VANDREDI 3

 Koulè Blan

SAKRE-KÈ

(Gran Fèt)

PREMYE LEKTI

“M’ap okipe mouton m’ yo, m’ap fè yo kouche”.

NAN LIV PWOFÈT EZEKYÈL 34, 11- 16

Men pawòl Granmèt Bondye: “Men m’ap chèche mouton m’ yo, m’ap vizite yo: menm jan yon gadyen vizite bann mouton l’, jou li nan mitan bann mouton l’ yo ki gaye yo, konsa m’ap vizite mouton m’ yo, m’ap delivre yo sot nan tout kote yo te gaye jou nyaj ak bwouya, m’ap mennen yo sot nan pami pèp yo, m’ap ranmase yo sot nan peyi yo, m’ap fè yo antre nan peyi yo a, m’ap swen yo sou mòn Izrayèl yo, bò larivyè yo ak nan tout kote moun abite nan peyi a; nan bon pak zèb m’ap fè yo manje, sou mòn Izrayèl yo ki pi wo yo y’ap jwenn manje yo. M’ap swen mouton m’ yo, m’ap fè yo kouche, deklarasyon Granmèt Bondye. Sa k’ te pèdi a, m’ap chèche l’; sa yo te rejte a, m’ap fè l’ tounen; sa k’ te blese a, m’ap panse l’; sa k’ te malad la, m’ap ba l’ lasante; sa k’ gra a, ki fò a, m’ap konsève l’; m’ap swen yo nan jistis”.

Pawòl Granmèt la.

SÒM REPONS 22, l-3a, 3b-4. 5. 6

R/ Granmèt la swen m’, mwen p’ap manke anyen.

Granmèt la ap kondui m’, anyen p’ap manke m’; nan zèb vèt li enstale m’, sou bò dlo trankil li mennen m’, li refè nanm mwen.R.

Li kondui m’ nan santye jistis poutèt non l’. Sèke menm si m’ap mache nan bafon lonbraj lanmò, mwen p’ap pè malè, paske ou avèk mwen. Baton ou ak bagèt ou, se yo k’ap konsole m’.R.

Ou pare yon tab devan fas mwen kont sila yo k’ap fè m’ pase tray; ou swen tèt mwen ak losyon, kalis mwen ap debòde.R.

Reyèlman vre se bon kè ak kè sansib k’ap rapousuiv mwen tout tan lavi m’, m’ap abite nan lakay Granmèt la pou tout longè tan yo.R.

DEZYÈM LEKTI

“Bondye montre kijan li renmennou”.

NAN LÈT APOT PÒL KI SEN, POU WOMEN YO 5, 5-11

Frè m’ yo:

Renmen Bondye a gaye nan kè nou gras a Lespri Sen an li ba nou an. Poukisa Jezikri, malgre nou te fèb toujou a, li mouri pou pechè yo, lè tan an rive a? Apèn yon moun kapab aksepte mouri pou yon lòt ki kòrèk; pou yon moun debyen, petèt yon moun kapab aksepte mouri. Men Bondye montre jan l’ renmen nou, paske, malgre se pechè nou te ye, Jezikri mouri pou nou nan tan fikse a. Konsa

koulye a menm, etan nou vin kòrèk pi plis ankò gras a san l’, n’ap sove gras a li sot nan kòlè a. Si malgre nou te lènmi, nou vin rekonsilye ak Bondye nan lanmò

Pitit li a, koulye a menm etan nou fin rekonsilye avèk li a, se pi plis toujou n’ap sove nan lavi l’. Se pa sèlman sa, men n’ap jwenn bèlte nan Bondye pa lentèmedyè Granmèt nou Jezikri ki rekonsilye nou an.

Pawòl Granmèt la.

LEVANJIL

“Fè kè nou kontan avèk mwen, paske mwen jwenn mouton m’ nan ki te pèdi a”.

MEN BÒN NOUVÈL JEZIKRI A DAPRÈ LIK KI SEN 15, 3-7

Lè sa a:

Jezi di farizyen yo parabòl sa a, li di: “Kilès nan pami nou, si l’ gen san mouton, epi li pèdi youn nan yo, pou l’ pa kite katrevendiznèf yo nan savann nan, pou l’al chèche sa k’ te pèdi a, joustan li jwenn li? Lè l’ jwenn li, li mete l’ sou zepòl li ak kè kontan, li rive lakay li, li rasanble zanmi l’ ak vwazen l’ yo, li di yo: “Fè kè nou kontan avèk mwen, paske mwen jwenn mouton m’ nan ki te pèdi a”. Mwen di ou se konsa tou ap gen kè kontan nan syèl la pou yon pechè ki fè penitans, plis pase pou katrevendiznèf moun kòrèk ki pa bezwen fè penitans”.

An nou fè lwanj ak konpliman pou pawòl Bondye a.

REFLEKSYON: Jodi a, Legliz Katolik la sou tout fas tè a ap fete Sakre-Kè. You nan fèt ki gen yon pakèt enpòtans pou nou menm kretyen. Kote Bondye ap montre nou renmen li genyen pou limanite a reyèl e li manifeste nan kè ak nan lavi Pitit li a Jezi, yon kè ki bay lavi e ki ranpli ak yon lamou san parèy (Jn13,1; Filipyen 2,5).

Nan premye lekti a pwofèt Ezekyèl prezante nou Bondye Granmèt la kòm yon Papa k’ap rasanble, yon vrè Gadyen k’ap pran swen tout mouton l’ yo. Nan sans sa a, nou ka wè tou yon seri kalite ke yon bon gadyen dwe genyen, ou byen pou n’ di yon fason ki pi senp, kalite yon bon pastè dwe genyen.

Rasanble: Li toujou la pou tout moun san fè distenksyon ras, ni kilti.

Responsab: Li vizite mouton li yo pou l’ konnen konbyen mouton li genyen, epi kisa yo genyen kòm pwen fò ak pwen fèb;

Disponib: Li fè l’ disponib pou l’ pran swen yo kòm sa dwa.

Frè ak sè m’ yo, nou menm ki fè pati bann mouton Bondye yo, l’ap di nou nou pa bezwen pè lè nou santi nou pa ka mache akoz pwoblèm ak difikilte la vi a. Puiske Granmèt la se Gadò nou, nou p’ap manke anyen (Sòm 23). 

Jezi ap fè n’ konprann, sa ki lesanyèl pou Gadò a se pa mouton ki deja nan patiraj la, men se rive jwenn sila yo ki pèdi, sila yo ki sòti nan patiraj la.  Nan sans sa a Pap Franswa pale sou nesesite yon Legliz ki ouvè, yon Legliz ki toujou pre pou l’al rankontre lòt yo nan reyalite y’ap viv la. Men tou, sa mande yon kè ki plen lanmou pou lòt la, pou sa k’ pi piti a. Se sa ki bay fèt n’ap fete jodi a sans li: Sakre-kè Jezi, yon Bondye  ki tèlman gen lanmou pou lèzon pral aksepte bay lavi li sou yon kwa pou retire lèzòm nan bafon peche a (Gal 2,20). Paske peche te imilye nou epi bouche je nou.

Kidonk nan sans sa, gen plis kè kontan nan syèl la pou yon pèchè ki konvèti (Lik 15,7). Nou menm kretyen nou gen responsablite pou n’ viv nan renmen you ak pou lòt.

LAPRIYÈ: Bondye Papa, mèsi pou renmen w’ renmen nou, tanpri ba nou fòs ak kouraj pou n’ rache kè wòch nou an, ba nou yon kè ki senp, devwe, sansib tout bon vre, ba nou yon lafwa solid pou kwè Jezi toujou prezan nan lavi nou. Amèn.

PWOPOZISYON: M’ap kite kè Jezi atire mwen.