MADI 31

Koulè Blan

SEN JAN BOSKO, PRÈT.

Memwa

PREMYE LEKTI

"Avèk pasyans, se pou nou kouri nan batay la ki pare pou nou an".

NAN LÈT POU EBRE YO 12, 1-4

Frè m’ yo:

Nou menm ki gen yon si gran kanti­te nyaj temwen, se pou nou lage tout chay ak peche k’ap anbarase nou, pou nou kouri avèk pasyans nan ba­tay la ki pare pou nou an, antan n’ap gade lotè lafwa nou an, Jezikri ki fè lafwa a vin kòrèk nèt la, li menm, yo te prezante kè kontan devan l’, men li te sipòte lakwa a, li te meprize wont la, li chita adwat Bondye.

Sonje sa a ki te sipòte kontraryete pechè yo te drese kont li a, pou nou pa kite feblès pran nanm nou. Nou pa ko reziste ankò jous nan san, antan n’ap batay kont peche a.

Pawòl Granmèt la.

SÒM REPONS 21, 26b-27. 28 e 30. 31-32

R/ Y’ap fè lwanj ou, Granmèt, sa yo k’ap chèche w’ la.

M’ap regle sa m’ te pwomèt yo de­van moun ki krenn li.Se pou pòv yo manje, se pou yo gen vant plen, y’ap fè lwanj Granmèt la, sa yo k’ap chè­che l’yo. "Se pou kè yo viv pou tout tan gen tan".R.

Y’ap sonje, y’ap tounen kot Gran­mèt la tout limit tè a, y’ap adore de­van l’ tout fanmi nasyon yo.Paske peyi wa a se pou Granmèt la, l’ap kòmande nasyon yo.Se li menm sèl y’ap adore, tout sa k’ap dòmi nan tè a.R.

Nanm mwen ap viv pou li, ras mwen ap sèvi l’.Y’ap pale osijè Granmèt la bay jenerasyon k’ap vini an, y’ap anonse jistis li a bay pèp la k’ap fèt la: "Se bagay sa yo Granmèt la te fè".R.

LEVANJIL

"Ti fi, mwen di ou, leve".

MEN BÒN NOUVÈL JEZIKRI A DAPRÈ MAK KI SEN 5, 21- 43

Lè sa a:

Kòm Jezi te travèse ankò nan bati­man an lòt bò lanmè a, gen yon gran foul ki vini jwenn li; li te bò lanmè a. Gen youn nan chèf sinagòg yo ki rive, yo te rele l’ Jayi; lè l’ wè l’, li tonbe nan pye l’; li t’ap priye l’anpil, li t’ap di: "Pitit fi m’ nan prèske mou­ri; vini, poze men sou li, pou l’ kapab sove, pou l’ viv". L’ale avèk li, yon gran foul moun t’ap suiv li, yo t’ap kraze l’.

Gen yon madanm, ki t’ap pèdi san depi douzan, li te deja konsilte anpil doktè ki te preskri l’anpil remèd, li te fin depanse tout richès li, men li pa t’ jwenn okenn rezilta, okontrè se pi mal li t’ap vin pi mal; lè l’ tande pale osijè Jezi, li vin nan foul la, dèyè, li touche rad li. Li t’ap di: Si o mwen mwen touche rad li, m’ap sove". Menm lè a sous san l’ nan tari, li santi nan kò l’ li te geri sot nan maladi a.

Menm lè a Jezi rekonèt anndan l’ gen yon fòs ki te sòti nan li, li vire kot foul la, li t’ap di: "Kilès ki touche rad mwen an"? Disip li yo t’ap di: "Ou wè foul la k’ap kraze ou, epi w’ap di:

"Kilès ki touche m’"? Men li vire pou l’ wè madanm nan ki te fè bagay sa a. Madanm nan menm te pè, li t’ap tranble, li te konnen sa k’ te pase nan li, li vini, li lage kò l’ devan l’, li di l’ tout verite a. Li menm menm li di l’: "Mafi, lafwa ou sove ou; ale ak lapè, se pou ou geri sot nan maladi w’ la".

Pandan li t’ap pale toujou, moun yo vin kot chèf sinagòg la, yo di: "Ti fi w’ la mouri; pouki sa w’ap trakase Mèt la"? Jezi menm, lè l’ tande pawòl yo te di a, li di chèf sinagòg la: 'Pa pè; se pou ou kwè sèlman". Li pa pèmèt pèsòn suiv li, sof Pyè, Jak avèk Jan, frè Jak la.

Yo rive nan kay chèf sinagòg la, kote li wè gen bwi, moun k’ap kri­ye, k’ap rele anpil. Li antre, li di yo: "Poukisa nou twouble, n’ap kriye? ti fi a pa mouri, se dòmi l’ap dòmi". Yo t’ap pase l’ nan jwèt.

Li menm menm, li mete tout moun deyò, li pran papa ak manman ti fi a epi moun yo ki te avèk li a; li antre kote ti fi a te kouche a. Li kenbe men ti fi a, li di l’: "Talita, koumi"; sa vle di: "Ti fi, mwen di ou, leve". Menm lè a ti fi a leve, li t’ap mache (li te gen douzan); yo te sezi yon gran sezis­man. Li pase yo lòd sevè pou pèsonn pa konn sa; li di pou yo ba l’ manje.

An nou fè lwanj ak konpliman pou pawòl Bondye a.

REFLEKSYON: Frè ak sè m’ yo, nan lavi nou kòm kretyen fòk nou pa janm bouke te­mwaye non Granmèt la, fòk nou pa janm sispann fè konnen lafwa nou nan pawòl nou yo ak nan aksyon n’ yo tou. Legliz la envite n’ sonje Agat ki sen, yon jèn fi ki t’ap viv nan peyi Sisil men ki te mete tout lavi l’ nan fè sa Granmèt la mande. Li te rive ak­septe mouri nan tan pèsekisyon Dese nan lane 251 aprè Jezikri. Anpil fwa nan lavi nou, nou konn chache men­nen ti lavi nou tou senp san n’ pa vle angaje nou nan denonse sa k’ mal yo pou n’ pa gen pwoblèm ak moun. An­pil fwa lè moun ap pale n’ mal, oub­yen ap di nou sa yo vle fè ki mal, nou konn manke kanpe pou n’ pote limyè Pawòl Bondye a ba yo akòz lapèrèz. Granmèt la mande n’ pou n’ pale pou fè moun yo konnen sa k’ kòrèk, pou n’ tounen mesaje lapè kote n’ap viv, kote n’ap travay…. Si sa k’ap fè mal yo pa pè fè l’oubyen di nenpòt bagay, enben poukisa nou k’ pote pawòl de­livrans lan nou refize mete limyè le­vanjil la anlè galata sosyete a pou l’ ka klere?

Nan Levanjil la nou wè Jezi, Pitit Bondye a, ki vini pou l’ sove tout moun anba peche a, anba maladi kò­porèl ak espirityèl, li pral leve yon jèn fi ki mouri. Se yon siy ki mon­tre n’ nou dwe kòm kretyen chache dekouvri soufrans ak pwoblèm moun yo pou n’ pote delivrans pou yo. Men se pa pou kont nou n’ap fè bagay sa yo, paske pa janm gen kretyen ki travay pou kont yo. Nou fèt pou n’ viv chak jou ak konviksyon ke Jezi Pitit Bondye a vivan epi li nan nou menm. Nou fèt pou n’ viv nan lafwa n’, lafwa sa a ki fè n’ toutan chache sa Bondye vle, ki fè n’ chache kon­prann Pawòl Bondye, epi kore n’ sou Pawòl la, kore n’ nan lapriyè epi nan sèvis nan kominote n’ap viv la espes­yalman nan fanmi nou. Menm jan ak fanm ki t’ap pèdi san an, fòk nou aji lafwa n’ nan Jezi k’ap viv nan mitan nou, pou n’ konnen l’ kapab rezoud anpil pwoblèm nan sosyete n’ ki san­ble dekouraje nou, ki sanble kraze fòs nou, ki sanble pa gen solisyon. Nan Jezi tout bagay posib, menm resisite moun mouri. Lafwa n’, si n’ mete l’an pratik n’ap rive transfòme anpil reya­lite ki parèt enposib. Se pou n’aprann lage n’ nèt nan men Bondye, epi chè­che sèvi l’ak tout kè nou pou n’ wè aksyon l’ yo aji nan nou menm.

Se pou nouvo ane lafwa sa a ede n’ reflechi sou pwòp sans angajman n’ak Bondye pou n’ deside chak jou chanje sa k’ merite chanje epi travay nan tèt ansanm pou liberasyon komi­note n’ap viv la. Amèn

LAPRIYÈ: Granmèt, ou menm ki te ban n’ Jezi kòm frè, kòm bon zanmi an ede n’ nan lane lafwa sa a pou n’ poze aksyon ki ede moun viv, ki ede moun pwoche pi pre w’, ki ede n’ chanje reyalite lavi pèp nou an. Amèn

PWOPOZISYON: Pran yon jou pou vizite malad nan kominote kote w’ap viv la an gwoup, remèt pwoblèm moun yo nan men Granmèt la nan la­priyè ak lafwa epi wè kisa n’ kapab fè pou n’ chanje kondisyon malad la.