MADI 12

Koulè Vèt

PREMYE LEKTI

«Si nou pa kwè, nou p’ap kenbe»

LEKTI LIV PWOFÈT IZAYI 7, 1-9

Rive, nan tan Akaz, pitit Joatam, pitit Ozyas, wa Jida: Rasin, wa Siri, ak Fase, pitit Womeli, wa Izrayèl, monte Jerizalèm pou yo batay kont li, men yo pa t’ reyisi pran l’. Yo pote nouvèl bay kay David la, yo di: «Siri enstale nan Efrayim». Kè l’ sote ansanm ak kè pèp li a tankou pye bwa yo souke nan rak la devan fas van an.

Granmèt la di Izayi: «Pati, al rankontre Akaz, ou menm avèk rès Jasoub, pitit ou a, nan bout kannal basen anwo a sou wout jaden Lesiv la, w’a di l’:

«Atansyon, pou ou ret trankil; pa pè, pa kite kè ou tranble devan de bout bwa dife sa yo k’ap fè lafimen an, nan kòlè Rasin, wa Siri a, ak pitit Womeli a, k’ap di: N’ap monte kont Jida, n’ap ataque l’, n’ap fè l’ vin nan kan pa nou; n’ap mete pitit Tabeèl la kòm wa nan mitan l’.

Men pawòl Granmèt la: Bagay sa a p’ap kanpe, li p’ap reyalize; men tèt Siri se Damas, tèt Damas se Rasin; nan swasannsenkan ankò, Efrayim ap sispann vin tounin yon pèp; tèt Efrayim se Samari, tèt Samari se pitit Womeli a. Si nou pa kwè, nou p’ap kanpe».

Pawòl Granmèt la.

SÒM REPONS 47, 2-3a. 3b-4. 5-6. 7-8

R/ Bondye enstale lavil li a pou tout tan.

Granmèt la gran, li merite anpil lwanj, nan lavil Bondye nou an.

Mòn li a sen, ti mòn li a bèl, kontantman tout tè a.R.

Mòn Siyon an, nan bout rejyon nò a, lavil gran wa a.

Bondye nan lakay li yo, yo konnen l’ byen, li vin tounen kachèt.R.

Sèke men wa yo rasanble, yo fè konplo ansanm.

Kon yo wè, yo sezi, yo twouble, yo sove.R.

La a, sezisman pran yo, doulè tankou doulè fi k’ap akouche.

Nan van ki sot nan direksyon solèy leve a ou kraze batiman Tasis yo.R.

LEVANJIL

«Y’ap gen plis pitye pou Tir ak Sidon ak peyi Sodòm nan pase pou nou, nan jou jijman an»

MEN BÒN NOUVÈL JEZIKRI A DAPRÈ MATYE KI SEN 11, 20-24

Lè sa a:

Jezi te kòmanse fè vil yo repwòch, kote li te fè anpil mirak yo, paske yo pa t’ fè penitans:

«Madichon pou ou, Kowozayin, madichon pou ou, Betsayid, paske si se nan Tir ak Sidon yo te fè mirak yo ki fèt lakay nou yo, gen lontan yo ta pran sak avèk sann pou yo fè penitans! An verite mwen di nou, y’ap gen plis pitye pou Tir ak Sidon pase pou nou nan jou jijman an.

Epi ou menm, Kafanawòm, èske y’ap leve ou jous nan syèl? se jous nan lanfè y’ap desann ou; paske si se nan Sodòm yo te fè mirak sa yo ki fèt lakay ou a, petèt yo t’ap dire jous jodi a. An verite mwen di nou, y’ap gen plis pitye pou peyi Sodòm nan pase pou ou, nan jou jijman an».

An nou fè lwanj ak konpliman pou pawòl Bondye a.

REFLEKSYON: Nan Levanjil jodi nou dekouvri yon lòt fwa kijan misyon preche bòn nouvèl la gen anpil ekzijans. Eksperyans pwofèt yo montre nou difikilte misyon sa. Pi plis toujou nou wè nan levanjil jodi a kijan Jezi te soufri anpil paske plizyè vil pa t’ akeyi Bòn nouvèl Wayòm syèl la (Mt 11, 21).

Sa pa t’ fasil ditou pou Jezi malgre tout gwo mirak li te reyalize. Sa ede nou konprann tou difikilte k’ap tann nou nan misyon preche levanjil la. Men nou gen lespwa menm jan Jezi te gen laviktwa sou pouvwa peche ak sou lanmò nou menm tou n’ap gen laviktwa si nou gen lafwa ak esperans nan li.

Jezi te pwomèt nou l’ap ansanm ak nou chak jou jiska lafen. Avèk asirans sa li ba nou an, nou sèten n’ap ranpòte laviktwa ansanm ak li. Men nou dwe fè anpil jefò, se chak jou pou nou fè eksperyans konvèsyon, se nan tout ti aktivie n’ap fè pou nou chèche jistis ak sentete Bondye.

An nou pa pè pwoche kot Granmèt la, li menm ki gen sous lagras li a ki ouvri pou nou nan sakreman penitans la, li menm ki toujou gen de bra li ouvè byen laj pou li akeyi nou epi padone nou.

LAPRIYÈ: Bondye Papa, tanpri ban m’ sajès ak kouraj pou m’ kapab dekouvri pwòp peche mwen yo epi selebre sakreman rekonsilyasyon pou yon lavi tou nèf.

PWOPOZISYON: Pran desizyon chanje move abitid ki pa fè Bondye plezi.