MÈKREDI 13

Koulè Vèt

PREMYE LEKTI

«Èske rach la ap leve tèt li kont sila a k’ap koupe avèk li a? »

LEKTI LIV PWOFÈT IZAYI 10, 5-7. 13-16

Men pawòl Granmèt la:

«Madichon pou Lasiri! se fwèt ak baton kòlè m’, se nan men yo kòlè m’ ye. Mwen voye l’ kot yon nasyon k’ap fè manti, mwen voye l’ kont yon pèp k’ap fè m’ fè kòlè, pou l’ pran richès, pou l’ separe piyay, pou l’ foule l’ anba pye tankou labou nan lari. Men li menm se pa konsa li konprann koze sa a, se pa konsa kè l’ kalkile sa; men se kraze kè l’ te mande kraze, se touye li te mande pou l’ touye anpil nasyon».

Li di: «Se ak fòs men m’ mwen te fè sa, se ak sajès mwen mwen te reyisi.Mwen retire fwontyè pèp yo, mwen piye chèf yo.Tankou moun ki gen pouvwa, mwen pran sa k’ te abite nan wotè yo. Men m’ jwenn richès pèp yo tankou yon nich; tankou yo ranmase ze ki abandone, konsa mwen ranmase tout tè a, pa gen pèsòn ki souke plim zèl, ki louvri bouch, ki rele».

Èske rach la leve tèt li kont sila a k’ap koupe avèk li a? Oubyen èske si a leve tèt li kont sila a k’ap siye avèk li a? Kòm si fwèt la t’ap drese kont sila a k’ap leve l’ la, kòmsi baton an t’ap drese, li menm ki yon bout bwa a».

Se pousa chèf la, Granmèt lame yo, ap voye grangou sou sila yo ki gra yo, anba richès yo a l’ap limen yon brazye tankou yon boukan dife.

Pawòl Granmèt la.

SÒM REPONS 93, 5-6. 7-8. 9-10. 14-15

R/ Granmèt la p’ap repouse pèp li a.

Pèp ou a Granmèt, yo rabese l’, eritaj ou a, yo fè l’ pase tray.

Vèv la ak etranje a, yo touye yo, òfelen yo, yo touye yo.R.

Yo di: «Granmèt la p’ap wè, Bondye Jakòb la pa konprann».

Chèche konprann, nou menm ki san konprann nan pèp la, nou menm ki sòt yo, kilè n’a gen sajès? R.

Sila a ki plante zòrèy la, li pa ta tande; oubyen sila a ki fikse je a, li pa ta gade? Li menm ki korije nasyon yo, li pa ta fè repwòch, li menm ki aprann moun syans la? R.

Sèke Granmèt la p’ap repouse pèp li a, li p’ap lage eritaj li a. Sèke se daprè jistis la jijman an ap tounen, y’ap suiv li, tout moun ki gen kè yo dwat yo.R.

LEVANJIL

«Ou kache bagay sa yo pou moun sajès yo, ou devwale yo bay ti moun piti yo»

MEN BÒN NOUVÈL JEZIKRI A DAPRÈ MATYE KI SEN 11, 25 -27

Lè sa a: Jezi pran lapawòl, li di:

«Mwen fè konpliman pou ou, Papa, Granmèt syèl la ak tè a, paske ou kache bagay sa yo pou moun sajès yo ak moun entelijan yo, ou devwale yo bay ti moun piti yo. Oui, Papa, paske se konsa sa fè ou plezi.

Papa m’ renmèt mwen tout bagay, pèsòn pa konnen Pitit la, sof Papa a; ni pèsòn pa konnen Papa a, sof Pitit la ak moun Pitit la vle devwale sa».

An nou fè lwanj ak konpliman pou pawòl Bondye a.

REFLEKSYON: «OU KACHE BAGAY SA YO POU MOUN SAJÈS YO AK MOUN ENTELIJAN YO, OU DEVWALE YO BAY TI MOUN PITI YO».

Jodi a, nou ta kapab di Levanjil la ba nou opòtinite pou nou antre nan pwofondè sajès Bondye a. Kilès moun ki pa ta renmen yo devwale li mistè lavi a? Men gen mistè ke menm pi gwo syantifik nan lemond pa kapab fè limyè sou li. Poutan, gen yon nèg, pa gen anyen ki kache devan li, pa gen anyen ki sekrè pou li» (Mak 4, 22). Se sila ki rele tèt li «Pitit Moun nan», paske li di «Papa m' renmèt mwen tout bagay» (Mt 11, 27). Nati li kòm moun, te manifeste kòm Pawòl Bondye ki tounen moun, li se dezyèm pèsòn Sent Trinite a; devan li pa gen okenn fòs fènwa ki ka reziste, e se gras a li menm lannuit la klere plis ke lajounen an.

Genyen yon pwovèb Arab ki di: «Si yon foumi nwa monte sou yon mi nan mitan yon nuit nwa, Bondye wè li». Pou Bondye, pa gen anyen ki sekrè ni mistè. Mistè yo, se pou nou menm kòm moun yo ekziste. Devan Bondye, tout bagay parèt klè: ni sa ki nan tan prezan, ni sa ki nan tan pase, ni sa ki gen pou rive.

Antan li plen ak satisfaksyon, Granmèt la di: «Mwen fè konpliman pou ou, Papa, Granmèt syèl la ak tè a, paske ou kache bagay sa yo pou moun sajès yo ak moun entelijan yo, ou devwale yo bay ti moun piti yo» (Mt 11,25). Vrèman vre, pèsonn pa ka pretann li konnen kalite sekrè sa yo, menm si li ta eseye fè gwo etid sou yo. Yon moun ki fin vyeyi e ki pa gen gwo nivo entèlektyèl kapab konnen plis sekrè sou lavi ke yon gwo save ki te etidye nan pi gwo inivèsite nan lemond. Genyen sajès (konesans ou kapab genyen) nan jan ou kwè nan Bondye, nan jan ou gen kè ou senp ak jan ou fè ou toupiti.

LAPRIYÈ: Bondye Papa, fè nou gen kè nou senp pou nou kapab rankontre ak ou menm ki se Sajès la menm.

PWOPOZISYON: M’ap eseye pwoche pi pre Bondye pou m’ ka konnen sekrè Wayòm li an, pou m’ ka gen plis sajès. Si m’ konprann bezwen mwen se bezwen lòt la, mwen ka vin pi saj nan fason mwen trete li.