VANDREDI 1

Koulè Vèt

PREMYE LEKTI

“M’ap voye grangou se pa grangou pen, men se pou koute pawòl Granmèt la”.

NAN LIV PWOFÈT AMÒS 8, 4-6. 9-12

Koute sa, nou menm k’ap kraze pòv la, k’ap fè malere yo tonbe nan peyi a, n’ap di : “Kilè pou mwa a pase, pou nou vann machandiz yo? kilè pou saba a pase, pou nou kòmanse vann ble a, pou nou fè mezi a vin pi piti, pou nou monte pri a, pou nou deregle balans yo; konsa n’ap achte pòv yo ak lajan, ak malere yo pou yon pè sapat; ata pay ble a n’ap vann”.

“Jou sa a, deklarasyon Granmèt Bondye, solèy la ap kouche gwo midi, m’ap kouvri tè a ak fènwa gwo lajounen. M’ap fè fèt nou yo vin tounen dèy, tout kantik nou yo ap vin tounen plent; m’ap mete sak sou tout do nou, m’ap koupe cheve sou tout tèt. M’ap fè jou sa a vin tankou dèy yon sèl pitit, finisman’1 va tankou jou anmè.

Men jou k’ap rive, deklarasyon Granmèt la, m’ap voye grangou sou tè a : se pa grangou pou pen, ni swaf pou dlo, men pou koute pawòl Granmèt la. Y’ap deplase sot nan lanmè jous nan lanmè, sot nan nò jous nan sòlèy leve; y’ap mache nan tout sans pou yo chèche pawòl Granmèt la, yo pa’p jwenn li”.

Pawòl Granmèt la.

SÒM REPONS 118, 2. 10. 20. 30. 40. 131 (r.: Mt 4, 4)

R/ Se pa ak pen sèlman moun viv, men ak tout pawòl ki soti nan bouch Bondye.

Se chans pou moun ki kenbe temwanyaj li yo, k’ap chèche’1 ak tout kè yo.R.

Ak tout kè’m mwen te chèche’w, pa fè’m pèdi wout sot nan kòmandman’w yo.R.

Nam mwen ap deperi tèlman mwen anvi jijman’w yo pandan tout tan. R.

Se chemen verite a mwen chwazi, se jijman’w yo mwen mete devan’m.R.

Men mwen anvi kòmandman’w yo; nan jistis ou, fè’m vivan.R.

Mwen louvri bouch mwen, mwen respire lespri a, paske mwen te anvi kòmandman ou yo.R.

LEVANJIL

“Se pa moun ki vanyan ki bezwèn doktè; se kè sansib mwen vle, se pa sakrifis”.

MEN BÒN NOUVÈL JEZIKRI A DAPRÈ MATYE KI SEN (9, 9-13)

Lè sa a :

Pandan Jezi ap pase, li wè yon mesye ki chita nan biro ladwa’n nan, yo te rele’1 Matye; li di’1 : “Swiv mwen”. Li leve, li swiv li.

Rive, antan li sou tab nan lakay la, anpil pibliken ak pechè vini, yo vin sou tab avèk Jezi epi avèk patizan’1 yo. Lè farizyen yo wè sa, yo di patizan’1 yo : “Pouki sa mèt nou ap manje avèk pibliken yo avèk pechè yo?”

Jezi menm tande, li di : “Se pa moun vanyan ki bezwèn doktè, men se malad yo. Al aprann sa sa vle di : ‘Se kè sansib mwen vle, se pa sakrifis’. Sèke mwen pa vin rele moun kòrèk yo, men pechè yo”.

An nou fè lwanj ak konpliman pou pawòl Bondye a.

REFLEKSYON : “Swiv mwen”(Mt 9,9).

Jodi a, Levanjil la pale nou sou vokasyon Matye, li menm ki te yon pibliken. Jezi ap prepare yon ti gwoup disip ki pral gen pou kontinye misyon li te genyen pou sove tout moun nan. Li chwazi moun Li vle : pechè oubyen moun ki gen ti metye tou senp. Se konsa li rele yon pibliken pou mache dèyè li, yon moun jwif yo pa t’ byen gade akòz pwofesyon li, yo menm yo te konsidere tèt yo tankou moun ki bon nèt, moun ki san peche, temwen Lalwa a. Yo te konsidere pibliken yo tankou moun ki nan peche paske yo t’ap resevwa lajan nan non gouvènè a, sila ke jwif yo pa t’ vle soumèt devan li.

Envitasyon Jezi a sifi: «Suiv mwen» (Mt 9,9). Avèk yon sèl pawòl Mèt la, Matye abandone pwofesyon li e, nan kè kontan, li envite li nan gwo fèt lakay li pou di l’ mèsi. Sètènman Matye te gen bon zanmi ki te ekzèse menm metye ak li, e ki te patisipe nan fèt la tou. Daprè farizyen yo, tout pibliken se te pechè piblik.

Farizyen yo ki pa santi yo te ka fè silans, yo poze disip Jezi yo kesyon: «Pouki sa mèt nou ap manje avèk pibliken yo avèk pechè yo?» (Mt 9,10)

Jezi bay yon repons touswit: «Se pa moun vanyan ki bezwèn doktè, men se malad yo» (Mt 9,12). Jezi bay prezisyon sou misyon li, lè li di : «mwen pa vin rele moun kòrèk yo, men pechè yo» (Mt 9,13).

Pawòl Levanjil sa nou sot tande a, toujou alamòd. Jezi kontinye rele nou, li envite chak moun selon kondisyon li ak pwofesyon li. Anpil fwa, suiv Jezi vle di, abandone vye lide nou yo, move konpòtman nou genyen nan fanmi nou, pran tan pou lapriyè, patisipe nan lamès, patisipe nan travay levanjelizasyon. Finalman, tout sa vle di, «yon kretyen pa mèt tèt li, men li se yon moun ki ofri tèt li nan sèvis Bondye» (Sen Inyas d’Antyòch).

Sètènman, Jezi mande m’chanje anpil bagay nan lavi m’; e mwen mande tèt mwen nan ki gwoup mwen ye: èske mwen nan gwoup sila yo ki santi yo kòrèk nèt, oubyen èske mwen nan gwoup sila yo ki santi yo dwe fè jefò pou yo vin bon.

LAPRIYÈ : Jezi Granmèt, ou menm ki rele nou pou mache dèyè w’, tanpri ede nou swiv ou chak jou.

PWOPOZISYON : Èske konpòtman mwen sanble konpòtman disip Jezi ? M’ap gade kisa mwen dwe chanje jodi a nan lavi mwen.