LENDI 5

Koulè Vèt

PREMYE LEKTI

“Wete vye leven an; paske yo sakrifye Pak nou  an, Jezikri”.

NAN PREMYE LET PÒL EKRI MOUN KORENT YO 5, 1-8

Frè m’ yo :

Tout kote yo tande pale sou kesyon move plezi nan pami nou, yon kalite move plezi yo pa jwenn ata nan pami nasyon yo; atèl pwen yon moun ki an nafè ak madanm papa 1’. Epi n’ap gonfle kè nou! Pouki nou pa pran dèy pito, pou nou wete sila a ki fè bagay sa a sot nan mitan nou. Mwen menm ki pa la ak kòm, men ki prezan ak lespri m’, mwen deja fin jije sila a ki aji konsa a, kòmsi mwen te prezan. O non Granmèt nou Jezikri, rasanble ansanm avèk lespri m’avèk pouvwa Granmèt nou Jezi, pou nou renmèt kalite moun sa a nan men Satan pou chè a detwi, dewa pou lespri a kapab sove nan jou Granmèt nou Jezikri.

Grandizè nou  an pa bon. Èske nou pa konnen yon ti kras leven gate tout pat la? Wete vye leven  an, pou gen yon nouvo pat, paske nou se pen san leven; reyèlman vre yo sakrifye Pak nou  an Jezikri. Konsa se pou nou fete, men se pa avèk vye leven, ni avèk leven mechanste ak movèz fwa, men nan pen san leven senserite ak verite.

Pawòl Granmèt la.

SÒM REPONS 5, 5-6. 7. 12 (r.: 9a)

R/ Granmèt, kondui m’ nan jistis ou a.

Sèke ou pa yon Bondye ki renmen fot; mechan an pa abite kote ou,

Moun ki pa kòrèk yo pa rete devan je ou.R.

Ou rayi tout moun ki fè enjistis, w’ap pèdi tout moun k’ap fè manti;

Granmèt la pa vle wè moun san ak riz.R.

Tout moun ki espere nan ou, se pou ou kontan, se pou yo fete pou tout tan.

W’ap kouvri yo ak lonbraj ou, y’ap jwenn bèlte yo nan ou 

sila yo ki renmen non ou nan.R.

LEVANJIL

"Yo t’ap obsève si l’ t’ap geri moun jou saba a".

MEN BÒN NOUVÈL JEZIKRI A DAPRÈ SEN LIK 6, 6-11

Rive yon jou Saba, li te antre nan yon kay reyinyon, li t’ap bay lansèyman. Te gen yon moun la, men dwat li te sèk.

Pwofesè yo ak farizyen yo t’ap obsève si l’ t’ap geri moun jou saba a, pou yo te jwenn dekwa akize l’.

Li menm menm li te konnen panse yo, li di moun nan ki te gen men l’ sèk la: "Leve, kanpe nan mitan". Li leve, li kanpe.

Jezi di yo: "M’ap poze nou kesyon: èske jou saba yo gen dwa fè dibyen, oubyen dimal; sove yon lavi, oubyen pèdi l’?"

Li gade tout moun alantou, li di moun nan: "Lonje men ou". Li lonje l’, men l’ vin enganm. Yo menm yo te plen raj, yo fè konplo antre yo pou yo wè sa pou yo fè ak Jezi.

An nou fè lwanj ak konpliman pou pawòl Bondye a.

REFLEKSYON: "LEVE, KANPE NAN MITAN (…). LONJE MEN OU"

Jodi a, Jezi ba nou ekzanp libète a. Nan tan sa a nou si tèlman pale de sa. Men pou fè diferans ant libète n’ap anonse epi nou viv la, libète Jezi ap pale nou an se yon bagay ki makonnen ak zèv Papa li. Se Jezi menm ki di nou: «Pitit Bondye a pa fè anyen pou kò li. Sa l' wè Papa a fè, se sa l' fè tou. Tout sa Papa a ap fè, Pitit la fè l' tou» (Jan 5,19). Tout sa Papa fè, se lanmou ki pouse li fè li.

Lanmou an pa fòse w’, men li pouse w’ aji, li mete w’ an mouvman, li fè w’ gen bon kè.  Lòd sa a Jezi pase  nèg la: «Leve, kanpe nan mitan», se yon pawòl ki gen fòs pou rekreye sila ki renmen an, e ki aji selon pawòl la. Plis toujou, li di li: «lonje men ou» (Lik 6,10). Se konsa Jezi fè yon mirak nan lavi moun sa ki ten men li sèk la, li fè li reprann fòs, li fè li konnen yon lavi tou nèf. «Sove» vle di wete yon moun nan lanmò, se sa mo geri a vle di tou. Antan Jezi geri nèg la, li sove li, se yon siy lanmou Bondye pou sila li kreye a. Nan Jezi Bondye fè nou konnen nouvo lwa a se lwa lanmou an, e li manifeste nan aksyon, nan fason nou aji pou ede frè ak sè nou.

Konsa, sa ki pi enpòtan jodi a, se lè nou fè libète a makonnen ak lanmou an, nan fason Jezi. Sen Ogisten ede nou sonje vrè sans mo libète a lè li di nou: «Renmen epi fè sa ou vle». Pa gen vrè libète san lanmou.

LAPRIYÈ: Bondye Papa, tanpri, fè gwo fanm lanmou limen nan kè nou pou renmen e sèvi pwochen nou, konsa n’ap sòti nan prizon move santiman nou yo. Pa pouvwa Jezikri.

PWOPOZISYON: Si m’ renmen tout bon vre jan Bondye mande sa, m’ap lib tout bon.