MADI 26

Koulè Blan

SEN JWACHEN AK SENT ÁN,

Papa ak Manman Mari ki sen, ki Vyèj

(Memwa)

PREMYE LEKTI

«Sonje, Granmèt, pa kase kontra ou la avèk nou»

LEKTI LIV PWOFÈT JEREMI 14, 17-22

Je m’ ap koule dlo tout lannuit ak tout lajounen, yo pa dwe sispann, paske doulè vyèj la pitit pèp mwen an gran anpil, malè a rèd anpil. Si m’ sòti nan jaden yo, men se moun yo touye ak epe; si m’ antre nan lavil la, men se moun k’ap mouri grangou: pwofèt la ak prèt la a prale nan yon peyi yo pa t’ konnen.

Èske ou te rejte Jida lwen ou? oubyen èske nam ou degoute ak Siyon? Pouki sa ou frape nou an, pou pa gen okenn gerizon? Nou t’ap tann lapè a, men pa gen anyen ki bon; nou t’ap tann tan gerizon an, men se tray.

Granmèt, nou rekonèt mechanste nou, fot zansèt nou yo, paske nou fè peche kont ou. Pa fè nou pran lawont poutèt non ou, pa fè fotèy bèlte ou la sibi afwon; sonje, pa kase kontra ou la avèk nou.

Èske gen nan zidòl nasyon yo k’ap fè lapli tonbe, oubyen èske syèl la kapab bay lapli? Èske se pa ou menm Granmèt Bondye nou an, ou menm n’ap tann nan? Se ou menm ki fè tout bagay sa yo.

Pawòl Granmèt la.

SÒM REPONS 78, 8. 9. 11. 13

R/ Poutèt bèlte non ou, Granmèt, delivre nou.

Pa sonje fot zansèt nou yo, fè vit pran devan nou ak kè sansib ou yo, paske nou vin pòv anpil.R.

Pote nou sekou, Bondye delivrans nou, poutèt bèlte non ou, delivre nou; padonnen peche nou yo poutèt non ou.R.

Se pou l’ antre devan fas ou, rèl prizonye yo; daprè grandè bra ou kite rès pitit lanmò yo.R.

Nou menm menm, pèp ou a ak mouton pak ou a, n’ap fè lwanj ou tout tan; pou jenerasyon ak jenerasyon, n’ap anonse lwanj ou.R.

LEVANJIL

«Menm jan yo ranmase chendan yo, yo boule yo nan dife a, se konsa sa ap fèt nan finisman syèk tan yo».

MEN BÒN NOUVÈL JEZIKRI A DAPRÈ MATYE KI SEN 13, 36- 43

Lè sa a:

Lè Jezi fin ranvwaye foul yo, li rive nan kay la; disip li yo pwoche kote l’, yo di: «Eksplike nou parabòl chendan yo nan jaden an». Li reponn, li di yo:

«Moun k’ap simen bon semans la, se Pitit moun nan. Jaden an, se tè a; bon semans la menm, se pitit rèy nan; chendan an, se pitit dyab yo; lènmi an menm ki simen yo a, se dyab la; rekòlt la, se finisman syèk tan yo; moun k’ap rekòlte yo menm, se Mesaje yo.

Men jan yo ranmase chendan, yo boule l’ nan dife a, se konsa sa ap fèt nan finisman syèk tan yo: Pitit moun nan ap voye Mesaje l’ yo, y’ap ranmase tout moun k’ap fè lòt yo tonbe yo, y’ap wete yo sot nan rèy nan, ni sila yo k’ap fè peche, y’ap voye yo nan boukan dife a: se la k’ap gen dlo nan je ak manje dan.Lè sa a atò moun ki kòrèk yo ap klere tankou solèy nan rèy Papa yo a.Moun ki gen zòrèy pou l’ tande, se pou l’ tande».

An nou fè lwanj ak konpliman pou pawòl Bondye a.

REFLEKSYON: Istwa limanite se yon istwa sakre ki gen monte-desann ladan l’. Se yon istwa ki konsène de gran pèsonaj: Bondye ak lèzòm. Depi nan kòmansman kreyasyon an, lèzòm ki te nan bon relasyon ak Bondye ki te kreye yo a te vin tonbe nan peche lè yo te rive kite dyab la twonpe yo. Depi lè sa a, moun nan pa t’ ka kanpe pou gen bon jan relasyon ak sila a ki kreye l’ la, li pa t’ ka gen bon jan relasyon avèk pwòp parèy li.

Nan premye moso labib la nou sot li nan liv Jeremi an, yo montre n’ lapriyè pwofèt la ap fè monte devan Bondye pou manifeste dezespwa yo fas ak yon seri de evenman ki pote dèy, tribilasyon nan lavi pèp Bondye a. Pwofèt la konsyan nan dyalòg li ak Bondye; se pwòp peche pèp la ki alabaz malè k’ap frape li yo.

Lè yon moun vire do bay Pawòl Bondye a, k’ap chache lavi pou tout moun, moun sa a se pwòp malè pa li l’ap fòje; se pwòp twou l’ l’ap fouye pou l’ tonbe ladan l’. Lèzòm pa ka rive fè anyen ki dwat san limyè pawòl Bondye a, se Sajès ki anwo nèt la ki oryante li nan sans ki byen an. Pou l’ rive mache nan chemen ki dwat la, lèzom nan gen bezwen fè Bondye konfyans, li gen bezwen louvri kè li pou Pawòl Bondye a transfòme li, pou li rive mennen bak lavi li jan Bondye mande li a. Menm jan pwofèt Jeremi te di a, ann mande Bondye pou l’ gen pitye pou nou, pou l’ pa gade sou peche nou yo, men pou li fè kè l’ sansib pou nou.

Nan levanjil la nou wè Matye pale n’ de prezans mal la li ki nan mond lan. Fas ak sa Bondye te simen ki bon, ki bèl pou byennèt tout moun, gen Satan, malen an, mechan an, ki vin simen move zèb pou detounen plan Bondye pou limanite. Apot la fè n’ konnen se Bondye k’ap gen dènye mo a, li menm ki gen pou l’ vin jije tout bagay, pou l’ vin bay tout moun daprè sa yo merite.

Pawòl levanjil la mande nou viv nan lesperans, nan konfyans nan prezans Bondye ki toujou la nan mitan nou pou veye sou nou, pou pran swen nou. Menm lè sitiyasyon lavi a parèt difisil, menm lè anpil byen nou fè ta vle tounen mal pou nou, nou dwe kontinye travay pou byen an ka triyonfe nèt ale sou fas tè a.

Nou dwe kontinye ranpli devwa nou kòm kretyen jan Granmèt la mande nou, paske nou konnen rekonpans nou se nan men Bondye li ye. Moun k’ap fè mal yo se kolaboratè dyab la yo ye, men Bondye voye n’ pote bòn nouvèl la pou n’ ataque pouvwa dyab la nan mond lan. Nan sa n’ap chache fè ki byen, ki bèl, pou tout moun, se ede n’ap ede rèy Bondye a rive pi vit nan mitan nou. Kòm kretyen nou se bon semans Granmèt la mete nan mond lan pou n’ kapab bay bon jan fwi, pou n’ kapab donnen an kantite fwi jistis, fwi kè poze, fwi respè youn pou lòt, fwi tèt ansanm, fwi egalite fanm ak gason, fwi pwoteksyon anviwonman an, fwi ede moun viv nan diyite pitit Bondye a. Kòm nou dwe ede lemond dekouvri prezans Jezi ki nan mitan nou byen vivan, jan li menm li te di sa «m’ap toujou avèk nou joustan sa kaba» (Mt 28, 20 b)

LAPRIYÈ: Granmèt, Bondye papa nou yo, ou menm ki te fè Jwachen avèk Án ki sen gras sa a pou Manman Pitit ou a ki pran chè a te fèt nan yo, tanpri, gras a priyè yo toulede, fè nou jwenn sove a ou te pwomèt pèp ou a.  Pa pouvwa Jezikri.

PWOPOZISYON: Imite Án ak Jwachen nan fason yo te fè volonte Bondye.