MÈKREDI 14

Koulè Blan

JAN DE LA KWA KI SEN, Prèt e Savan sakre Legliz la

(Memwa)

PREMYE LEKTI

«Syèl yo, fè lawouze tonbe sot anwo a! »

LEKTI LIV PWOFÈT IZAYI 45, 6b- 8.18.21b- 26

"Mwen menm Granmèt la, pa gen lòt; mwen menm ki fòme limyè a epi ki kreye fènwa yo, ki fè kè poze epi ki kreye malè; se mwen menm Granmèt la ki fè tout bagay sa yo. Syèl yo, fè lawouze tonbe sot anwo a, se pou nyaj yo fè sila a ki kòrek la tonbe tankou lapli! Se pou tè a louvri, pou l jèmen Sila a k ap sove nou an, se pou jistis la leve ansanm ! Mwen menm Granmèt la mwen kreye l". Paske men sa Granmèt la di: li menm ki kreye syèl yo, li menm Bondye ki fòme tè a, epi ki fè l, li menm ki fikse l; se pa pou granmesi li te kreye l, se pou yo te kapab abite li te fòme l : "Se mwen menm Granmèt la, pa gen lòt. Pa gen lòt Bondye andeyò m? Bondye ki kò   rèk la, ki sove moun, pa gen anyen andeyò m, tounen vin jwenn mwen, epi n a sove, nan tout limit tè a, paske se mwen menm Bondye, pa gen lòt. Se sou pwòp tèt mwen mwen fè sèman; nan bouch mwen se pawòl jistis k ap sòti, li p ap tounen; paske devan m tout jenou ap plwaye, tout lang ap fè sèman. Se pou l di, se nan Granmèt la jistis mwen ak kòmandman m ye; kote l y ap vini, y ap wont. Tout moun ki te rayi l yo. Nan Granmèt la tout ras Izrayèl la ap jwenn jistis ak lwanj".

Pawòl Granmèt la.

SÒM REPONS 84, 9ab l0. 11-12. 13 14 (r.: Iz 45, 8)

R/ Syèl yo, fè lawouze desann sot anwo a, se pou nyaj yo fè sila a ki kòrèk la tonbe tankou lapli.

M’ap koute sa Granmèt Bondye a ap di, se kè poze l’ap pale pou pèp li a ak sen l yo. Reyèlman vre, delivrans li a toupre moun ki respekte l’ yo, pou bèlte a abite sou tè nou an, R.

Kè sansib ak verite rankontre, jistis ak kè poze anbrase.

Verite a leve sot sou tè a, jistis la panche sot nan syèl la. R.

Wi, Granmèt la ap bay bon kè, tè nou an ap bay fwi l’.

Jistis ap mache devan l, l’ap poze pye l’ sou wout la. R.

LEVANJIL

«Anonse Jan sa nou tande ak sa nou wè»

+ LEKTI LEVANJIL KI SEN AN DAPRÈ LIK 7, 19-23

Lè sa a Jan rele 2 nan patizan l’ yo, li voye yo kot Jezi, li voye yo mande li: "Eskè se ou menm sila a ki te gen pou vini an, oubyen èskè se yon lòt pou nou tann?" Lè mesye yo rive kote l, yo di: "Jan Batis voye nou kote ou, li di: 'Eskè se ou menm sila a ki te gen pou vini an, oubyen èskè nou dwe tann yon lòt. Lè sa a, Jezi t’ap geri anpil moun sot nan maladi ak enfimite, ak move lespri, li fè anpil moun ki te avèg vin wè klè. Li pran lapawòl, li di yo: "Ale anonse Jan, sa nou te tande ak sa nou te wè: paskè avèg yo wè, moun ki bwate yo mache, moun ki gen maladi lèp yo geri, moun soud yo tande, moun mouri yo leve, pòv yo jwenn bòn nouvèl la; se chans pou moun ki pa jwenn baryè sou wout li nan mwen".

Annou fè lwanj ak konpliman pou pawòl Granmèt la ki gen tout pou pouvwa.

REFLEKSYON : Jodi a, nan premye lekti a, pwofèt Izayi ap ede n’ konprann kijan, Bondye ki se Mèt Kreyasyon an, Li pa fè anyen konsa konsa, puiske li konnen rezon sa li fè yo. Bondye remèt nou kreyasyon li an nan men pou nou kapab jere li, pandan n’ap rann nou kont valè li genyen nan lavi nou ak enpòtans li genyen nan lavi chak moun ki ekziste.

Se pou sa, tout moun dwe ba li onè ak glwa, li menm sèl merite.

Bondye nou an, se yon Bondye ki jalou : li pa vle lèzòm mete lòt bagay nan plas li, epi adore lòt bagay nan plas li. Premye kòmandman an di: «Se Bondye sèl pou w’ adore ak tout kè ou, ak tout nanm ou, ak tout lespri ou».Renmen Bondye plis pase tout bagay’’. Kidonk, aprè li menm pa gen lòt, menm si anpil fwa lèzòm twonpe yo, yo mete lòt bagay nan plas Bondye.

Jounen jodi a, n’ap viv nan yon mond kote anpil moun mete lòt bagay nan plas Bondye,tankou lajan,plezi,sèks, ak tout lòt zidòl. Men, Bondye nou an se yon Bondye ki gen pasyans, li toujou prè pou l’al chèche nou pandan l’ap ede nou sòti nan bafon peche a. Men li mande nou yon sèl bagay ki se konvèsyon: kase tèt tounen vin jwenn li pou w’ ka sove.

Bondye vini pou l’ sove tout moun san distenksyon ras ak kilti.

An nou prepare kè nou pou nou akeyi gras k’ap tonbe sòti nan syèl la. Salmis la chante: «Syèl yo, fè lawouze desann sot anwo a, se pou nyaj yo fè sila a ki kòrèk la tonbe tankou lapli».

Nan Levanjil la, Sen Lik mete nan bouch disip Jan Batis yo yon kesyon ke anpil nan nou jounen jodi a te kapab poze sitou lè nou devan difikilte lavi a ki panike nou. Jean voye disip li yo al mande Jezi : «Eske ou se Sila ki gen pou vini an oubyen nou dwe tan’n yon lòt ?». Kesyon sa, gen moun ki konn panse Jan Batis te doute, se sa k’ fè li te voye disip li yo al poze l’, men Jezi kòm gran pedagòg pa reponn ni wi, ni non. Men li ede yo pito kontanple zèv Bondye ki t’ap reyalize nan moun ki te gen maladi, nan prizonye, nan avèg … Arestasyon Jan Batis pa retire anyen nan anons bòn nouvèl la ak nan misyon Jezi pou sove limanite, se sa ki fè Jezi di al di Jean nan prizon an sa nou  wè ak sa nou tande.

LAPRIYÈ: Bondye, ou menm ki te fè Jan ki sen vin tounen yon prèt ki bliye tèt li nèt, epi ki renmen kwa a yon jan ekstrawòdinè, fè nou gras, pou nou suiv ekzanp li tout tan, pou nou rive wè glwa ou la tout tan. Pa pouvwa Jezikri.

PWOPOZISYON: Menm si gen anpil pwoblèm ak difikilte, mwen kwè Bondye ap aji an silans.