LENDI 8

Koulè Blan

JAN-MARI VYANE KI SEN, Prèt

(Memwa)

PREMYE LEKTI   

«Vizyon sa a, se vizyon pòtre bèlte Granmèt la»

LEKTI LIV PWOFÈT EZEKYÈL 1, 2-5. 24-2, la

Sou senkyèm jou mwa a (sa vle di senkyèm ane ekzil wa Jowakin) pawòl Granmèt la rive kòt prèt Ezekyèl, pitit Bouzi, nan peyi Kaldeyen yo, bò gran larivyè Koba a. Se la menm Granmèt la te sou mwen.

Mwen wè: se yon van tanpèt ki t’ap vin sot nan Nò, avèk gwo nyaj, avèk dife k’ap fè laviwonn, avèk klète alantou l’; nan mitan l’ se te tankou aparans zèklè, k’ap sòti nan mitan dife a; nan mitan l’ tou, se te tankou potrè kat vivan, aparans yo se te tankou pòtrè moun.

Mwen tande bwi zèl yo, tankou bwi gran dlo yo, tankou bwi Bondye ki anwo nèt la: lè y’ap deplase, se te tankou bwi foul, tankou bwi lame yo; lè yo ret an plas, zèl yo sispann bat. Lè bwi a rive anlè plafon an ki te anlè tèt yo a, yo ret an plas, zèl yo ret an repo.

Anlè plafón an, ki te dirèk sou tèt yo a, se te tankou aparans bijou yo rele safi a, tankou pòtrè yon fotèy; anlè aparans fotèy la, se tankou aparans yon moun ki chita sou li. Mwen wè tankou aparans zèklè, tankou pòtre dife, anndan l’, toutalantou, apati tay li an montan, epi apati tay li an desandan; mwen wè tankou aparans dife ki klere toutalantou, tankou pòtrè ak-an-syèl ki nan nyaj, jou lapli; se te aparans bèlte a toutalantou.

Vizyon sa a, se vizyon pòtrè bèlte Granmèt la. Mwen wè, epi mwen tonbe sou fas mwen.

Pawòl Granmèt la.

SÒM REPONS 148, 1-2. ll-12ab. 12bc-14a. 14cd

R/ Syèl la ak tè a plen ak bèlte ou.

Fè lwanj Granmèt la depi sot nan syèl yo, fè lwanj li nan anwo syèl yo. Fè lwanj li, tout mesaje l’ yo, fè lwanj li, tout pouvwa l’ yo.R.

Wa yo sou tè a ak tout pèp yo, chèf yo ak tout jij tè yo, jèn jan ak vyèj yo, granmoun yo ak ti moun yo.R.

Se pou yo fè lwanj pou non Granmèt la. Paske se non l’ sèl ki anlè nèt; lwanj li anlè syèl la ak tè a.R.

Li leve kou pèp li lwanj pou nou, tout sen l’ yo, pou pitit Izrayèl yo, pèp ki tou pre l’ la.R.

LEVANJIL

«Y’ap touye l’, l’ap leve vivan. Pitit yo ekzante peye taks»

MEN BÒN NOUVÈL JEZIKRI A DAPRÈ MATYE KI SEN 17, 21-26

Lè sa a:

Pandan disip yo te rasanble ak Jezi nan Lagalile, li di yo: «Y’ap renmèt Pitit moun nan nan men lèzòm, y’ap touye l’, men sou twazyèm jou a, l’ap leve vivan». Yo te pran chagren anpil.

Lè yo rive Kafanawòm, moun yo ki t’ap ranmase de goud yo, yo pwoche kot Pyè, yo di l’: «Èske Mèt nou an p’ap peye de goud yo?» Li di: «Wi».

Lè l’ antre nan kay la, Jezi pran devan l’, li di: «Sa ou di nan sa, Simon? Wa yo sou tè a, nan men ki moun yo resevwa taks oubyen enpo? Eske se nan men pitit yo oubyen nan men etranje yo?» Li di: «Nan men etranje yo».

Jezi di l’:«Ebyen, pitit yo ekzante. Sèlman, pou nou pa sèvi okazyon pou fè yo tonbe, al nan lanmè a, voye zen an; premye pwason k’ap monte a, pran l’ louvri bouch li; w’ap jwenn yon pyès lajan; pran l’, ba yo pou mwen avèk pou ou».

An nou fè lwanj ak konpliman pou pawòl Bondye a.

REFLEKSYON: Premye moso Labib la chaje ak imaj. Se tankou yon tablo ki pentire ak anpil koulè, men chak koulè yo genyen yon sans pou moun ki pentire a. Nan lekti sa a pwofèt Ezekyèl pale nou de yon vizyon ke li te fè. Nan vizyon sa li ede nou kontanple puisans bèlte Granmèt la. Vizyon sa a, se vizyon pòtrè bèlte Granmèt la.

Nan Levanjil la nou jwenn avèk yon kesyon taks. Jezi ki montre nou, avèk jès peye taks la, li pa vini pou l’ kraze sistèm sosyete epòk li t’ap viv la. Men li te vle fè patizan li yo dekouvri kòripsyon sistèm nan. E se lakòz menm sistèm sa a ki fè yo te klouwe Jezi sou kwa a.

Men, aprè lanmò li, Jezi te leve byen vivan, paske li pa t’ posib pou li te rete nan kavo a, selon plan renmen san limit Bondye a. Atravè lakwa nou dekouvri vrè vizaj renmen an, yon renmen ki defigire, yon renmen ki sipòte tout eprèv e ki padonen nan yon mezi ki depase konpreyansyon nou. Eksperyans soufrans Granmèt la, antan li tounen mwayen ki pi efikas pou kraze lanmò a, li vin tounen yon chemen delivrans pou tout limanite.

LAPRIYÈ : Bondye, fè nou dekouvri chak jou pòtre w’ nan frè ak sè nou yo k’ap soufri enjistis nan lemond antyen espesyalman nan sosyete nou an.

PWOPOZISYON : Pote konsolasyon bay yon moun ou konnen y’ap fè enjistis.