MÈKREDI 20

Koulè Vèt

PREMYE LEKTI

«Kòm pwofèt nan nasyon yo mwen mete ou»

KÒMANSMAN LIV PWOFÈT JEREMI 1, 1. 4-10

Pawòl Jeremi pitit Elsyas, youn nan prèt yo ki te nan Anatòt nan peyi Benjamen an.

Pawòl Granmèt la rive kote m’, li di: «Anvan m’ te fòme ou nan vant, mwen te konnen ou; anvan ou te sòti nan vant, mwen te fè ou sen, mwen te vwe ou kòm pwofèt pou nasyon yo».

Mwen di: «A, a, a, Granmèt Bondye! gade mwen pa konnen pale, se yon ti moun mwen ye».

Granmèt la di m’: «Pa di «mwen se ti moun»; men kot tout sa m’ voye ou, se pou ou ale, se pou ou pale tout sa m’ap kòmande ou. Pa pè devan fas yo, paske mwen avèk ou, pou m’ delivre ou», deklarasyon Granmèt la.

Granmèt la voye men l’, li touche bouch mwen, Granmèt la di m’: «Mwen mete pawòl mwen yo nan bouch ou; mwen mete ou jodi a sou nasyon yo ak sou rèy yo, pou ou rache, pou ou detwi, pou ou chase, pou ou gaye, pou ou bati, pou ou plante».

Pawòl Granmèt la.

SÒM REPONS 70, 1-2. 3-4a. 5-6ab. 15ab e 17

R/ Bouch mwen ap anonse delivrans ou a, Granmèt.

Se nan ou, Granmèt, mwen espere, pa kite m’ wont pou tout tan.

Nan jistis ou a delivre m’, sove m’; panche zòrèy ou sou mwen, sove m’.R.

Se pou ou sèvi m’ yon wòch sitadèl, ak yon kay defans, pou ou sove m’, paske fòs mwen ak kachèt mwen se ou menm.

Bondye mwen, wete m’ nan men moun peche a.R.

Paske se ou menm ki esperans mwen, Granmèt; Granmèt, espwa m’ depi m’ tou jèn.

Se sou ou mwen apuiye depi m’ nan vant, depi nan vant manman m’ se ou menm ki soutni m’.R.

Bouch mwen ap anonse jistis ou, tout lajounen delivrans ou a, pou m’ ta koute l’, mwen pa kapab.

Bondye, ou ban m’ lansèyman depi m’ tou jèn; jous koulye a m’ap anonse mèvèy ou yo.R.

LEVANJIL

«Li bay fwi san fwa plis»

MEN BÒN NOUVÈL JEZIKRI A DAPRÈ MATYE KI SEN 13, 1-9

Jou sa a, Jezi sòti nan lakay la, li chita bò lanmè a. Foul yo rasanble kote l’, si tèlman li blije monte nan yon batiman pou l’ chita; tout foul la te kanpe sou bò lanmè a. Li t’ap pale avèk yo anpil nan parabòl, li t’ap di:

«Sila a k’ap simen an sòti pou l’ simen. Pandan l’ap simen an, gen kèk grenn ki tonbe sou bò wout la, zwazo syèl yo rive, yo manje yo. Dòt menm tonbe nan teren wòch, kote pa t’ gen anpil tè; menm lè a, yo pouse, paske yo pa t’ gen tè ki fon; lè solèy la leve, chalè l’ boule yo, epi kòm yo pa t’ gen rasin, yo seche. Dòt menm tonbe nan pikan, yo grandi avèk pikan yo, ki toufe yo. Dòt ankò tonbe nan bon tè; yo bay fwi, yon pòsyon san fwa plis, yon lòt swasant fwa plis, yon lòt trant fwa plis. Moun ki gen zòrèy, pou l’ koute, se pou l’ koute».

An nou fè lwanj ak konpliman pou pawòl Bondye a.

REFLEKSYON: Granmèt la wè pi lwen pase nou, paske se li menm ki te kreye nou. Se sa menm istwa vokasyon pwofèt Jeremi an montre nou. Bondye gade pwofèt la, li di li yon pawòl: «Anvan m’ te fòme ou nan vant, mwen te konnen ou; anvan ou te sòti nan vant, mwen te fè ou sen, mwen te vwe ou kòm pwofèt pou nasyon yo».

Jeremi etone, devan kokenn chenn deklarasyon sa a, epi li di Granmèt la:

«A, a, a, Granmèt Bondye! gade mwen pa konnen pale, se yon ti moun mwen ye».

Granmèt la reponn Jeremi: «Pa di «mwen se ti moun»; men kot tout sa m’ voye ou, se pou ou ale, se pou ou pale tout sa m’ap kòmande ou. Pa pè devan fas yo, paske mwen avèk ou, pou m’ delivre ou».

Aprè sa Granmèt la voye Jeremi nan misyon ak pawòl sa yo: «Mwen mete pawòl mwen yo nan bouch ou; mwen mete ou jodi a sou nasyon yo ak sou rèy yo, pou ou rache, pou ou detwi, pou ou chase, pou ou gaye, pou ou bati, pou ou plante».

Nou menm tou, nou fè eksperyans anpil fwa ki sanble ak Eksperyans Jeremi an; lè nou pa vle reponn apèl Bondye nan lavi nou, nou toujou jwenn anpil pretèks pou nou prezante li. An nou gade nan ki fason Bondye ap rele nou jodi a epitou an eseye dekouvri pretèks nou yo ki fè nou pa vle reponn apèl li. Ki misyon Bondye konfye mwen jodi a?

Atravè moso Levanjil Matye a, Jezi ap di nou nou pa bezwen antre nan jaden Granmèt la, nou pa dwe pè simen semans levanjil, paske li ka tonbe nan bon tè. Li ka bay bon randman.

Nan sans sa a, li enpòtan pou nou wè nou menm ki kalite tè nou ye, nan ki mezi nou akeyi pawòl Bondye a nan lavi nou pou nou kite li donnen fui renmen, lapè, kè kontan, kè poze, solidarite, fratènite?

Se kalite fwi sa yo Bondye ap tann nan men nou. An nou di li mèsi pou pawòl li a ki toujou pote konsolasyon ak lapè pou nou, pawòl sa ki se yon lanp k’ap klere fènwa tout enkyetid nou yo, pawòl ki ba nou asirans ak sekirite. Se pou nou akeyi pawòl la ak anpil lajwa nan kè nou, se pou nou kite li transfòme nou pou nou ka ranpli misyon nou kòm pè, wa ak pwofèt, menm jan ak pwofèt Jeremi.

LAPRIYÈ: Granmèt, ede nou dekouvri apèl w’ap fè nan lavi nou jodi a, pou nou tounen mesaje Bòn Nouvèl la, pou nou travay nan jaden Legliz ou a, antan n’ap temwaye ou vivan nan fason nou pale ak nan jan nou aji. Pa pouvwa Jezikri. Amèn.

PWOPOZISYON: Dekouvri apèl Bondye nan lavi mwen, dekouvri vokasyon mwen.