la sove m’.

M’ap fè konpliman pou Granmèt la tout tan, tout tan lwanj li nan bouch mwen. Nan Granmèt la nanm mwen ap jwenn konsiderasyon l’, se pou pòv yo tande, pou yo kontan.R.

Fè lwanj Granmèt la avèk mwen, se pou nou leve non l’ anlè ansanm, mwen chèche Granmèt la, li reponn mwen, anba tout sa k’ fè m’ pè, li delivre m’.R.

Gade nan direksyon l’, n’ap klere, fas nou p’ap wont. Pòv sa a rele, Granmèt la koute l’, anba tout tray li li sove l’.R.

Anj Granmèt la ap veye alantou moun ki krenn li yo, l’ap delivre yo.

Goute, n’a wè jan Granmèt la bon; ala kontantman pou moun ki espere nan li.R.

DEZYÈM LEKTI

«Sa k’ rete pou m’ resevwa a, se kouwòn jistis la y’ap ban mwen-an».

LEKTI DEZYÈM LÈT APOT PÒL KI SEN POU TIMOTE  4,6-8. 17-18

Ou menm mwen renmen anpil:

Mwen deja fin bay tèt mwen kòm sakrifis, lè a rive pou m’ pati nèt. Mwen batay bon batay la, mwen fini kous mwen, mwen kenbe lafwa a. Sa k’ rete pou m’ resevwa a, se kouwòn jistis la, sa Granmèt la ap ban mwen jou sa a, li menm ki jij kòrèk la; pa sèlman pou mwen, men pou sa yo ki renmen jou l’ap vini an.

Fè vit vin jwenn mwen san pèdi tan. Granmèt la menm te kanpe kote m’, li te ban m’ asirans, pou prèch mwen te kapab transmèt Pawòl la byen, pou tout nasyon yo te kapab tande l’. Mwen delivre sot nan bouch lyon an. Granmèt la delivre m’ sot anba tout move mannèv, l’ap sove m’ nan peyi wa li a. Konpliman pou li pou tout tan gen tan. Amèn.

Pawòl Granmèt la.

LEVANJIL

«Ou se Pyè, m’ap ba ou kle peyi wa syèl yo».

MEN BÒN NOUVÈL JEZIKRI A DAPRÈ MATYE KI SEN 16, 13-19

Lè sa a:

Jezi rive nan rejyon Sezare Filip la, li poze disip li yo kesyon, li di: «Kisa moun yo di Pitit moun nan ye? »

Yo menm yo di: «Genyen se Jan Batis, dòt menm se Eli, dòt ankò se Jeremi oubyen youn nan pwofèt yo».

Jezi di yo: «E nou menm ki sa nou di mwen ye?»

Simon Pyè pran lapawòl, li di: «Ou se Kris, Pitit Bondye vivan an».

Jezi pran lapawòl, li di l’: «Ala kontantman pou ou, Simon, pitit Jan, paske se pa ni chè ni san ki devwale ou sa, men Papa m’ ki nan syèl la. Mwen menm mwen di ou ou se Pyè, sou wòch sa a m’ap bati Legliz mwen an, epi pòt lanfè yo p’ap ranpòte viktwa kont li; m’ap ba ou kle peyi wa syèl yo, tout sa w’ap mare sou tè a, l’ap mare nan syèl la, tout sa w’ap lage sou tè a, l’ap lage nan syèl la tou».

An nou fè lwanj ak konpliman pou pawòl Bondye a.

REFLEKSYON: Jodi a n’ap fete Pyè ak Pòl ki sen, ki se de poto mitan Legliz Jezikri a. Kilès Pyè te ye? Kilès Pòl te ye? Ki relasyon mesye sa yo te genyen ak Jezi? Mesye sa yo pa gen menm istwa, yo chak yo te fèt nan yon fanmi diferan, yo te gen edikasyon pa yo, yo te gen mòd lavi pa yo. Men, yon jou konsa Jezi te chwazi yo pou li te kapab asosye yo nan travay levanjelizasyon an, travay liberasyon mond lan. Pyè se te yon pechè pwason. Yon jou Jezi te mande li kite aktivite pèch la, kite kannòt la, kite senn nan, pou li te kapab tounen pechè moun avèk senn Levanjil la. Epi Levanjil jodi a rakonte yon misyon espesyal Jezi te konfye Pyè nan yon kontèks dyalòg espesyal. Jezi di li: «… m’ap ba ou kle peyi wa syèl yo, tout sa w’ap mare sou tè a, l’ap mare nan syèl la, tout sa w’ap lage sou tè a, l’ap lage nan syèl la tou».Se menm misyon sa ke pap ki pase nan istwa Legliz la kontinye, se menm misyon sa a ke Pap Franswa ap kontinye jounen jodi a.

Men gen yon bagay ki enteresan ki ka atire atansyon nou; sèke menm Pyè ki te renye Jezi twa fwa a, pou li te di li pa t’ konnen li an, se menm Pyè sa Jezi te remèt kle Legliz la. Se menm Pyè sa a tou Jezi te di nan lapasyon an «mete epe a nan fouwo li, tout moun ki itilize epe, se kout epe k’ap touye yo»; se menm Pyè sa a tou Jezi te di «pran swen mouton m’ yo». Aprè Pyè te fin trayi Jezi, li te repanti, li te dezole, li te pran wout penitans la. Se yon fason pou nou konprann, menm si Legliz Jezikri a sen (paske se Lespri Sen an k’ap dirije li ep se Jezi ki tèt la), men Legliz la se pechè ki ladan li, moun k’ap chèche vin kòrèk, moun k’ap chèche fè sa ki bon. Moun Bondye rele pou asosye nan misyon Kris la, yo se pechè, yo pa diy, men se Jezikri li menm menm k’ap sanktifye Legliz li a.

Pami tout apot yo, nou konnen Sen Pyè se figi prensipal la, paske se li menm Jezi te remèt kle Legliz la ak responsabilite mouton yo. «Ou se yon wòch, Pyè. Se sou wòch sa a m'ap bati legliz mwen. Ata lanmò p'ap kapab fè l' anyen» (Mt 16,18). Sen Pòl li menm, nou konnen kijan Granmèt te rele li pami pechè yo, pou gras a Levanjil la, li te rive chanje anpil kè ak mantalite. Se konsa Jezi te pale ak li pou premyè fwa: « Sòl, Sòl, poukisa w'ap pèsekite mwen konsa?» (Travay Apot yo 22,7), lè li te sou wout pou t’al pèsekite kretyen yo. Lavi li, konsepsyon li, mantalite li te vin chanje radikalman aprè rankont li ak Jezi sou wout Damas la, e se konsa li te vin tounen yon misyonè zele, li te yon bon konseye, yon gran vwayajè. Tanpèt ak gwo van pa t’ fè li pè nan anons Levanjil la. Temwayaj li kontinye sèvi nou jous jounen jodi a. An nou di Granmèt mèsi pou lavi Pyè ak Pòl, ki te kite mistè renmen Bondye a penetre yo, pou answit yo te ka kominike lanmou sa bay Legliz la.

LAPRIYÈ: Bondye, ou menm ki bay yon kè kontan ki mande respè e ki sen, pou jou sa a, nan gran fèt apot Pyè ak Pòl, fè Legliz ou a favè pou l’ toujou suiv lòd pa yo a nan tout bagay, kòm se nan men yo li te resevwa premye prensip relijyon an.Pa pouvwa Jezikri.

PWOPOZISYON: M’ap pran yon ti tan pou m’ evalye misyon mwen kòm apot Jezikri.