JEDI 1

Koulè Vèt

PREMYE LEKTI

«Tout bagay se pou nou, nou menm nou pou Jezikri, Jezikri menm li pou Bondye»

LEKTI PREMYE LÈT APOT PÒL KI SEN, POU KORENTYEN YO 3, 18-23

Frè m’ yo :

Pèsonn pa bezwen twonpe tèt li.Si gen yon moun nan pami nou ki konprann li gen sajès nan sans syèk sa a, se pou l’ vin fou pou l’ kapab gen sajès vre ; sèke sajès tè sa a se bagay moun fou li ye devan Bondye.

Paske men sa k’ ekri : «M’ap pran moun sajès yo nan pyèj yo a» epi tou: «Granmèt la konnen panse moun sajès yo, yo pa vo anyen». Konsa pèsonn pa bezwen tire lwanj nan lèzòm. Tout bagay pou nou ; swa Pòl, swa Apolon, swa Sefas, swa tè a, swa lavi a, swa lanmò a, swa sa k’ la koulye a, swa sa k’ap vini an; tout bagay reyèlman vre se pou nou, nou menm nou pou Jezikri, Jezikri menm pou Bondye.

Pawòl Granmèt la.

SÒM REPONS 23, 1-2. 3-4ab. 5-6

R/ Pou Granmèt la tè a ak tout sa k’ plen l’.

Pou Granmèt la tè a ak tout sa k’ plen l’, fas tè a ak sa ki abite sou li yo.

Paske se li menm ki poze fondasyon l’ sou lanmè yo, ki rann li solid sou gran larivyè yo.R.

Kilès k’ap monte sou mòn Granmèt la, oubyen kilès k’ap enstale nan kote l’ ye a ki sen an?

Moun ki inosan nan men l’ epi ki gen kè l’ nèt, ki pa pran non l’ pou granmesi.R.

Se moun sa a k’ap resevwa benediksyon nan men Granmèt la, ak rekonpans nan men Bondye ki sove l’ la.

Sa a se ras moun k’ap chèche l’ yo, k’ap chèche fas Bondye Jakòb la.R.

LEVANJIL

«Yo kite tout bagay, yo suiv li».

MEN BÒN NOUVÈL JEZIKRI A DAPRÈ LIK KI SEN 5, l-11

Lè sa a:

Kòm foul yo te gonfle sou Jezi pou yo tande pawòl Bondye a, li te kanpe sou bò letan Jenezarèt la. Li wè de kannòt ki mouye bò letan an; moun k’ap peche pwason yo te desann, yo t’ap lave filè yo. Li monte nan youn nan kannòt yo, sa k’ te pou Simon an, li mande l’ pou l’ rekile yon ti kras sot bò tè a. Li chita, l’ap bay foul yo lansèyman antan l’ nan ti kannòt la.

Kon l’ fin pale, li di Simon: «Mennen nou nan fon, epi lage filè yo pou lapèch la».

Simon reponn, li di l’: «Mèt, tout nan nuit nou travay san nou pa pran anyen; sèlman sou pawòl ou m’ap lage filè a».

Lè yo fè sa, yo ranmase yon pakèt foul pwason ; filè yo a t’ap chire. Yo fè asosye yo siy, sa k’ te nan lòt kannòt la, pou yo vin ede yo. Yo rive, yo plen toulede kannòt yo, jous yo te prèt pou koule.

Lè Simon Pyè wè sa, li lage kò l’ nan jenou Jezi, li di : «Rale kò ou lwen m’, paske se yon moun ki nan peche mwen ye, Granmèt».

Sèke sezisman te anvayi l’, ansanm ak tout moun ki te avèk li yo nan lapèch pwason yo yo te pran an; konsa tou pou ni Jak ni Jan, pitit Zebede yo, ki te asosye Simon.

Jezi di Simon : «Pa pè, apati koulye a, se lapèch moun w’ap fè».

Yo kondui kannòt yo jous atè, yo kite tout bagay, yo suiv li.

An nou fè lwanj ak konpliman pou pawòl Bondye a.

REFLEKSYON : «MENNEN NOU NAN FON»

Jodi a, sa byen etone nou lè nou konstate kijan pechè yo te gen kouraj kite aktivite yo, fanmi yo, pou yo te ka suiv Jezi («yo kite tout bagay, yo suiv li»: Lik 5,11) presizeman nan moman kote li parèt kòm sila ki vin kolabore ak yo nan yon fason eksepsyonèl nan biznis yo fè pou yo te ka viv. Si Jezi moun Nazarèt la ta fè nou menm pwopozisyon sa nan venteyinyèm syèk nou an…, èske nou ta gen menm kouraj ak mesye sa yo. Èske nou ta rive dekouvri si nou avèk li nou p’ap pèdi anyen?

Nou menm kretyen nou kwè Kris la toujou prezan; se poutèt sa jounen jodi a, se pa avèk Pyè, Jak oubyen Jan Jezi adrese ankò, men se nou tout ki deklare Jezi se Granmèt nou, se nou menm Granmèt la ap mande pou resevwa li nan bato lavi nou, paske li vle repoze bò kote nou; li mande nou kite li sèvi ak nou, li mande nou pou nou pèmèt li oryante ekzistans nou, pou nou ka pote fwi nan mitan yon sosyete ki swaf bòn nouvèl la. Poutan bòn nouvèl sa a, sosyete fè yon pa pi lwen li chak jou.

Pwopozisyon sa trè atirant, sa nou manke se volonte pou nou aprann konnen kijan pou nou libere anba laperèz nou yo, prejije nou yo, pou nou ka avanse pi fon nan dlo a, sa vle di, pou nou ka ale pi lwen ke tout sa ki limite lavi chak jou nou ki plen angwas ak dekourajman. Nan sans sa a, Sen Toma d’Aken di nou: « Moun ki pran pèn sou wout la, menm si li pa avanse ak gran pa, li vin pi pre kote li vle rive a; moun k’ap pase sou kote wout la, plis li kouri, se plis li pase lwen kote li vle rive a».

«Duc in altum», «Avanse pi fon» (Lik 5, 4): An nou pa rete kanpe sou rivaj sou kote yon mond k’ap viv nan gade lonbrik li sèlman! Navigasyon nou sou lanmè lavi a dwe mennen nou jete lank nou nan tè pwomiz la, kote nou va fini kous nou dèyè syèl nou espere a, kado Papa a – me tou- yon kado ke nou pa ka separe avèk travay moun- travay pa w’, travay pa m’ – nan sèvis lòt yo nan bato Legliz la. Kris la konnen tout bagay, sa depan de nou: oubyen nou chwazi santre sou nou menm nan chache enterè pèsonèl nou, oubyen nou nou chache louvri nan orizon Kris la.

LAPRIYÈ : Granmèt, mwen envite ou jodi a nan bato lavi mwen.Menm si gen gwo van ak tanpèt, mwen konnen w’ap menm mwen sou bon pò a san pwoblèm. Amèn.

PWOPOZISYON : Kisa mwen ka wete nan bato lavi mwen, pou Jezi ka jwenn yon ti plas pou li chita ? M’ap reflechi pou mwen wè.